Atvinnumótmælendurnir mættir á Grundartanga

Það er alveg kostulegt að fylgjast með þessum mótmælendum sem kenna sig við Saving Iceland. Þau hafa vakið athygli fyrir að fjölmenna í Kringluna og blokkerað Snorrabraut á laugardegi um hásumar. Nú eru þeir mættir við álverið á Grundartanga og eru sennilega að mótmæla því. Þeir eru þó seint mættir til mótmæla, enda hefur álverið starfað þar árum saman og er ekki á leið eitt né neitt.

Það er sennilega tímasóun að velta því fyrir sér hvernig þetta fólk nenni þessum mótmælum, en það er samt ekki fjarri því að hugurinn leiti í þær áttir. Þetta er að upplagi að því er virðist vera atvinnumótmælendur um víðar grundir sem hafa mikla þörf á að minna á sig víða um lendur. Það er greinilegt að ekki aðeins ætla menn að mótmæla í borginni, kannski er verið að fara um landið. Það verður fróðlegt að sjá hvort að mótmælendurnir fara austur til að mótmæla álveri sem er orðin staðreynd.

Það er sjálfsagt að hver og einn hafi rétt til að tjá skoðanir sínar og mótmæla. Það er samt erfitt að sjá hverju þetta fólk ætlar í raun og veru að áorka með þessum mótmælum ef verið er að mótmæla við álver sem eru löngu orðin staðreynd og verða ekki færð til. Margir velta því fyrir sér hvernig fólk nenni að fara landa á milli til að stunda þessa iðju, fólk sem þekkir ekki mikið til íslenskra aðstæðna og stöðu mála. Mér finnst það kostulegt að heyra fréttir af því að fólk klifri upp í byggingakrana með þessum hætti á Grundartanga, rétt eins og gert hefur verið fyrir austan síðustu árin með ansi misheppnuðum árangri fyrir þetta fólk.

Það verður fróðlegt að sjá hvar og hvernig verður mótmælt næst á hringferð þessara atvinnumótmælenda. Sérstaklega fróðlegt að sjá hvort liðið fer austur.

Mótmælendur hlekkja sig við tæki

Athugasemdir

[Óðinn Þórisson, 18.7.2007 kl. 18:23]

Stefán ef þetta eru atvinnumótmælendur þá er spurning hversvegna erum við að hleypa þessu fólki inn í landið.
Þurfum við á ferðamönnum að halda sem hlekkja sig við vélar og fer í kröfugöngur sem ekki hefur verið fengið leyfi fyrir.

[FreedomFries, 18.7.2007 kl. 18:50]

"Það er samt erfitt að sjá hverju þetta fólk ætlar í raun og veru að áorka með þessum mótmælum ef verið er að mótmæla við álver sem eru löngu orðin staðreynd og verða ekki færð til. Margir velta því fyrir sér hvernig fólk nenni að fara landa á milli til að stunda þessa iðju..."

Ætli það sé ekki sami ásetningur og sem fær fólk til að vera að blogga og úttala sig á opinberum vettvangi um málefni líðandi stundar? Við höfum mismunandi aðferðir til að láta skoðun okkar í ljós og reyna að hafa áhrif á gang stjórn- og félagsmála, eða skoðanir samferðarmanna okkar. Sumt fólk fer í úlpu og hangir utan í vinnuvélum, sumir okkar (ég meðtalinn;) sitjum á rassinum og pikkum á tölvulyklaborð. Ég held að við Stefán eigum meira sameiginlegt með þessu fólki en hann vill viðurkenna!

Svo er ég sammála Árna - það er fáránlegt að tala um "atvinnumótmælendur" - því þetta fólk hefur ekki atvinnu af mótmælum. Og þó svo væri, væri það verra en að hafa aðra atvinnu sem snýst um að hafa áhrif á þjóðmálaumræðuna?

Bestu kveðjur! Magnús

[Stefán Friðrik Stefánsson, 18.7.2007 kl. 19:34]

Þakka kommentin.

Ég kalla það atvinnumótmælendur sem fara um landið og mótmæla með þessum hætti. Það má vel vera að aðrir kalli það eitthvað annað.

Ég skal fúslega viðurkenna að ég tjái skoðanir mínar með þeim hætti sem ég vel hér. Hinsvegar þrengi ég skoðunum mínum ekki upp á neinn. Fólk kemur hingað sjálfviljugt.

Ég er ansi hræddur um að mér yrði stungið í steininn færi ég og legðist niður á Glerárgötu á gatnamótum við leiðina hér upp í Þórunnarstrætið (með borða á mér) með því að mótmæla.

Ég læt mér nægja að tjá mig hér.

mbk.

[Stefán Friðrik Stefánsson, 18.7.2007 kl. 19:41]

Ég hef tekið þátt í skipulögðum mótmælum gegn valdhöfum í Kína, tveim reyndar. Það voru mjög góðir tímar, sérstaklega þau seinni. Þau voru þó bæði skipulögð mjög vel af öllum ungliðahreyfingum flokkanna og auglýst og fengið var leyfi fyrir þeim. Það kalla ég heiðarleg mótmæli. Hinsvegar myndi ég aldrei taka þátt í mótmælum af þessu tagi. Mér finnst það sérstaklega ábyrgðarlaust að blokkera lykilumferðargötu á borð við Snorrabraut eins og gert var um daginn.

[Júlíus Sigurþórsson, 18.7.2007 kl. 23:16]

Ef fréttamenn og myndavélarnar héldu sig annarstaðar og löggan léti ekki sjá sig, þá myndi þetta sjálfkrafa hætta.

Bara láta þá eiga sig og þá finna þau sér annað áhugamál sem verður til þess að þau geti horft á sjálfa sig í sjónvarpi og lesa um sig í blöðum.