Sjálfstæðisflokkurinn með fjóra menn í Norðaustri

Sjálfstæðisflokkurinn mælist með fjóra þingmenn í Norðausturkjördæmi í nýjustu mánaðarkönnun Gallups. Skv. þessu er því Þorvaldur Ingvarsson, lækningaforstjóri og formaður Sjálfstæðisfélags Akureyrar, inni á þingi. Þetta eru góð tíðindi fyrir sjálfstæðismenn hér og uppörvandi þegar að 70 dagar eru til kosninga. Þetta er mun betri staða en var í aðdraganda kosninganna 2003 og greinilegt að stefnir í góðar kosningar verði haldið vel og rétt á spilum.

Skv. könnuninni eru Framsóknarflokkurinn, VG og Samfylkingin öll með tvö þingsæti. Frjálslyndi flokkurinn mælist ekki með þingmann, ekki frekar en í síðustu könnun. Breytingin milli mánaða er því að við tökum mann af vinstri grænum, væntanlega er það jöfnunarþingsætið sem færist á milli. Þorvaldur fer þá inn á kostnað Björns Vals Gíslasonar á Ólafsfirði.

Inni fyrir Sjálfstæðisflokkinn eru því: Kristján Þór Júlíusson, Arnbjörg Sveinsdóttir, Ólöf Nordal og Þorvaldur Ingvarsson. Aðrir inni eru sem fyrr: Steingrímur J. Sigfússon og Þuríður Backman (fyrir VG), Valgerður Sverrisdóttir og Birkir Jón Jónsson (fyrir Framsókn) og að lokum Kristján L. Möller og Einar Már Sigurðarson (fyrir Samfylkingu).

Gott þetta!

Athugasemdir

[Steini Briem (IP-tala skráð) 2.3.2007 kl. 16:47]

Óperan er ekki búin fyrr en sú feita hefur sungið sitt síðasta og ég sé í minni kúlu að Birkir Jón muni krunka úti ásamt nafna sínum eftir kosningarnar.

[Stefán Friðrik Stefánsson, 2.3.2007 kl. 18:00]

Nei, þetta er bara rétt að byrja. Þungi kosningabaráttunnar er að hefjast af fullum krafti. Þessi könnun sýnir okkur sjálfstæðismönnum að við eigum að setja markið á fjóra þingmenn í vor. Það er alveg hægt að ná því sé vel unnið. Þetta er mun betri mæling en á sama tíma fyrir fjórum árum og því ekki annað hægt en að vera ánægður.

mbk.

[Rúnar Haukur Ingimarsson, 3.3.2007 kl. 21:55]

Hey ekki gleyma mér - á eftir að bjóða mig fram