Beitti Davíð sér fyrir nýjum meirihluta í Reykjavík?

Það er ekki hægt að segja annað en að það sé stórmerkileg kjaftasaga að Davíð Oddsson, seðlabankastjóri og fyrrum forsætisráðherra, hafi beitt sér fyrir nýjum meirihluta Sjálfstæðisflokks og VG í borgarstjórn Reykjavíkur. Orðrómur var um það um síðustu helgi að þreifingar væru í gangi milli aðila og hugmyndir um að borgarfulltrúarnir sex sem voru ósáttir við Vilhjálm Þ. Vilhjálmsson myndu taka upp samstarf við VG, þá án Vilhjálms borgarstjóra.

Talað var um þennan kost sérstaklega í fréttaskýringu Péturs Blöndals í Morgunblaðinu á mánudag. Eftir blaðamannafund borgarfulltrúa Sjálfstæðisflokksins og sættirnar við Vilhjálm Þ. Vilhjálmsson (sem virðast að mestu vera á yfirborðinu) hefur róast yfir allavega á meðal borgarfulltrúanna sem hafa sameinast um að lægja öldur. En það væri fróðlegt að vita hversu miklar þreifingar átti sér stað og hverjir tóku þátt í þeim hafi slíkt átt sér stað.

Það að Davíð Oddsson sé orðaður við slíkt vekur athygli. Orðrómur hefur verið um að forysta Sjálfstæðisflokksins hafi verið ósátt við slíkar þreifingar og hugleiðingar á meðal hóps sjálfstæðismanna og varla undrunarefni enda hefur stuðningur Geirs H. Haarde, forsætisráðherra og formanns Sjálfstæðisflokksins, og stuðningsmanna hans við Vilhjálm Þ. ekki farið framhjá neinum, en Inga Jóna Þórðardóttir flutti sem kunnugt er ávarp við opnun kosningaskrifstofu gamla góða Villa í prófkjörinu 2005, þar sem VÞV og GMB tókust á.

Það virðist vera að þeir sem hafa lengst af stutt Davíð Oddsson og verið í innsta kjarna hans sé ekki sérstaklega umhugað um Vilhjálm Þ. og hafi viljað stokka upp stöðu mála. Það að nafn Davíðs sé nefnt í því samhengi skiptir miklu máli og hvort sem aðeins um kjaftasögu eða staðreynd sé að ræða er ljóst að þetta opnar frekari hugleiðingar um stöðu mála innan kjarnans í Reykjavík og hversu mjög ósáttir menn séu við verklag Vilhjálms Þ.

Athugasemdir

[Ásdís Sigurðardóttir, 11.10.2007 kl. 00:22]

Það virðist vera mikil neðanjarðarstarfsemi í flokknum okkar.

[Jens Guð, 11.10.2007 kl. 02:20]

  Okkur vantar allt haldbært varðandi þetta dæmi.  Ég hef heyrt af einhverjum svona þreifingum.  En mínar heimildir eru ekki frá fyrstu hendi.  Ég hef líka heyrt af þreifingum Samfylkingar og Framsóknar.  Ég hef þær heldur ekki frá fyrstu hendi. 

  Hinsvegar hef ég nokkuð áreiðanlegar heimildir fyrir vangaveltum um að staða Vilhjálms sé veik.  Og jafnvel áhuga fyrir uppstokkun.  En ég hef ekki heyrt að það sé rakið til Davíðs Oddssonar.  Þar eru aðrir áhugasamari,  samkvæmt mínum heimildum. 

[Óðinn Þórisson, 11.10.2007 kl. 07:56]

Það yrði bara jákvætt ef Davið kæmi að þessu.

[Bjarni Kjartansson, 11.10.2007 kl. 13:00]

Ég hef marglýst því yfir, að þegar menn eru komnir í djúpa holu, ættu þeir að hætta að grafa.

Þetta sagði hann Davíð okkar á sínum tíma, menn gerðu vel með að muna það.

Nú er Umboðsmaður Alþingis að fóðra málatilbúnað í þa´veru, að lýsa fundinn ómerkann.

Villi ætti að skilja það sem er ritað á vegginn.

Lýsa fundinn það gallaðann, að hann væri ómerkur, þannig væru allir gjörningar á þeim fundi og sumt fyrir hann og auðvitað allt sem á eftir var gert ógert í lagalegum skilningi og þá væri á valdi annarra aðila að reyna að fá hann dæmdann löglegann en það yrði torsótt og varla við því að búast, að menn færu í þá vinnu.

Miðbæjaríhaldið