Ófyrirgefanleg niðurlæging - endastöð Eyjólfs

Tapið gegn Liechtenstein í kvöld er að mínu mati ófyrirgefanleg niðurlæging fyrir okkur öll. Það að lúta í gras gegn landsliði á borð við þetta með þrem mörkum gegn engu er í einu orði sagt sorglegt - þetta er auðvitað eitt versta tap okkar í áraraðir og þetta gefur okkur skilaboð um stöðu liðsins. Tapið gegn Lettum hérna heima um daginn voru áberandi skilaboð en þessi eru sýnu verri.

Það er kominn tími til að Eyjólfur Sverrisson, landsliðsþjálfari, taki pokann sinn. Leiðsögn hans með liðið er engan veginn að ganga upp þegar að staðan er orðin með þessum hætti. Eftir ágætisleiki síðsumars voru vonir um að Eyjólfur væri að hressast í orðsins fyllstu merkingu en nú erum við komin á þau kaflaskil að þetta er óviðunandi. Þetta hlýtur að teljast endastöð Eyjólfs.

Ef honum ber ekki gæfa til að segja upp sjálfur á að segja honum upp. Þetta er komið gott eftir tveggja ára erfiðleikatímabil og tímabært að horfa í aðrar áttir með leiðsögn fyrir þetta lið. Einfalt mál í sjálfu sér!

Ljótur skellur Íslands í Liechtenstein

Athugasemdir

[Birgir Örn Birgisson (IP-tala skráð) 17.10.2007 kl. 22:56]

Ég er sammála þér, Ég var harður stuðningsmaður liðsins í mörg herrans ár. Ég nenni ekki einu sinni lengur að horfa á þessa leiki núna.

Þetta er búið að vera svo ömurlegt tímabil að maður tæki Gædinglæd fram yfir svona vitleysu.

Ég myndi vilja fá Guðjón Þórðar aftur, honum gekk vel. Atla gekk líka mjög vel með þetta lið, hann var látinn fara allt of snemma. Ég las það einhverstaðar að besta tölfræðin væri hjá Atla.

[Haraldur Haraldsson, 17.10.2007 kl. 23:50]

Satt segðirðu Stefán hingað og ekki lengra/Halli Gamli

[Kjartan Pálmarsson, 18.10.2007 kl. 00:50]

Nei nei enga vitleysu! Eyjólfur verður að vera áfram, enga KR stjórnar takta takk, sýnum bara Íslenska þolinmæði og þá mun Eyjólfur hressast.

Ég væri hinsvegar til í að sjá smá breytingar á bak við tjöldin hjá KSÍ.

ÁFRAM ÍSLAND

JÁ OG KR LÍKA

[Gunnar Th. Gunnarsson, 18.10.2007 kl. 01:04]

Gauja Þórðar aftur eða reyndan (og þess vegna dýran) erlendan þjáfara, helst frá Bretlandseyjum. Kannski að reyna að nappa þjálfaranum sem Liechtenstein er með

[Magnús Paul Korntop, 18.10.2007 kl. 03:47]

Hvaða breytingar viltu þá sjá á bak við tjöldin Kjartan?

[Magister Cat (IP-tala skráð) 18.10.2007 kl. 04:47]

Gaui verður líklega aldrei aftur þjálfari hjá KSÍ..vegna fyrri mála osfrv. hann er þó bestur hér á landi að mati flestra. Ólafur fyrrum FH þjálfari er á lausu er það ekki?..hæfastur á Fróni á eftir Gaua..Annars verður bara að ráða útlending..t.d.reyna að kaupa þjálfara Kýpur..þeir eru að stinga okkur af í fótboltanum og eru komnir með 13 stig í sínum riðli í þessari EM keppni!

[Kjartan Pálmarsson, 18.10.2007 kl. 08:49]

Breytingarnar bak við tjöldin gætu verið, hugarfarsbreyting stjórnarmanna gagnvart landsliðinu í heild sinni, talað hefur verið um ,, samráð '' þjálfara hér heima með landsliðsþjálfaranum að það gæti hjálpað, svo þarf að auka verkefnastöðu landsliðanna þ.e.a.s jafnt karla sem kvenna í öllum aldursflokkum, þó ekki væri nema kalla hópinn saman til æfinga og jafnvel spila reglulega við einhvern úrvals hóp manna sem spila hér heima, sem eru þá kannski í sumum tilfellum að banka á dyr landsliðsins hvort eð er.

Sammála ?

[Gunnar Th. Gunnarsson, 19.10.2007 kl. 03:01]

Allt sem þú nefnir Kjartan er örugglega rétt en breytir ekki því að fá nýjan þjálfara. Landsliðið hefur aldrei verið eins ömurlegt og nú, samt fínn mannskapur á vellinum sem þarf bara að virkja

[Kjartan Pálmarsson, 19.10.2007 kl. 18:19]

Æji já þetta er vandræða ástand með suma af leikmönnum liðsins, gefum Eyjólfi bara frið fram yfir Dana leikinn, vonum bara að niðurlægingin verði ekki 14-2 eða slíkt.