Mun KR bjarga sér frá falli?

Það hlýtur að vera gleði í Vesturbænum á þessu kvöldi eftir að KR tókst að næla sér í þrjú stig í Víkinni með sigri á Víkingi og komast úr fallsætinu í deildinni. Sá er nú kaleikur Framara sem eru vægast sagt í vondum málum, rétt eins og KR reyndar. Þessi sigur er KR mikilvægur á þessum kafla deildarinnar og færir þeim vonir um að deildarsætið verði varið. Stutt er síðan að Logi Ólafsson tók við þjálfun KR-inga og binda menn í Frostaskjólinu vonir um að hann muni bjarga liðinu frá falli.

KR hefur alla tíð verið stórveldi í knattspyrnusögu Íslendinga og það er ekki mikil hefð hjá þeim fyrir harðri baráttu um deildarsæti og árangur sumarsins er auðvitað þeim gríðarleg vonbrigði. Þegar að litið er reyndar á þjálfarasöguna undanfarin ár kemur vel í ljós hversu brokkgengt hefur verið yfir liðinu og áföll loðað við þó að þetta sumar sé að verða hið versta í áratugi fyrir KR-inga þar sem hrein barátta um úrvalsdeildarsætið er í spilunum. Þó að KR hafi mistekist að ná Íslandsmeistaratitli í yfir þrjá áratugi er svona botnbarátta þeim mikil vonbrigði.

Það er stutt síðan að Teiti Þórðarsyni var sagt upp störfum. Þá hafði KR verið komið í botnlaus vandræði og tap í Kópavogi fyrir nýliðum HK var í senn sögulegt, skaðlegt og auðvitað vandræðalegt fyrir gamalt stórveldi í boltanum. Það hafði enda ekki gerst frá árinu 1975 að KR-ingar töpuðu fyrir nýliðum í deildinni, en það sumar tapaði KR fyrir FH 0-1. Þá var mörgum KR-ingum nóg boðið. Teitur átti langan samning við félagið og væntanlega fengið vænan starfslokasamning í staðinn. Logi á erfitt verkefni fyrir höndum. Þó að sigur kvöldsins sé mikilvægur áfangi fyrir KR er öllum ljóst að björninn er ekki unninn á þessu sumri. Liðið er enn í hættu, þó að menn andi væntanlega aðeins léttar í Vesturbænum.

Af Akureyrarliðunum er það helst að frétta að þau eru ekki beint á grænni grein. KA og Þór eru í níunda og tíunda sæti í deildinni, KA er með 15 en Þór 13. Þetta er því ekki beint gullaldarsumar í boltanum hér. Þetta er auðvitað skelfilega slæm staða og algjörlega óviðunandi. Það er vonandi að vel muni ganga að ári, en það blasir við öllum að það er engan veginn ásættanlegt að Akureyringar eigi ekki úrvalsdeildarlið og hafi ekki átt um þetta langt skeið sem raun ber vitni.

KR landaði sigri - toppliðin náðu aðeins stigi á heimavelli

Athugasemdir

[Hlynur Davíð Stefánsson (IP-tala skráð) 17.8.2007 kl. 01:36]

" Þó að KR hafi mistekist að ná Íslandsmeistaratitli í yfir þrjá áratugi"

Hvar varst þú árin 1999, 2000, 2002 og 2003?

[Stefán Friðrik Stefánsson, 17.8.2007 kl. 01:40]

KR vann ekki slíkan titil í 31 ár, 1968-1999. Það er í yfir þrjá áratugi. Kannski ekki miklu en samt. Ætlaði ekki að stuða KR-inga, en það má kannski misskilja orðalagið.

mbk.

[Egill Óskarsson, 17.8.2007 kl. 02:14]

Teitur var nú rekin ca mánuði eftir HK leikinn svo ég taki nú aðeins upp hanskann fyrir okkur kópavogsmenn:D

[Hlynur Davíð Stefánsson (IP-tala skráð) 17.8.2007 kl. 12:13]

Jájá ég þóttist vita að þú værir að tala um þau 31 ár. Það var leiðinleg eyðimerkurganga en ég missti af stórum hluta hennar. En þetta var bara vinsamleg athugasemd, ekki illa meint.

[Stefán Friðrik Stefánsson, 17.8.2007 kl. 14:52]

Jamm Egill, Teitur fékk fleiri sénsa eftir þennan leik en ég held að þetta tap hafi verið það sem í raun réði miklu í ákvörðuninni, þó fleiri sénsar hafi verið gefnir. Heilt yfir er þetta slæmt ár hjá KR, svo sannarlega.

Hlynur: Já, tók þessu ekkert illa. Bara fínt að fá komment. Gott að fá þig sem bloggvin.

mbk.

[Egill Óskarsson, 18.8.2007 kl. 03:49]

Ég held að það sem hafi ráðið hjá stjórn KR-klúbbsins hafi ekki tengst neinum einum úrslitum liðsins undir stjórn Teits. Liðið var ekki bara að tapa stigum undir hans stjórn heldur var þetta stjörnulið að spila alveg afskaplega lélegan fótbolta. 

Stuðningsmenn KR-inga voru farnir að ræða um það að losna þyrfti við Teit áður en kom að leiknum við HK. Það má svo sem vel vera að hann hafi skipt einhverju máli í þessari ákvörðun en við HK-ingar höfum einfaldlega of mikið stolt til að geta sætt okkur við svoleiðis söguskoðanir

En svona er nú fótboltinn. Menn halda sig ekkert alltaf við rökhyggjuna þar. Ég sem gamall KA-maður vona nottla að gulbláir verði komnir í baráttu við hlið HK-inga í efstu deild von bráðar! 

[Stefán Friðrik Stefánsson, 20.8.2007 kl. 21:19]

Fínar pælingar Egill. Já, vonum svo sannarlega að gul-bláir verði bráðum komnir í "rétta" deild! :)

mbk.