Ótrúverðugar afsakanir Vilhjálms

Ég undrast mjög hvernig það getur eiginlega staðist að Vilhjálmur Þ. Vilhjálmsson, borgarstjóri, hafi ekki vitað um einkaréttarsamningana þegar að grunnur þeirra blasa við í minnisblöðum sem voru lögð fyrir fund með honum þann 23. september sl. Mér finnst það ekki trúverðugt eins og komið er málum að Vilhjálmur neiti að hafa vitað um 20 ára ákvæðið sérstaklega. Það blasir orðrétt við í gögnum að vísað er til slíks samnings.

Mér finnst þetta vægast sagt afleitt mál fyrir Vilhjálm Þ. Vilhjálmsson. Gildir þá satt best að segja einu hvort sem hann er að segja ósatt um að hafa ekki vitað af grunni einkaréttarsamningsins eða hafi ekki lesið gögnin sem eru á borðinu og með því lagt saman tvo og tvo, eins og allir gera sem lesa gögnin. Veit ekki hvort er verra í sannleika sagt. Í báðum tilfellum er ljóst að viðkomandi er varla starfi sínu vaxinn. Þetta mál blasir allavega þannig við mér eins og gögnin segja til um. 

Mér finnst þetta mál allt verulega slæmt fyrir Vilhjálm Þ. Mér finnst það með ólíkindum að maður í hans stöðu og með þær upplýsingar á borðinu er blasa við hafi ekki vitneskju um lykilmál sem það er um ræðir. Það er afskaplega einfalt mál. Ég fæ ekki betur séð en að spurt verði um hvort hann sé nógu trúverðugur til að halda áfram í hlutverki sínu sem leiðtogi flokks síns eftir þessa atburðarás.

Vilhjálmur Þ: „Nei, 20 ára ákvæðið var ekki kynnt fyrir mér "

Athugasemdir

[Ólafur Hannesson (IP-tala skráð) 15.10.2007 kl. 19:31]

Ég er orðinn alveg ringlaður. Ég bara ómugulega get skilið hvernig maður getur grafið sig dýpra og dýpra(ef hann lýgur). en ég treysti mér ekki til að segja hvort þetta sé rétt eður ei. við vonum bara að það komi allt í dagsljósið sem fyrst.

Verður maður ekki að draga þá ályktun að annað hvort sé hann vanhæfur eða hann lýgur. Eða hvað?

mbk

Óli 

[Marinó G. Njálsson, 15.10.2007 kl. 19:51]

Þetta er farið verða eins og gríngátlistinn minn

[365, 15.10.2007 kl. 20:57]

Þetta var hin ein furðulegasta uppákoma sem maður hefur lengi séð í Kastljósinu um langan tíma.  Og alveg furðuleg fyrir þær sakir að þarna var verið að tala við tvo fullorðna menn sem búnir eru að taka út sinn þroska.  Í staðinn horfðum við agndofa á þessa tvo aðila tala eins og smákrakkar væru að stæla um hvor ætti að vera lögga eða bófi.  Þetta er sem sagt það sem okkur er boðið uppá.

[Ágúst Dalkvist, 15.10.2007 kl. 22:18]

Er sammála þér með það að það er jafn slæmt hvort heldur Villi er að ljúga eða hefur ekki kynnt sér málið nægjanlega sem stjórnarmaður í Orkuveitunni.

Verst af öllu er að hann gerir sér ekki grein fyrir því.

[Kristján Pétursson, 15.10.2007 kl. 22:51]

Ég ætla Stefán  ekki að afskrifa með öllu sannleiksgildi orða Vilhjálms í þessu OR/REI málum.Vissulega hefur framburður hans verið dálítið á reiki,enda vegið að honum úr mörgum áttum.Ég hafði mikinn áhuga á rannsóknum sakamála á yngri árum og las nokkur fræðirit um ýmis konar tegundir afbrota,uppljóstrunarleiðir ,yfirheyrslur og viðbrögð sakamanna o.fl.

Ég tel að rannsaka þurfi aðkomu fleiri manna að þessu máli og að kannað verði hverjir hafi átt mestrar hagsmuna að gæta og verið hugmyndasmiðir þeirra aðgerða ,sem m.a.var beitt  gegn Vilhjálmi.

Þá er rétt að hafa hugfast,að þeir sem sífellt eru í þessu máli að lýsa  sínum heiðarleika,ærlegheitum og sannleika eru samk.sakamálafræðum,að reyna að fegra og réttlæta ranglætið og lýgina.Þeir sem eru heiðarlegir nefna það aldrei,þeir láta verkin tala. Hugleiðið þetta vel þegar þið hlustið á suma af aðalpersónum þessa vettvangs.

[Steingrímur (IP-tala skráð) 15.10.2007 kl. 23:02]

Stefán, þú átt fullt hrós skilið - það er allt of sjaldan sem maður sér fólk gagnrýna sinn flokk - reyndar sérstaklega Sjálfstæðisflokkinn.

Ég var einmitt að hugsa þetta sama - það skiptir ekki máli hvort Vilhjálmur vissi eða vissi ekki - það er eiginlega heldur skárra ef hann er að ljúga - annars hefur hann væntanlega tekið fullt af ákvörðunum sem borgarstjóri sem hann hafði ekki fullan skilning á!

Það skiptir í raun ekki máli hvað honum var sagt eða ekki sagt og hvaða minnisblöð hann sá eða ekki - eða hvað honum var sagt - og það á það sama við um alla þá sem vildu selja, selja, selja...

Á hverju áttu menn von?  Það liggur fyrir að REI átti að vera útrásarfyrirtæki Orkuveitunnar sem átti að nýta orðspor, þekkingu og reynslu OR.  Héldu menn virkilega að það væri hægt að selja REI si sona  með milljarðahagnaði  og Orkuveitan gæti bara með sama si sona verið laus allra mála?!?

Og önnur orð Bjarna Ármannsonar eru í raun miklu merkilegri:  Það kom fram þegar hann var kynntur til sögunnar sem stjórnarformaður að REI átti að vera í útrásarverkefnum Orkuveitunnar (Það hlýtur þá að vera í líftíma Orkuveitunnar) og það ætti að vera í samráði við einkaaðila sem ættu að koma með 30-60 milljarða!

Þá lá allt ljóst fyrir varðandi það!  Af hverju kom þetta prinsipp "dverganna 6" ekki fram fyrr en mánuði síðar?

[Theódór Norðkvist, 16.10.2007 kl. 02:25]

Vilhjálmur er ekki trúverðugur í málinu. Mér finnst þetta lykta annað hvort af Clintonísku, en sem kunnugt er var Bill Clinton sakaður um að fremja meinsæri í(ljúga fyrir opinberum dómsstólum) í Lewinsky-málinu, eða Steingrímsku.

Steingrímur Hermannsson var oft plataður af fégráðugum viðskiptajöfrum á sínum tíma og ef eitthvað var hermt upp á hann bar hann fyrir sig minnisleysi.

Að mínu mati eru tveir möguleikar í stöðunni og hvorugur lítur vel út fyrir Vilhjálm:

1. Hann laug frammi fyrir sjónvarpsvélunum. Þá á maðurinn að segja af sér á stundinni.
2. Þetta ákvæði var kynnt fyrir honum og hann tók bara ekki nógu vel eftir því. Þá var Vilhjálmur einfaldlega ekki að vinna heimavinnuna sína nógu vel. Það eru alvarlega afglöp hjá manni sem hefur verið falið jafnmikið ábyrgðarhlutverk og að gæta hagsmuna Reykjavíkurborgar og orkuauðlinda hennar.