Árásarmaðurinn lifandi eftir sjálfsvígstilraun

Árásarmaðurinn í Jokela-framhaldsskólanum í Finnlandi hefur nú verið nafngreindur - hann heitir Pekka-Eric Auvinen. Hann reyndi að fyrirfara sér eftir skotárásina en tókst það ekki. Auvinen liggur nú milli heims og helju á Töölö-sjúkrahúsinu í Helsinki. Átta eru látnir eftir árásina, þar á meðal skólastjórinn, og tólf eru slasaðir, margir þeirra eru í lífshættu vegna áverka sinna.

Þetta er alveg skelfilegt mál. Þegar hafa borist fregnir að árásin hafi verið vel plönuð af árásarmanninum og plan hennar komið fram meira að segja í myndklippu á YouTube. Þegar hefur þessi mynd hér til hliðar verið opinberuð sem sýnir brot úr henni. Klippan var sett inn á svæðið fyrr í dag. Auvinen setti klippurnar inn ásamt fleirum undir nafninu Sturmgeist89 og ber klippan einfaldlega heitið Jokela High School Massacre - 11/7/2007.

Athygli vekur að á klippunni hljómar undir lagið Stray Bullet með rokkbandinu KMFDM, en textar þeirra höfðu mikil áhrif á Eric Harris og Dylan Klebold, nemendurna sem stóðu að fjöldamorðunum í Columbine-skólanum í Colorado árið 1999. Þessi bandaríski veruleiki í Finnlandi er sannarlega sláandi og eflaust mun enn meira koma fram sem varpar ljósi á þennan harmleik.

Myndklippan

Árásarmaðurinn í Finnlandi reyndi að fyrirfara sér

Athugasemdir

[Gunnar Hrafn Jónsson (IP-tala skráð) 7.11.2007 kl. 17:35]

Mig langar bara til að benda á að KMFDM eru anti-fascist grúppa sem taka sterka afstöðu gegn ofbeldi, fordómum og öðrum ófögnuði. Þó svo að einhverjir hálfvitar eigi mp3 klippur með þeim tengir það bandið eða boðskap þess ekki á neinn hátt við morð, fasisma, etc.

Ég held að sú staðreynd að sumir meðlimirnir hafa verið þýskir (það hefur verið skipt frekar mikið um mannskap) spili inn í þann misskilning sem hefur skapast um bandið.

[Stefán Friðrik Stefánsson, 7.11.2007 kl. 17:49]

Tek undir það. En þessi samlíking vekur auðvitað athygli. Gæinn var bara að stæla Klebold og Harris, eins ömurlegt og það er. Truflaður strákur sem vildi senda út statement. Þetta gerist ekki bara í Bandaríkjunum. Þetta er mikill harmleikur og þetta opnar nýjan veruleika fyrir okkur hér á Norðurlöndum.
 
mbk.

[Hákon Unnar Seljan Jóhannsson, 7.11.2007 kl. 19:54]

Já þetta er hörmulegur atburður en ég er sammála Gunnari enda tel ég líka að tónlist hafi ekki þessi áhrif á menn, það býr eitthvað meira á baki ekki það að það hafi verið þín orð. En það versta við þetta er held ég að okkar menning eða menning norðurlandanna virðist vera færast nær svona amerískri menninngu þá byssubrjálæðinu og því.