Mannleg grimmd dauðarefsinga

Ég hef alla tíð verið harður andstæðingur dauðarefsinga og jafnan fundist í þeim felast mesta mannlega grimmd sem til staðar er í tilverunni. Finnst sérstaklega mikil grimmd vera til staðar í þessu máli í Alabama þar sem fársjúkur dauðadæmdur maður (í tvennum skilningi þess orðs) af krabbameini bíður dauðans. Til þess að réttlæti stjórnvalda í Alabama verði ofan á mun vera ætlað að lífláta manninn með sprautunni áður en krabbinn hefur sigur í baráttu sinni.

Mér finnst þetta mikil grimmd og ég tel að við flest í hinum siðmenntaða heimi getum verið sammála um það. Dómur með dauða er engin lausn í sjálfu sér að mínu mati. Það er umdeildasta refsing sem til staðar er, ef fyrir utan aftökur stjórnvalda á fólki án dóms og laga sem eiga sér því miður stað víða í heiminum án þess að nokkur geri neitt í neinu, endist held ég færslan varla til að telja upp þau ríki. Hef oft hugsað mikið um þetta réttlæti sem nokkur ríki Bandaríkjanna hafa valið sér, réttlæti að þeirra mati, sem felst í að binda enda á líf með þessum hætti. Finnst kuldalegheitin reyndar ná einna helst hámarki í málinu í Alabama.

Dauðarefsingar hafa verið við lýði í mörgum ríkjum Bandaríkjanna og undir stjórn bæði demókrata og repúblikana. Mesta athygli hefur þetta vakið í suðurríkjunum. Þar hafa repúblikanar verið valdamiklir en demókratar ekki síður. Hefur ekki verið hægt að merkja neina breytingu á þessu þegar að demókratar hafa ráðið ferðinni í mörgum þessara ríkja. Oft hefur verið horft til Texas í þessum efnum. Þar voru demókratar á ríkisstjórastóli síst vinsamlegri en repúblikanar. Heilt yfir virðist hitinn í þessum málum ekki fara minnkandi þó komin sé 21. öldin og ákall um nýja tíma þar sem dauðarefsing er enn við lýði ekki svarað.

Mér finnst álitamál dauðarefsinganna sjaldan hafa verið tekin betur fyrir í kvikmynd en í Dead Man Walking, hinni ógleymanlegu mynd leikarans Tim Robbins. Þar segir af nunnunni Helen Prejean sem verður trúnaðarvinur Matthew Poncelet, fanga á dauðadeildinni, rétt áður en hann er líflátinn og baráttu hennar fyrir að honum verði hlíft. Susan Sarandon fékk óskarinn fyrir eftirminnilega túlkun sína á nunnunni, hlutverk ferilsins án vafa, og Sean Penn var rafmagnaður sem Poncelet.

Þetta er heilsteypt mynd með boðskap sem á vel við, sem horfir á grimmdina frá öllum hliðum en svarar spurningunni um hver sé mesta grimmd slíkra örlaga. Þeir sem hafa ekki séð Dead Man Walking hafa misst af miklu og eru hvattir til að líta á hana. Vissulega er hinn dauðadæmdi Daniel Siebert enginn sómamaður en ég held að mál hans ætti að vekja marga til umhugsunar um mannlegu hliðar allra mála, hversu dökk sem þau virðast vera.

Drifið í aftöku áður en fangi deyr úr krabbameini

Athugasemdir

[Stefán Friðrik Stefánsson, 24.10.2007 kl. 17:58]

Það verður hver og einn að tjá sínar skoðanir. Það geri ég hér fyrir mig og get ekki annað en talað hreint út. Ég hef aldrei verið hlynntur dauðarefsingum og myndi t.d. aldrei tala fyrir því að taka upp dauðarefsingar hér. Hún var afnumin hér á fyrri hluta nítjándu aldar og ég hef ekki talað fyrir því að dauðarefsing verði til staðar erlendis heldur. Mér finnst dauði ekki lausn í þessum efnum.

[Haraldur Haraldsson, 24.10.2007 kl. 18:16]

Algjörlega sammála þessu Stéfan!!!!!!/Kveðja Halli gamli

[Auðbergur Daníel Gíslason, 24.10.2007 kl. 18:49]

Dauðarefsingar eiga aldrei rétt á sér lífstíðarfangelsi á að vera alvarlegasta refsingin og Íslendingar beita ekki dauðarefsingu vegna þess að við erum siðmenntuð þjóð og Bandaríkjamenn sína mikinn vanþroska á því að beita henni. Þó svo að einhver myrði einhvern er það ekki svo að við eigum að myrða hann. Það er í það minnsta mín skoðun. Mér finnst Laissez-Faire tala af fáfræði um þetta mál.

Auðbergur D. Gíslason

14 ára Sjálfstæðismaður

[Stefán Friðrik Stefánsson, 24.10.2007 kl. 19:21]

Takk fyrir kommentin Halli, Aubbi og Thor. Gott að við erum sammála um þetta.

mbk.

[Kristján Birnir Ívansson (IP-tala skráð) 24.10.2007 kl. 20:51]

Auga fyrir auga og tönn yfir tönn er gömul góð regla sem því miður er ekki alltaf höfð í heiðri í hinum vestræna heimi.

[Stefán Friðrik Stefánsson, 25.10.2007 kl. 01:37]

Takk fyrir gott komment Ninni. Sammála hverju orði.

mbk.