Róleg kosningabarátta

Það eru bara 22 dagar til þingkosninga. Mér finnst rólegt yfir baráttunni. Kannski er það vegna þess að þetta eru fyrstu kosningarnar í fjölda ára þar sem ég er ekki á fullu í kosningavinnu fyrir Sjálfstæðisflokkinn og ekki að taka þátt að neinu leyti þannig séð. Veit ekki svosem, en samt finnst mér þetta fjarskalega rólegt séð úr fjarlægðinni sem ég hef á þetta allt núna. Það er samt greinilega hiti að færast yfir þetta núna. Auglýsingarnar eru að komast á fullt og fundir eru auglýstir um dreifðar byggðir landsins.

Mér finnst mjög notalegt að vera ekki að taka þátt í þessu núna. Það er mjög þægilegt að geta skrifað meira og vera undir minni pressu, enda er mikil pressa að taka þátt í kosningabaráttu sitjandi á kosningaskrifstofu allan daginn. Kosningabaráttan hér á Akureyri í sveitarstjórnarkosningunum 2006 var mikil vinna. Þá tók ég þátt í eins miklu návígi og hægt var þá án þess að vera ekki frambjóðandi. Það var fínn tími. Mér finnst vera komið mál að linni og finnst þetta hið rétta nú. Það er líka gott að þurfa ekki að vera bundinn neinum við skrifin.

Það spurði mig einn vinur minn hvernig ég héldi að kosningarnar færu. Þó að það væri varhugavert að spá nú, enda eru síðustu 22 sólarhringar kosningabaráttu æði oft heil eilífð, er ég viss um að þær fara vel. Ég er viss um að fólk vegur og metur hvaða kostur sé farsælastur og hvaða flokksleiðtogi sé traustastur. Einhvernveginn finnst mér innst inni að það sé dómur sem minn gamli góði flokkur þarf eiginlega ekki að óttast núna. Hann stendur vel að mannskap í forystu og er með traust málefni. Hann hefur grunn sem er traustur á þessum tímapunkti.

Það var gaman að sitja landsfund um daginn. Ég var ekki bundinn neinum þar og hafði fyrst og fremst innilega gaman af að hitta vini og kunningja. Þetta var sannkölluð vinastund. Ég hef verið það lengi í Sjálfstæðisflokknum og í almennu félagsstarfi svosem að ég á marga vini, trausta vini sem ég met mikils. Það er það skemmtilegasta við svona landsfund að þetta er stund vina. Það jafnast í sannleika sagt ekkert á við það. Enda var þetta skemmtilegur vinafundur og það var um margt spjallað. Pólitíkin var þar ráðandi.

Mér fannst það áfall fyrir Sjálfstæðisflokkinn í Norðausturkjördæmi hversu vonda útreið hann fékk í miðstjórnarkjöri þar. Það stakk mig mest við þennan landsfund. Fulltrúar hér sameinuðust um tvo fulltrúa, annað að norðan og hinn að austan. Hvorugur náði kjöri. Einn spurði mig hverju sætti. Ég er þess fullviss að þar hafi ráðið úrslitum að tengingar hafi vantað á milli frambjóðendanna og stóru svæðanna innan flokksins og ég held að aldur hafi ráðið miklu líka. Bæði voru þau yfir fimmtugt. En svona kjaftshögg fyrir flokkinn hér vekur athygli.

Ég held að Sjálfstæðisflokkurinn í Norðausturkjördæmi standi þó vel að vígi í væntanlegum kosningum. Blær uppstokkunar einkennir listann og það er ferskleiki yfir honum. Ennfremur er öllum ljóst að lykilsvæðin geta vel við unað. Ég held að þau verði að vinna vel fyrir sínu en ættu að geta komið vel standandi frá þessum slag. Þetta verður þeim barátta og þau geta ekki unnið nema berjast eins og ljón. Þau verða að vera sterk heild. Ef þeim auðnast það eru þau sigursveit. Það eru allar forsendur skv. könnunum fyrir góðum sigri.

En það er erfitt að spá um hvernig allt fer að lokum. En ég held áfram að spá og spekúlera úr þeirri góðu fjarlægð sem ég hef sjálfur valið mér og hef gaman af þeim pælingum sem ég set fram. Það er um að gera að vera lifandi í því að skrifa og fara yfir stjórnmálin. Vonandi verður þó lokaspretturinn og líflegur - við kjósendur fáum vonandi gargandi góða stemmningu á þessum blálokum.

Athugasemdir

[Stefán Friðrik Stefánsson, 20.4.2007 kl. 20:36]

Það er ekkert gefið með árangur. Hinsvegar er ljóst skv. könnunum að VG og Sjálfstæðisflokkur eru að bæta við sig fylgi í öllum könnunum sé miðað við kosningarnar 2003 og Framsókn og Samfylking að tapa miklu fylgi. Það er staða mála enn 22 dögum fyrir kosningar. En það er ómögulegt að spá í það nú hvaða stjórn verði eftir kosningar. Annars hef ég verið að minnka stórlega mína pólitísku þátttöku, hef tekið þann pakka og finnst það allt orðið gott. Ég skipti ekki um skoðanir hinsvegar.

[Skafti Elíasson, 20.4.2007 kl. 23:11]

Alveg makalaust hvað þú nennir að blogga..gaman að lesa þó

[Stefán Friðrik Stefánsson, 20.4.2007 kl. 23:13]

Það er lítið mál að blogga sé maður í æfingu og hefur áhuga á því að tjá sig. Ég hef gert þetta í fimm ár. Annars skrifa ég mismikið hvern dag. Þetta eru oftast þrjár til fimm færslur á dag, sjaldan meira. Í dag hef ég skrifað fjórar. En takk fyrir að lesa.

mbk.

[Herdís Sigurjónsdóttir, 20.4.2007 kl. 23:57]

Ég les daglega og ekki hætta ...

Já það verður gaman að taka þátt í baráttunni næstu vikurnar. Ekki eins mikið að gera maður er ekki sjálfur í eldlínunni, en alltaf gaman samt.