Þorgerður Katrín friðar Hafnarstræti 98

Ég vil lýsa yfir ánægju minni með þá ákvörðun Þorgerðar Katrínar Gunnarsdóttur, menntamálaráðherra, að friða Hafnarstræti 98, sem mjög hefur verið í umræðunni hér á Akureyri í fjöldamörg ár vegna þess hversu mjög illa er komið fyrir því, auk Parísar og Hamborgar; Hafnarstrætis 96 og 94. Seinni tvö húsin hafa verið endurgerð síðustu árin með glæsilegum hætti.

Kaffihúsið Bláa kannan hefur verið rekin í París síðasta áratuginn og það er vinsæll áfangastaður fjöldamargra hér til að fá sér kaffibolla; hittast og taka spjall. Húsið öðlaðist með því nýtt líf eftir að hafa verið leikfangaverslun árum saman. Hamborg var miðstöð okkar sjálfstæðismanna í aðdraganda sveitarstjórnarkosninganna 2006 en varð síðar gert upp sem verslun 10-11 og hefur með því öðlast nýtt líf, en þar var sportverslun í áraraðir. Það er mikil sál í þessum húsum og jákvætt skref að tekin hafi verið ákvörðun um að vernda þessa götumynd sem tákn um byggingastíl síns tíma.

Ég held að örlög Hafnarstrætis 98 hafi verið endanlega ráðin þegar að teikningar urðu opinberar af því húsi sem byggja átti þar í staðinn. Það var með eindæmum ljótt, passaði engan veginn í götumyndina. Reyndar finnst mér kassalaga byggingar af því tagi sem boðað var að ætti að reisa á þessum reit lítt spennandi og hefði ekki viljað sjá þannig hús á þessum stað. Varð endanlega friðunarsinni við að sjá þá skelfingu. Þannig að ég fagna þessari niðurstöðu og vona að hún leiði til þess að fólk byggi húsið upp og hefji það aftur til vegs og virðingar.

Það hefur verið deilt um þetta hús svo lengi sem ég man eftir. Það hefur verið ljótt meginpart minnar ævi, man ekki eftir því nema sem lýti á miðbænum. Talað hefur verið um að rífa það árum saman. Samt hefur það aldrei verið gert. Nú er tækifæri til að endurbyggja það og ég vona að það gangi fljótt og vel að taka á þeim málum. Skipulagsyfirvöld hafa sofið lengi á verðinum hvað varðar þessi mál og eru áralangar hugmyndir að baki um að rífa húsið. Þó það hafi verið þyrnir í augum hefur það ekki verið gert.

Bæjarstjórn Akureyrar átti á fundi sínum í dag að taka fyrir samþykkt skipulagsnefndar að staðfesta niðurrif hússins. Menntamálaráðherra stoppar þetta mál af nú. Mér fannst orðið ljóst með ákvörðun Húsafriðunarnefndar fyrir nokkrum vikum að húsið yrði friðað, það yrði niðurstaða mála. Nú hefur verið kippt fótunum undan þeirri umræðu í bæjarstjórn og haldið verður með málið í aðrar áttir. Ég tel að þetta sé jákvætt skref og fagna því að kassalaga skrímsli var ekki byggt á þessum reit.

Þrjú hús friðuð á Akureyri

Athugasemdir

[Hlynur Hallsson, 13.11.2007 kl. 15:48]

Frábært! Bestu kveðjur,

[Guðmundur Jóhannsson, 14.11.2007 kl. 04:06]

Sæll Stebbi,  Ég get ekki verið meira ósámmála þér.  Það getur ekki réttlætt þetta bull að einhverjar teikningar hafi sýnt "ljótt hús"  Hafnarstræti 98 passar ekki í götumyndina og hefur ekki gert það síðan Hafnarstræti 100 var byggt.  Á þá að rífa H100 og Skipagötu 14?.  Það er líka götumynd í portinu milli Glitnis, Pedro og Parísar.  H98 stendur 6 metra ínní götulínuna að sunnan.

Menn varða að gera sér grein fyrir að allt önnur lögmál gilda um Hamborg og París.  Þau hús hafa alltaf verið í skipulaginu og engum dottið í hug að hrófla við þeim.

Það er sörglegt að ráðherra skuli ganga svona frklega á vilja bæjarstjórnar Akureyrar, og reyndar flestra Akureyringa.  Eitt er hreinu, skipulagsyfirvaldið er á forræði sveitarstjórnar, þess vegna er þetta inngrip ráðherrans nú óskiljanlegt.  Gleymum ekki að í gildandi deiliskipulagi á stór hluti þessa húss að fara (6 metrar).  Ætlar ráðherran að breyta skipulagi miðbæjar Akureyrar með einfaldri ákvörðun.  Það er svo einkennilegt að í gildi eru líka skipulagslög og eftir þeim hefur Akureyrarbær farið í öllu eftir.

Verst af öllu er að enginn veit hvað gerist næst.  Nokkur ár ár viðbót með þennan hjall í hjarta Akureyrar, ég fæ kjánahroll eins og krakkarnir segja.   Ekki þarf Akureyrarbær að lúta því að eiga og endurbyggja þetta hús, það verkefni er nú í höndum Ríkisins.  Gaman verður að sjá Fjármálaráðherra setja nokkur hundruð milljónir í þessa endurbyggingu.  Mest verður ánægjulegt að sjá "höfuðstöðvar" húsafriðunarnefndar fluttar til Akureyrar, húsið fær þá verðugt hlutverk að hýsa þá ágætu nefnd.

Kannski verður þetta hús einhvern tíman bæjarprýði, það hefur ekki verið það hingað til.

Kveðja frá Florida

[Stefán Friðrik Stefánsson, 14.11.2007 kl. 16:13]

Sæll Mundi

Þakka þér fyrir kommentið. Athyglisvert að lesa. Eins og ég tek fram er óskiljanlegt að húsið hafi ekki verið rifið fyrr fyrst að það var svo fyrir. Reyndar eins og ég segi að þá hefur mér fundist þetta hús vera fyrir, ef svo má segja, árum saman, jafnvel síðan að ég man fyrst eftir mér, á árunum sem amma og afi bjuggu í Brekkugötu 9 og maður var mikið í miðbænum.

Ráðherrann tekur af skarið, nú er mikilvægt að fara í það verkefni að reyna að koma þessu húsi í það form sem því hæfir, þetta hefur drabbast of lengi. Held að teikningin af húsinu sem átti að koma í staðinn hafi komið af stað bylgju þess að fólk talaði fyrir friðun. Það passaði ekki í umhverfið þarna fannst mér.

Hinsvegar er undarlegt fyrst að skipulagið hefur verið í gildi með reitnum án þessa húss í yfir tvo áratugi að það sé ekki fyrir löngu farið. En vonandi verður hægt að leysa þetta svo allir geti verið sáttir. Hinsvegar er eðlilegt að bærinn leiti eftir rétti sínum, telji hann á honum brotið.

bestu kveðjur
Stebbi