Róbert Árni hafði 335 stelpur á skrá

Það er ekki undrunarefni að fólki sé brugðið yfir þeirri staðreynd að Róbert Árni Hreiðarsson, lögmaður, sem hefur verið dæmdur í þriggja ára fangelsi fyrir kynferðisbrot, hafði í fórum sínum minnisbók með nöfnum, netföngum og símanúmerum 335 stúlkna. Það fannst í húsleit á heimili hans fyrir ári og er eflaust eitt af mikilvægustu sönnunargögnunum gegn honum í þessu máli.

Ég skrifaði um þetta mál, fannst það rétt þá, enda dómur fallinn í málinu og staða Róberts Árna breyst samhliða því. Þetta mál er sérstaklega alvarlegt í ljósi þess að Róbert Árni var lögmaður og hafði allt annan sess í samfélaginu en margir þeirra sem hafa fengið dóm á sig af þessu tagi. Mörgum hefur þótt dómurinn þungur, en það er varla hægt að taka undir það með tilliti til stöðu mannsins. Þegar allt er tekið saman er þetta eðlileg niðurstaða málsins og greinilegt að fólki er víða brugðið, sérstaklega öðrum lögmönnum.

MSN virðist hafa leikið lykilhlutverk í þessu máli, en í gegnum það komst viðkomandi maður í tengsl við stelpurnar og þóttist vera, eins og ég sagði í gær, 17 ára vöðvastæltur gaur með aflitað hár. MSN er að mörgu leyti töfratæki á netinu, þægilegt til samskipta og gagnlegt að mörgu leyti til að ræða við fólk. En það er hægt að misnota mjög illa. Þess hafa sést merki í málum erlendis og hérna heima líka. Kompás lagði gildru fyrir menn sem lokkuðu til sín unglinga eða jafnvel hreinlega börn og niðurstaðan út úr þeirri rannsókn þeirra var sláandi og flestir muna þá þætti.

Þetta er auðvitað sorglegt mál en það er sláandi líka. Í gegnum allt sést vel útsjónarsemi viðkomandi manns og það hversu hörð þessi mál eru jafnan. Það er auðvitað sjúkt að lögmenn standi í svona iðju og þetta opnar óhugnanlega sýn vissulega, en það þarf að tala hreint út um svona mál. Þetta er gríðarleg ógn og hætturnar leynast víða.

Athugasemdir

[Ester Sveinbjarnardóttir, 28.9.2007 kl. 00:25]

Það jákvæða í þessu er þó það að menn eru látnir svara til saka í stað þess að loka augunum fyrir brotunum eins og virðist hafa tíðkast í gegnum árin.

[Brynjar Hólm Bjarnason, 28.9.2007 kl. 07:44]

Þungur dómur! Ekki finnst mér þetta þungur dómur. hann vissi nákvæmlega hvað hann var að gera, og einnig hvaða dóm hann gat búist við þar sem hann var jafnframt að verja kynferðisofbeldismenn. Það var sagt að Árni Johnsen hafi fengið jafn háan dóm og raun varð, vegna stöðu hans og þess að hann átti að vita hvaða viðurlög voru við því sem hann gerði. Lögfræðingur ætti að vita enn betur og hann á að vera dæmdur þyngstu refsingu.

[Ellen E (IP-tala skráð) 28.9.2007 kl. 09:48]

Ég er hjartanlega sammála þér. Þetta er hreint með ólíkindum. Ég á sjálf 3 dætur og maður fær alveg hnút í magann að hugsa að í framtíð þeirra geta leynst ýmsar hættur á vegi þeirra. Fólk sem maður gæti meira að segja hugsanlega litið upp til og treyst. Með nöfn á yfir 300 stelpum......hvað margar af þeim er hann búin að misnota??? ég spyr??

[Gísli Baldvinsson (IP-tala skráð) 28.9.2007 kl. 11:36]

Stúlkur eru ekki einungis í hættu á MSN. Í raun eru allir auðtrúa einstaklingar í hættu á þessu rafsvæði. Dæmi er um að sviknir hafa verið peningar út úr fólki og MSN er að verða eitt stærsta vændistorg landsins. Minni á að vændi er ekki refsivert hér á landi.

Upplýsingar og fræðsla um spjallrásir og hættur á þeim er nauðsyn. Slíkt efni er ekki til sem gagnast og fæst jafnvel ekki kynnt í skólakerfinu.

[Örvar Þór Kristjánsson, 28.9.2007 kl. 12:38]

Ótrúlegt.

