Hrafn Bragason hættir í Hæstarétti

Hrafn Bragason, hæstaréttardómari, hefur óskað eftir lausn úr réttinum. Eins og flestum er kunnugt er Hrafn síðasti dómarinn sem enn sat í réttinum og var skipaður áður en Sjálfstæðisflokkurinn tók við dómsmálaráðuneytinu fyrir sextán árum. Það var Jón Sigurðsson, fyrrum dómsmálaráðherra og seðlabankastjóri, sem skipaði Hrafn í Hæstarétt í september 1987. Hrafn er sonur Braga Sigurjónssonar, fyrrum ráðherra og alþingismanns Alþýðuflokksins.

Frá árinu 1991 hefur Sjálfstæðisflokkurinn haft embætti dómsmálaráðherra. Því hafa Þorsteinn Pálsson, Sólveig Pétursdóttir og Björn Bjarnason, dómsmálaráðherrar frá 1991, skipað nær alla dómara við réttinn, utan þess reyndar að Geir H. Haarde skipaði tvo síðustu hæstaréttardómara vegna þess að Björn Bjarnason vék sæti. Í þeim tilfellum voru Jón Steinar Gunnlaugsson og Hjördís Björk Hákonardóttir skipuð í réttinn.

Það má búast við að fjöldi einstaklinga sæki um dómarasæti nú þegar að eitt slíkt losnar. Það verður fróðlegt að sjá hver muni taka sæti Hrafns.

Hæstaréttardómari óskar lausnar frá embætti

Athugasemdir

[Ásdís Sigurðardóttir, 3.7.2007 kl. 12:29]

Eg rak augun í heimsóknatölurnar hjá þér hérna til vinstri. Þú ert að detta í hálfa milljón drengur. 

[Aðalheiður Ámundadóttir, 3.7.2007 kl. 13:48]

Ég vona að Ragnar Aðalsteinsson sæki um stöðuna, þó ég efist um að hann hafi áhuga. Hann er manna fróðastur um mannréttindi og stjórnskipunarrétt hér á landi að mínu mati. Svo er hann mikill laga passionisti.

Þó væri líka vel að fá aðra konu í Hæstarétt en ég tel þó að ekki eigi að setja kynjakvóta á slíka stofnun. Megi sá hæfasti 'lifa af'.

[Björg K. Sigurðardóttir, 3.7.2007 kl. 14:17]

Það verða örugglega uppi hárværar raddir um að skipa konu enda bara ein kona í réttinum eftir að Guðrún Erlendsdóttir hætti í fyrra.

[Björg K. Sigurðardóttir, 3.7.2007 kl. 14:19]

Í athugasemdinni hér að ofan átti að sjálfsögðu að standa háværar...hefur ekkert með hár að gera

[Stefán Friðrik Stefánsson, 3.7.2007 kl. 14:27]

Takk fyrir kommentin.

Ásdís: Já, það er gott að einhverjir nenna að fylgjast með og lesa. Það er nauðsynlegt að eiga sinn vettvang til að pára á reglulega og þetta hefur gengið vel hér allavega.

Aðalheiður: Verður æsispennandi að sjá hverjir sækja um. Vonandi verður það góður slatti af hæfu fólki og úr mörgum góðum kostum að velja. Eflaust munu margir af þeim sem áður hafa sótt um reyna aftur nú.

Björg: Eflaust munu margar konur sækja um. Það eru reyndar tvær konur í réttinum; Ingibjörg Benediktsdóttir, skipuð af Sólveigu Pétursdóttur árið 2001, og Hjördís Björk Hákonardóttir, skipuð af Geir Haarde árið 2006. Hjördís kom í stað Guðrúnar.

mbk.