Upptaka af árásinni á Eið Smára sýnd

Það var athyglisvert að sjá upptöku af því er ráðist var að Eiði Smára Guðjohnsen, landsliðsfyrirliða í knattspyrnu, í kvöldfréttum Sjónvarps og Kastljósinu í kvöld. Það er merkilegt að sjá slíkt, en á okkar tímum eru myndsímar mikið notaðir og hægt að taka upp ýmislegt sem gerist jafnvel hratt. Í þessari upptöku sást vel að fólk þurfti að ganga á milli til að skilja að Eið Smára og þann sem sló hann og var nokkur hasar yfir öllu.

Það er alveg ljóst að ofbeldið er orðið mikið í miðborg Reykjavíkur um helgarnætur. Það sést bara vel af fréttaflutningi en það eru þó ekki allar árásir og slagsmál þar sem enda sem aðalfrétt í fjölmiðlum. Hefur maður oft heyrt að meiri harka sé í slagsmálum neðarlega á Laugaveginum og í Austurstræti og við Lækjartorg. Margar sögur ganga af ástandinu þar og eflaust eiga sér slagsmál stað víða á svæðinu og þetta er fjarri því einstæð saga sem birtist.

Það að um sé að ræða Eið Smára gerir það að verkum að þetta verður aðalfrétt, enda er Eiður Smári mjög þekktur knattspyrnumaður og er jafnan mikið í fréttum. Það er ekki mikið um að ráðist sé að þekktu fólki er það er að skemmta sér. Merkilegast við þetta allt var þó að sjá að atburðarásin væri til í myndformi en myndsímarnir koma sér oft vel.

Veist að Eiði Smára

Athugasemdir

[Kolbrún Baldursdóttir, 31.7.2007 kl. 22:38]

Allt ofbeldi er ömurlegt en að ráðast á einhvern sem hefur verið stolt þjóðarinnar svo lengi sem Eiður Smári vekur upp enn frekari spurningar í sambandi við hvernig mál eru að þróast. Sá eða þeir sem sekir eru um þessa árás hljóta að vera verulega svekktir út í sjálfa sig víst þeir telja það vera upphefð að ráðast á Eið.  Kannski finnst þeim spennandi að geta hreykt sér síðar meir af þessu atferli sínu.

Annars fannst mér myndbandið  óskýrt. Líklega á eftir að rannsaka þetta allt nánar. Svo virtist samt sem Eiður standi þarna og reynir að verjast og einhverjir aðrir að hjálpa honum. Enn aðrir stóðu hjá og voru í hróka samræðum.

Næturlífið í Reykjavík er nokkuð skrautlegt, alla vega á köflum.
Mér líst hins vegar alls ekki á að ekki skulu vera lögreglumenn á gangi um borgina. Hvernig á maður að bera sig að ef ráðist er á mann. Þá er eina leiðin að fara að leita að næsta lögreglubíl eða vonast til að atvikið hafi náðst á myndband. Hvað sem þessu líður þá mun árásin vera yfirstaðin og ekki víst að maður sér fær uml að leita að lögreglunni ef maður lifir þá árásiná af á annað borð.
Svo mikið er víst að lögreglan er hrædd og kýs þess vegna að sitja inn í bíl fremur en að ganga um götur borgarinnar.

[Halldór Sigurðsson, 1.8.2007 kl. 22:46]

En á móti - þá er þetta atvinnuskapandi

[Geir Ágústsson, 1.8.2007 kl. 22:59]

Löggan er of upptekin við að drepa í sígarettum hjá fólki sem reykir innandyra og hella niður áfengi þeirra sem drekka úr glasi utandyra.