Frábærir tónleikar á Miklatúni

Ég hef verið að hlusta á tónleikana á Miklatúni á Rás 2 núna í kvöld. Þar er saman kominn mikill mannfjöldi og skemmtir sér vel. Virðist vera um að ræða fjölmennasta viðburð á Miklatúni til þessa, svæði sem hentar mjög vel til tónleika af þessu tagi, eins og sást á tónleikunum með Sigurrós fyrir ári sem voru stórtónlistarviðburður og vel úr garði gerðir.

Þetta er mikil tónlistarhelgi. Í gær voru góðir afmælistónleikar Kaupþings og tónleikar kvöldsins eru ekki mikið síðri, svo sannarlega. Það er langt síðan að tveir svo veglegir tónleikar eru á sömu helginni. Í þessum skrifuðu orðum er Mannakorn að fara á kostum við að flytja nokkur af sínum bestu lögum. Maggi Eiríks, Pálmi og Ellen virðast þar vera í sínu besta formi. Megas var alveg frábær áðan er hann tók sitt prógramm. Megas virðist sífellt verða betri með árunum en nýjasta platan hans, Frágangur, er algjörlega brilljant. Einfalt mál það.

Að auki voru Mínus, Ampop, Sprengjuhöllin, Eivör og Á móti sól í toppformi og aldrei klikkar heldur Pétur Ben, sem er með betri yngri tónlistarmönnunum í bransanum. Heilt yfir var þetta mögnuð tónlistarveisla og svo sannarlega frábært fyrir okkur sem erum ekki stödd í Reykjavík að geta þó fylgst með í gegnum útvarpið. Svo vonandi fáum við að sjá þessa tónlistarveislu í Sjónvarpinu fljótlega.

Mannhaf á miðborgarsvæðinu

Athugasemdir

[Haraldur Haraldsson, 19.8.2007 kl. 00:06]

Svona er þetta hægt Stefán allur þessi fjöldi um 60 þus mans og allt gekk vel alvega ennþá/Halli gamli

[Jens Guð, 19.8.2007 kl. 00:17]

  Ég tek undir að hljómleikarnir á Miklatúni tókust einstaklega vel.  Allar hljómsveitirnar voru í virkilega góðu formi.  Blandan var vel heppnuð.  Ég hef til að mynda ekki smekk fyrir Á móti sól en hafði umburðarlyndi fyrir þeim í kvöld vegna þess að allt hitt var svo flott.  Bara það að fá Eivör og Megas í sama hljómleikapakka er villtur draumur.  Lokalag Eivarar,  Nú brennur tú i mér,  var gæsahúðarsæla.  Magnaður flutningur frábærrar söngkonu og frábærrar tónlistarkonu.  Bandið hennar var dúndur.

  Megas hefur sjaldan verið með betra band.  Hann er í betra formi en ég man eftir.  Mannakorn líka glæsilegt,  Sprengjuhöllin fersk og hress... Ég er afskaplega ánægður með kvöldið.  Ekki síst eftir lítilfjörlega afgreiðslu á músík af diskum eða úr tölvum á hljómleikunum í gær á Laugardalsvelli.   

[Óttarr Makuch, 19.8.2007 kl. 15:26]

Ekki get ég sagt að þessir tónleikari hafi verið frábærir.  Vissulega voru þarna flinkir tónlistamenn á ferð.  Við fórum þarna í gærkvöldi og mér þótti ekki mikið fara fyrir skipulagningu tónleikanna.  Ef maður ber þessa tónleika saman við Kaupþings tónleikanna.   Kynnirinn/tónleikastjórinn sem sá um tónleikanna á Miklatúni var hreinlega viðvaningur miðað við framistöðu Páls Óskars á Laugardalsvellinum.  Það leið einnig allt of langur tími á milli atriða svo á skalanum 1-10 get ég ekki gefið þessum tónleikum nema 6 á móti gat ég gefið tónleikunum á Laugardalsvellinum 9 en þeir hefðu fengið 10 ef Stuðmenn hefðu ekki klúðrað sínum málum eins og þeir gerðu.

[Stefán Friðrik Stefánsson, 20.8.2007 kl. 21:12]

Takk fyrir góð komment.

Sérstaklega sammála hugleiðingum Jens um þessa tónleika. Þetta var flott tónlistarveisla heyrt úr útvarpinu allavega.

Sammála þér Óttar með kynnirinn. Vantaði vissa stemmningu þar. Atriðin voru góð, misgóð þó með vissum lykiltoppum. En ég var vissulega ekki á staðnum. Heyrði þetta bara í útvarpinu. Heyrt þaðan var þetta gaman, hefur eflaust verið önnur upplifun að vera á staðnum jafnvel.

mbk.