VG og Sjálfstæðisflokkur missa fylgi í Norðaustri

Sjálfstæðisflokkurinn og VG tapa fylgi milli vikna í Norðausturkjördæmi í nýrri könnun Gallups. Flokkarnir eru nú næstum stórir, en VG missir sjö prósentustig og Sjálfstæðisflokkurinn missir eitt. VG er nú sjónarmun stærri, mælist enn stærstur í kjördæminu, með 29% slétt. Sjálfstæðisflokkurinn er einu og hálfu prósenti minni, eða 27,5%. Samfylkingin bætir við sig nokkuð og mælist nú með 19,4%. Framsókn bætir við sig prósenti og mælist með 17,2%. Frjálslyndir hækka og mælast með 5,2%.

Þetta er vissulega athyglisverð mæling. Það virðist vera að VG sé að missa flugið hér, enda var mælingin síðast, 36%, auðvitað með ólíkindum og vitað mál að það myndi aldrei haldast. Þetta var þeirra toppur og þeir tapa miklu fylgi milli vikna. Reyndar er enn langt eftir, það eru sex vikur til kosninga og kosningabaráttan er ekki enn hafin af fullum krafti. Enn eiga framboðin eftir að sýna á spil sín og margt enn óráðið. En þessi mæling segir sína sögu nú og fróðlegt að sjá hana birtast þarna.

Íslandshreyfingin mælist með 2,5% fylgi í þessari könnun hér í Norðausturkjördæmi. Mér þykir það mikið miðað við að enn er ekki komið á hreint hver verði leiðtogi listans hér eða hver keyrsla framboðsins verður hér á þessu svæði. Það verður fróðlegt að sjá hvort að Íslandshreyfingin verði komin með lista og kjördæmaleiðtoga fyrir kjördæmaþátt Stöðvar 2 á miðvikudaginn, en þar verður fjallað um málefni kjördæmisins og þá fáum við nýja könnun, 800 manna úrtak, sem segir eflaust enn aðra sögu.

Það hlýtur að vera áhyggjuefni fyrir Kristján Þór Júlíusson, fyrrum bæjarstjóra á Akureyri, að Sjálfstæðisflokkurinn sígi enn. Það er farið að halla á þriðja manninn, Ólöfu Nordal, í þessari mælingu. Einar Már er aftur kominn inn og VG missir flugið. Miðað við þessar tölur er erfitt að spá hvar neðri mörk þingmannatals kjördæmisins lendir. Höskuldur Þórhallsson gæti alveg dottið inn fyrir Framsókn haldi þeir áfram svona og Lára eygir möguleika fari þau að mælast yfir 20% markið. Þannig að spurningamerkin eru mörg.

Það var alltaf vitað að VG myndi missa damp og færi aldrei yfir 30%, svo að þetta kemur ekki að óvörum. En staða Sjálfstæðisflokksins er vissulega umhugsunarverð, enda verður þessi mæling varla viðunandi fyrir fólk þar, enda má alveg búast við skekkjumörkum, og í raun gæti vel verið að Sjálfstæðisflokkurinn liggi innan við 25% markið. Það þarf að vinna betur á þeim bænum ætli menn að vinna þessar kosningar, það er alveg ljóst.

En þetta verður spennandi kosningabarátta. Öll horfum við með áhuga á kjördæmaþáttinn á miðvikudag og verður gaman að sjá kjördæmaleiðtogana í panel að ræða kosningamálin.

Athugasemdir

[Steini Briem (IP-tala skráð) 31.3.2007 kl. 17:34]

FRAMSÓKN OG SJALLAR verja núverandi kvótakerfi með kjafti og klóm og tapa á því, enda eru 70% þjóðarinnar alfarið á móti þessu kerfi. Framsókn tapar fylgi yfir til Vinstri grænna og Sjallar mælast alltaf með meira fylgi í skoðanakönnunum en kosningum. 

[Stefán Friðrik Stefánsson, 31.3.2007 kl. 20:20]

Þetta verða spennandi kosningar. Það er erfitt að spá, vonlaust myndi ég þó frekar segja, að spá um þetta núna. Á þessum tímapunkti fyrir fjórum árum voru framsóknarmenn að mælast með annan mann veikan inni en fengu fjóra að lokum og voru langstærsta aflið. Lengst af var kosningabaráttan barátta milli Samfylkingar og Sjálfstæðisflokks. Framsókn fékk gríðarlega sveiflu síðustu 10 dagana fram að kosningum og vann baráttuna með ungum lista -það var þeirra styrkleiki. Þeir eru enn með unga frambjóðendur. Það er varhugavert að vanmeta þá, það gerir enginn hér. Sagan frá því síðast er of fersk í minni til að nokkur vogi sér að gera það. Samfylking tapar á að vera ekki með ferskan lista, tvo miðaldra karla í tveim fyrstu sætum og það er engin endurnýjun í tveim efstu hjá VG. En úrslitin eru langt frá ráðin. Baráttan er varla hafin og erfitt að spá í þetta, en það er samt gaman að gera það.

mbk.

[Jón Ingi Cæsarsson, 1.4.2007 kl. 13:18]

Það væri undarleg niðurstaða ef afturhaldsamur sósialistaflokkur fengi 30% hér. Að vísu ekki bara undarlegt heldur stórhættulegt líka. Við á landsbyggðinni þurfum ekki boðbera stöðnunar og neikvæðini i forystustörf. En eins og þú segir...allt er á floti...40% taka ekki afstöðu og flest óljóst enn. Þú telur að Samfylkingin sé veikari vegna tveggja miðaldra karla. Mér sýnast tveir efstu menn falla undir þá skilgreiningu að mestu hjá ykkur líka nema annar er kona. Bæði eru gamlir hundar í pólitík og fátt ferskt við þau.

Það sem við höfum framyfir alla aðra hér í kjördæminu að baráttukonur okkar í þriðja og fjórða sæti eru eini raunhæfi möguleikinn til að auka hlut Akureyrar á þingi. Að vísu er Dilla í fjórða hjá VG en ég veit að þeirra tölur eru út úr korti hvað varðar raunhæfa niðurstöðu

[Stefán Friðrik Stefánsson, 3.4.2007 kl. 15:26]

Jón Ingi: VG fær ekki þetta fylgi. Einfalt mál, enda vonandi með 2 eins og síðast en gætu húrrað sig í þrjá. Ætla rétt að vona að fólk sé gáfaðra en svo að kjósa frekar einhverja aðra en Björn Val. Frekar vil ég Láru eða Valda Ingvars inn í sannleika sagt.

Það er alveg ljóst að ásýnd Samfylkingarinnar er grárri vegna tveggja karlmanna í tveim efstu. Hefði Lára fengið annað sætið hefði listinn verið miklu sölulegri. Til dæmis held ég að listi sjálfstæðismanna hefði verið mun þyngri með Stjána og Valda efsta. Abba er allavega kona og það léttir þetta. Annars er þetta allavega mín skoðun. Held að margir séu búnir að fá leið á Einari Má, hann hefði ekki náð þessu sæti nema fara í lest með Möllernum. Það var skaði fyrir ykkur að ná ekki Láru ofar. Þetta segi ég af umhyggju fyrir ykkur og því að ég tel að Lára eigi erindi á þing, er ekki feiminn að segja það. Þið náið henni ekki inn nú.

mbk.