Mun Jóhanna afsala sér ráðherrabílnum?

Það vakti mikla athygli þegar að Jóhanna Sigurðardóttir afsalaði sér ráðherrabíl sínum og bílstjóra þegar að hún varð félagsmálaráðherra í júlí 1987. Fram að því hafði ekki tíðkast að ráðherrar afþökkuðu þessi þægindi embættisins og þótti þessi ákvörðun þriðju konunnar sem settist á ráðherrastól í stjórnmálasögu landsins því mjög athyglisverð. Þau sjö ár sem Jóhanna Sigurðardóttir var félagsmálaráðherra var hún því á sínum einkabíl og án bílstjóra.

Nú hefur Jóhanna Sigurðardóttir aftur tekið sæti í ríkisstjórn, eftir þrettán ára fjarveru. Það er að margra mati mikið pólitískt afrek fyrir Jóhönnu eftir allt sem á undan er gengið og fjöldi fólks talar um að tími Jóhönnu sé kominn aftur. Er það ekki undrunarefni, enda hefur Jóhanna gengið í gegnum margt á þessum árum. Sundrungin innan Alþýðuflokksins markaði endalok ráðherraferils hennar og ekki síður Jóns Baldvins og kratanna. En nú eru aðrir tímar.

Það verður athyglisvert að sjá hvort að Jóhanna Sigurðardóttir muni afsala sér ráðherrabílnum og bílstjóranum og gerir hið sama og hún gerði er hún var síðast ráðherra.

Athugasemdir

[Jóhannes Freyr Stefánsson, 28.5.2007 kl. 20:47]

Þú verður nú að afsaka, en hvað fj.. máli skiptir það hvernig Jóhanna fer frá einum stað í annars? Mun áhugaverðara verður að fylgjast með henni færa þennan málaflokk sem hún fer með út úr því miðaldamyrkri sem hann hefur verið í til þessa.

[Jóhannes Freyr Stefánsson, 28.5.2007 kl. 20:48]

Afsakið...þarna átti að standa: einum stað til annars...

[Stefán Friðrik Stefánsson, 28.5.2007 kl. 20:50]

Það er ekkert óeðlilegt að velta þessu fyrir sér. Síðast þegar að Jóhanna var ráðherra afsalaði hún sér bíl og bílstjóra, sem vakti mikla athygli. Það er eðlilegt að velta þessu fyrir sér. Fyrir löngu hefur Jóhönnu verið færðar góðar óskir um gott gengi í sínu ráðuneyti á þessum vef af minni hálfu.