Sigurður Kári telur að Siv eigi að segja af sér

Sigurður Kári Kristjánsson, alþingismaður, sagðist í dag í Silfri Egils telja að Siv Friðleifsdóttir, heilbrigðisráðherra, ætti að segja af sér vegna ummæla sinna um stjórnarsamstarfið sem hún lét falla í ræðu á flokksþingi Framsóknarflokksins á föstudag. Fá dæmi eru um það úr seinni tíð að stjórnarþingmaður telji að ráðherra í ríkisstjórn eigi að segja af sér. Þetta voru mikil orð og hafa verið mest áberandi í stjórnmálaumræðunni í dag.

Jón Sigurðsson, viðskiptaráðherra og formaður Framsóknarflokksins, var spurður síðar í Silfri Egils út í ummæli Sigurðar Kára. Hann var greinilega frekar undrandi á þessum ummælum en vék í tali sínu enn og aftur að því sem hann hafði sagt áður að ummæli Sivjar hefðu ekki verið hótun um stjórnarslit. Ég er ósammála þeirri túlkun Jóns. Ummæli Sivjar voru að mínu mati hótun um slit á þessu samstarfi, enda vék Siv í fyrrnefndri ræðu að því hvaða form á stjórn gæti tekið við ef þessi stjórn myndi falla. Þessi orð var ekki hægt að túlka á neinn veg og tek ég því undir ummæli Sigurðar Kára um að Jón hafi komið með hálfgerða afbökun í þeim efnum.

Þetta mál sýnir mjög vel titring í þessu stjórnarsamstarfi. Það er eins og það er bara. Veit ekki hvort ég telji að Siv eigi að segja af sér. En mér fannst ummæli mjög misráðin og varð hissa á þessu orðavali öllu saman. Þetta kom upp flein milli fólks í samstarfinu. Tek ég í þeim efnum undir ummæli Þorgerðar Katrínar Gunnarsdóttur, varaformanns Sjálfstæðisflokksins, í dagblöðum í gær. Þetta er frekar undarlegt mál. Björn Bjarnason, dómsmálaráðherra, komst vel að orði ennfremur um þessi efni í skrifum á vef sínum í gær.

Það verður að ráðast hvort að þetta samstarf veikist vegna þessa máls. Mér finnst það hafa veikst að mjög miklu leyti. Mér finnst þetta vera svolítið upphlaup hjá Framsókn. Staða þeirra er reyndar með þeim hætti nú að ekki þarf að undrast einhvern titring. En þetta er frekar óábyrgt hjá heilbrigðisráðherranum og mér fannst hún ekki vaxa af ummælum sínum.

Í þeim efnum tek ég undir með Sigurði Kára að staða ráðherrans hefur veikst og ég skil vel að þingmenn Sjálfstæðisflokksins geti ekki beint varið hana mikið í þessari stöðu.

Sigurður Kári telur að Siv eigi að segja af sér

Athugasemdir

[Steini Briem (IP-tala skráð) 4.3.2007 kl. 23:02]

Ef Framsókn leggur fljótlega fram frumvarp á þingi um að setja ákvæði í stjórnarskrá um sameign þjóðarinnar á auðlindum sjávar yrði það samþykkt. Ættu Sjallarnir þá að slíta stjórnarsamstarfinu, fyrst minnst var á þetta ákvæði í stjórnarsáttmálanum? Þá yrði minnihluta- eða starfsstjórn fram að kosningunum í vor. Hins vegar er ljóst að ríkisstjórnin fellur hvort eð er í vor.  

[Júlíus Valsson, 5.3.2007 kl. 01:16]

Þetta er hreinræktuð frestunarárátta að hefja umræðu um svo mikilvæg mál sem þetta á síðustu dögunum fyrir kosningar. Þingmenn þurfa að standa sig betur í stykkinu og vinna með skipulögðum hætti. Sáttmáli er sáttmáli og orð skulu standa.