Þessi dómur mætti þess vegna vera þyngri enda ótrúlega ósvífin brot af yfirlögðu ráði.  Fólki er víða brugðið en öll þessi umræða og umfjöllun hefur visst forvarnargildi.  Foreldrar/forráðamenn kynna sér ef til vill betur þessa samskiptatækni ( MSN ) og þær hættur sem þar geta leynst.

[Stefán Friðrik Stefánsson, 28.9.2007 kl. 14:52]

Þakka kommentin og hugleiðingarnar.

Sérstaklega þakka ég Gísla fyrir góð orð um MSN. Þetta eru orð að sönnu og verðugt verkefni fyrir foreldra að fylgjast með MSN-notkun barna sinna (undir átján ára aldri allavega).

mbk.

[Þórður Vilberg Guðmundsson, 28.9.2007 kl. 18:25]

Sæll Stebbi

Nú ætla ég ekki að verja það sem maðurinn gerði, en finnst þér virkilega skipta máli hvort maðurinn sé lögfræingur eða ekki. í raun er það mín skoðun að það skipti akkúrat engu hvaða stöðu hann gegnir. Þó svo að þetta hefði verið fiskverkamaður frá Súðavík, ætti dómurinn að vera sá sami.

Svo má deila um það hvort dómurinn sé of vægur, en það á ekki að ræða það út frá stöðu viðkomandi sakbornings

kv. 

[Stefán Friðrik Stefánsson, 28.9.2007 kl. 18:31]

Sæll Doddi

Öll eru svona mál skelfileg, hver á sinn hátt. Það að löglærður maður hafi gerst sekur um svona verknað er nýmæli hér á landi. Það er sláandi í sjálfu sér. Skelfilegt eitt og sér. Það skiptir máli. En ég er ekki talsmaður þess að dómar fyrir kynferðisafbrot verði vægari og tel því dóminn hæfilegan, en starfi mannsins hlýtur að skipta máli í þessum efnum sérstaklega, enda hefur dómur landsmanna yfir manninum í sjálfu sér verið mjög þungur.

mbk.

[Stefán Friðrik Stefánsson, 28.9.2007 kl. 23:48]

Þessi rangtúlkun þín á orðum mínum Árni er fyrir neðan allar hellur. Ég get ekki sagt annað. Það er ekki þér sæmandi að tala svona.

Sem lögmaður á viðkomandi maður að gera sér betri grein fyrir eðli og afleiðingum gjörða sinna. Sem lögmaður kemst hann líka í aðstöðu sem margir afbrotamenn geta ekki komist, hann varði kynferðisafbrotamenn meðan að mál hans sjálfs var fyrir dómi og hafði aðkomu að þolendum kynferðisofbeldis í Barnastofu í þessum málum. Svona mætti lengi telja. Þetta er skelfilegt mál og staða mannsins sem lögmanns er sláandi. Stend við þau orð og tek því undir ummæli Atla Gíslasonar, lögmanns og alþingismanns, í vikunni t.d. og formanns Lögmannafélags Íslands.

Það að segja að ég sé með þessu orðavali að tala um að réttlætanlegra að einstaklingar úr öðrum stéttum standi að kynferðisafbrotum er svo ógeðfellt orðalag af þinni hálfu að það er ekki svaravert og þér til skammar.

[Kristín Björg Þorsteinsdóttir, 29.9.2007 kl. 14:54]

MSN kerfið er brilliant samskiptatækið en þetta sýnir enn og aftur hversu nauðsynlegt er fyrir foreldra og forráðamenn að brýna fyrir börum sínum að vera varkár. Við verðum að fylgjast náið með við hverja krakkarnir eru að hafa samskipti og setja þeim strangar reglur.

Reglurnar á mínu heimili er sú að þú mátt aldrei vera í sambandi við neinn sem þú hefur ekki hitt augliti til auglitis.

Það kom t.d. upp leiðinda mál í bekk annarar dóttur minnar. Til að koma í veg fyrir einelti og að þær væru að sýna hverri annari dónaskap og leiðindi þá settum við þær í MSN bann sín á milli og það var virt af öllum

[Stefán Friðrik Stefánsson, 29.9.2007 kl. 14:58]

Takk kærlega fyrir gott innlegg Kristín. Vel skrifað og áhugavert, MSN er í senn snilldartæki til samskipta og stórhættulegt - sérstaklega er mikilvægt að foreldrar fylgist með MSN-notkun barna sinna.

mbk.

[Óðinn Þórisson, 30.9.2007 kl. 11:11]

Dómurinn var ekki of þungur og hefði alveg sætt mig við harðari refsingu. Hann vann við að verja og vinna að málum sem þessum og því eru afbrot hans meiri - þetta var maður sem fólk treysti og leytaði til með sín mál.
Ætla a.m.k að fylgjast vel með msm notkun dóttur minnar.