FH styrkir stöðu sína - mun KR falla í haust?

Það er ekki hægt að segja annað en að leikur KR og FH í Hafnarfirði hafi markað meginlínur mun betur í úrvalsdeildinni en áður. FH burstaði KR og lék við hvern sinn fingur og Ásgeir var með þrennu - fyrra liðið komið með aðra höndina á bikarinn og hið seinna að síga aftur niður og horfist jafnvel í augu við fall úr úrvalsdeildinni. Það hlýtur að vera dimmt yfir vesturbænum á þessu kvöldi og vonir KR á að halda deildarsætinu minnka enn.

KR er í þeirri stöðu nú að spilað er upp á hvert stig. Þar eru eftir leikir við HK, Fram og Fylki. Kannski verður leikur KR og Fram síðla septembermánaðar leikur upp á hvort Reykjavíkurstórveldanna muni jafnvel falla. Hver veit. Mér finnst mjög merkilegt að svona skuli komið fyrir KR. Efniviðurinn var í lið sem myndi spila upp á titla en þrautaganga hefur það orðið í sumar. Nokkuð síðan að Teitur var rekinn frá klúbbnum og nú er það Loga að reyna að bjarga hlutunum.

Það mun kannski bjarga KR er á hólminn kemur að aðeins eitt lið falli, hver veit. En leikur kvöldsins sýndi vel andstæðurnar á liðunum, lánleysi KR og sigurþorsta FH. Enda sýnist mér að bikarinn fari enn eitt árið til Hafnarfjarðar. Vonir þeirra aukast altént við þetta. Nú er það næsta verkefni KR að fara til Kópavogs og spila við HK. Það ætti að verða áhugaverður leikur. HK vann KR fyrr í sumar með sögulegum hætti og eflaust vill Vesturbæjarveldið forna hefna þeirra ófara.

Staða KR er umhugsunarverð í boltanum núna. Þetta tap í kvöld sýnir vel hversu illa komið er fyrir liðinu og hversu hörð baráttan verður fyrir það á næstu vikum. Það er ekki nema von að fólk sé farið að spyrja sig hinnar stóru spurningar hvort KR muni falla í haust. Það verða svo sannarlega nöpur þáttaskil fyrir fornt íþróttaveldi verði það örlög þess á þessu boltasumri.

Boltinn hér á Akureyri.... jamm veit ekki hvað skal segja. Þvílík sorgarsaga. Bæði liðin okkar í tómu tjóni. Þór er með 16 stig og KA með 15 og næstneðst í fyrstu deild. Afleitt, gjörsamlega afleitt. KA spilar við Reyni í Sandgerði upp á hvort liðið falli á laugardag. Fjarri því það sem að var stefnt og Þór er á svipuðum slóðum. Vona að næsta sumar verði okkur betra hér.

FH, Fylkir og ÍA höfðu sigur

Athugasemdir

[Haraldur Haraldsson, 31.8.2007 kl. 00:26]

þetta verður hart  og það kanski vel /Stefán þu talar um störveldin tvö Fram og KR  en Fram er buið að falla/og nu vil eg að KR  helst!!! ,eða Vikingur falli/Halli gamli Framari!!!!

[Þórður Gunnarsson, 31.8.2007 kl. 12:01]

Þetta hraun yfir KR þarf að taka enda, Stefán.

[Hlynur Davíð Stefánsson (IP-tala skráð) 31.8.2007 kl. 13:23]

Það eru Binnamenn sem þurfa að koma í heimsókn til okkar, þeir eru á útivelli. En þeir hafa fengið 1 stig á útivelli í ár. KR vinnur þann leik að öllum líkindum. Víkingur eða HK fellur.

[Stefán Friðrik Stefánsson, 31.8.2007 kl. 14:21]

Takk fyrir kommentin.

Halli: Þetta verður spennandi og ég ætla rétt að vona það að úrslitin ráðist í lokaumferðinni. Verði fjör og gaman.

Doddi: Er ég að hrauna yfir KR? Eru þetta ekki eðlilegar pælingar eftir 5-1 tap KR? Hvað hugsa KR-ingar yfir stöðunni? Heldurðu virkilega að það séu ekki vonbrigði í þeirra herbúðum og menn hafi viljað hlutina öðruvísi. Þetta er ekki ákjósanleg staða, en það er óumflýjanlegt að talað og skrifað sé um hana þegar að þrjár umferðir eru eftir. Ég skrifa með svipuðum hætti um mitt eigið lið, KA. Ég er hundfúll yfir stöðu þess. Það er að leika um deildarsætið sitt þessa dagana. Held að staða KR og KA sé mjög svipuð. Ég er alveg heiðarlegur yfir mati mínu á mínu liði og er ekkert að fegra stöðuna. Við erum í tómu tjóni hér. Það er enda staðan, alveg óþarfi að mála það rauðum litum. Ég ætla ekkert að mála stöðuna skárr upp en hún lítur út fyrir að vera. Það er vond staða hér og það er ekki síður þannig í vesturbænum.

Hlynur: Ég trúi því að þegar að á hólminn kemur muni KR redda sér. Það væri skaði ef þeir af öllum þessum liðum myndu taka skellinn. En það er mikil óvissa yfir þessu en vonandi mun spennan haldast til enda.

mbk.