Munu Keflvíkingar og Skagamenn slíðra sverðin?

Fáar deilur hafa orðið harðvítugari í sögu íslenskrar knattspyrnu á undanförnum árum en sú sem hefur staðið á milli Skagamanna og Keflvíkinga eftir leik liðanna í vikunni. Enn ganga skotin milli liðanna og forystumanna þeirra - stuðningsmenn þeirra senda hvor öðrum svo tóninn víða. Það verður fróðlegt að sjá hvort að aftur sé snúið í þessari deilu; hvort liðin muni slíðra sverðin og reyna að semja frið í þessum erjum sem hafa staðið.

Stór hluti þessarar deilu var háður í fjölmiðlum. Á fimmtudagskvöldið birtist Guðjón Þórðarson í Kastljósi ásamt Bjarna, syni sínum, og talaði þar hispurslaust um hvernig málið horfði við honum. Þar lét hann Keflvíkinga hafa það óþvegið og síðar um kvöldið svaraði Kristján Guðmundsson, þjálfari Keflvíkinga, af svipuðum krafti í þættinum 14-2 í Ríkissjónvarpinu. Ásakanir, mjög harkalegar, ganga á milli og átökin leynast ekki. Í gær virtist þó aðeins lægja í þessum stormi.

Sögusagnir eru um að Geir Þorsteinsson, formaður KSÍ, hafi reynt að settla málin eftir fjölmiðlahasar fimmtudagskvöldsins. Það er ekki óeðlilegt. Sá hasar sem þar birtist og virtist ætla að fylgja okkur lengur í sumargúrku íslenskra fjölmiðla var ekki beint íslenskri knattspyrnu til sóma. Myndirnar af vettvangi á Skaganum frá þessu atviki og eftirmálum þess eru svartur blettur á íslenskri knattspyrnu. Þetta mál er engum til sóma og það er enginn sigurvegari í þessu máli. Menn eru samt misjafnlega illa skaddaðir eftir það.

Heilt yfir væri það til sóma að þessi lið myndu slíðra sverðin og reyna að bæta stöðuna sem uppi er. Þessi tilgangslausi fjölmiðlahasar er engum til sóma, allra síst þeirri íþrótt sem þessir menn eru að reyna að presentera.

Athugasemdir

[Mummi Guð, 7.7.2007 kl. 20:57]

Besta tillagan sem ég hef heyrt er sú að leikurinn verði dæmdur ógildur og engin stig verða gefin fyrir hann. Þar með hagnast Skagamenn ekki á óheiðarleikanum og þetta verði öðrum til varnaðar ef einhverjir hugsa um að beita viðlíka brögðum til að vinna leiki.

[Óðinn Þórisson, 7.7.2007 kl. 21:29]

Leikurinn er búinn, hann verður ekki endurstekinn eða dæmdur ógildur - þessi úrslit munu standa - það er alveg klárt mál.

[Grímur Kjartansson, 8.7.2007 kl. 14:43]

Ég held að ÍA ætti að byrja aftur og koma með afsökunarbeiðni í stað þessarar ásökunarbeiðni sem þeir birtu
sem mest fór í að reyna finna eitthvað að Keflavík. 
Þetta þarf ekki að vera flókið. "Bjarni ætlaði ekki að skora við biðjumst afsökunar á því og okkur þykir leitt hvernig atvik þróuðist í kjölfarið á því."