Þórlindur kjörinn formaður SUS

Þórlindur Kjartansson var í dag kjörinn formaður SUS á sambandsþingi austur á Seyðisfirði með yfir 90% greiddra atkvæða. Hafði hann einn tilkynnt framboð og hlýtur afgerandi stuðning til verka. Teitur Björn Einarsson var kjörinn fyrsti varaformaður SUS sömuleiðis með þorra atkvæða. Báðir hafa verið virkir í ungliðastarfinu í fjöldamörg ár og þeir eru þekktir fyrir að vinna vel og af krafti.

Vil ég óska Þórlindi og Teiti Birni til hamingju með kjörið á þinginu og ennfremur óska þeim góðs í verkum fyrir SUS næstu tvö árin. Sömuleiðis vil ég óska nýrri stjórn SUS sem kjörin var á sambandsþinginu heilla í verkum og vona að þau vinni vel fyrir ungliðahreyfinguna á starfstímanum. Framundan er vonandi öflug vinna milli kosninga, en sá tími skiptir ekki síður máli en hefur verið síðasta starfstímabil þar sem fram fóru tvær kosningar.

Þetta SUS-þing markar endalok virkrar þátttöku minnar í ungliðahreyfingu Sjálfstæðisflokksins. Ég ákvað fyrir margt löngu að gefa ekki kost á mér aftur í stjórn SUS og hætta, allavega um skeið, virku starfi fyrir Sjálfstæðisflokkinn og horfa í aðrar áttir. Ég hef átt mjög góðan tíma í stjórninni og verið mjög virkur í starfinu á þeim tveim kjörtímabilum sem ég hef átt þar sæti. Var ég allan þennan tíma búsettur á Akureyri og það eru fá dæmi á þessum árum um að menn hafi sinnt stjórnarsetu úr slíkri fjarlægð.

Fyrst og fremst vil ég þakka öllum þeim sem ég sat með í stjórn SUS á þessum árum og voru virkir í að skrifa á vef SUS á ritstjóratíma mínum hjá sus.is kærlega fyrir samstarfið. Þetta var virkilega ánægjulegur tími og ég vil þakka fyrir vináttu allra þeirra sem ég hef unnið með á þessu nokkuð langa skeiði sem ég hef verið virkur í ungliðastarfinu með einum eða öðrum hætti. Þetta hafa verið öflug og góð ár - umfram allt skemmtileg.

Ég vil enn og aftur óska nýrri stjórn góðs í þeim verkum sem framundan eru. Nýjir forystumenn njóta greinilega mikils trausts þingfulltrúa á sambandsþinginu og ég lýsi yfir ánægju minni með kjör þeirra. Bind miklar vonir við verk þeirra og nýrrar stjórnar.

Þórlindur Kjartansson nýkjörinn formaður SUS

Athugasemdir

[Fannar frá Rifi, 17.9.2007 kl. 10:20]

Þá er vont að missa þig úr ungliðastarfinu. Góðum mönnum fylgja góð verk hvar sem þeir fara, hvort sem það er í stjórnmálum eða annarsstaðar.  

[Stefán Friðrik Stefánsson, 17.9.2007 kl. 11:55]

Takk fyrir kommentin.

Fannar: Takk kærlega fyrir góð orð. Þetta hafa verið skemmtileg ár og virkilega gaman að taka þátt. Ég ætla að vera mjög virkur að skrifa og taka þátt í pólitík með einum hætti eða öðrum. Fínt samt að breyta aðeins til. Það hefur verið mjög gaman að kynnast í starfinu og við eigum eftir að hittast hressir á vettvangi flokksins á næstu árum.

Árni: Þetta var orðið mjög gott. Ég hafði verið í stjórn í nokkur ár, verið formaður hér og gegnt ýmsum trúnaðarstörfum. Það er ekkert við það að bæta í sjálfu sér. Mér fannst þetta réttast núna og ég sé ekki eftir neinu. Það er ágætt að gefa öðrum tækifæri þarna núna.

[Stefán Friðrik Stefánsson, 17.9.2007 kl. 15:06]

Takk Andri minn fyrir góð orð. Ég er auðvitað brjálæðislega pólitískur, algjörlega í gegn. Verð alltaf mjög pólitískur. Alveg einfalt mál. Vefurinn verður vel nýttur og ég ætla mér að vera áberandi með einum hætti eða öðrum. Tíminn í ungliðastarfinu er hinsvegar búinn, en það er ekki þar með sagt að ég sé hættur að spá í pólitík. Því hætti ég aldrei sko. :)

mbk.