Raunalegar afsakanir á tapi fyrir Dönum

Mér fannst nú hálf raunalegt að sjá tilraunir Ólafs Jóhannessonar, landsliðsþjálfara, til að fegra ósigurinn gegn Dönum í kvöld. Það er alltaf erfitt að byrja með tapi en ég vona að það megi segja um Ólaf eins og flesta sem byrja á botninum að eftir það geti leiðin aðeins legið upp á við. Það sem skiptir máli í leikjum er að skora mörk og ná að tryggja sigur. Það tókst ekki í dag og við virðumst eiga við erfið vandamál í liðinu sem fylgja eftir, vandamál sem vonandi verður tekið á.

Veit svosem ekki hvað við gátum átt von á í þessum leik, öðru en tapi. Held þó að enginn hafi átt von á 3-0 tapi. Ef það er markmiðið að sætta sig við tap í leikjum á að pakka saman frekar en halda þessu úti. Í þessu dugar ekkert annað en metnaður og að spila til sigurs, sama hvaða lið er um að ræða. Við höfum sýnt karakter gegn Spáni og fleiri liðum og eigum ekkert að þurfa að hræðast einn né neinn. En fari menn á völlinn vissir um að þeir tapi leik kemur ekkert út úr honum nema einmitt tap.

Það mun enginn dæma Ólaf vegna úrslitanna í þessum leik. Það eru aðeins þrjár vikur frá því að hann tók við þessu vanþakkláta starfi. Það hefur enginn orðið vinsæll á að vera í þessum stól síðan að Guðjón Þórðarson var og hét fyrir áratug, þá gátum við líka verið stoltir af okkar liði og átt von á þar væri samansafn af karakterum sem börðust til enda, sama hvað. Síðustu árin hefur þetta verið raunalegt og náði það hámarki í leiknum við Liechtenstein þar sem við vorum hundlélegir bara.

Ólafur þarf að fá sinn tíma til að taka almennilega við starfinu og setja sitt mark á liðið. En það verður aldrei svo að við sættum okkur við þriggja marka tap í neinum leik, en kannski erum við bara það lélegir að við verðskuldum ekki betra. Það þarf að taka á því og ég vona að þrefaldur íslandsmeistaraþjálfari sé maðurinn í það verkefni að byggja upp lið sem við getum verið stolt af.


PS: Mikið hafði Guðjón Þórðarson annars rétt fyrir sér á Sýn í kvöld.

Ólafur: „Ánægður með hugarfarið“

Athugasemdir

[Svartinaggur, 22.11.2007 kl. 03:30]

Gefum íslenska karlalandsliðinu frí í svona 5 ár og notum peningana í kvennalandsliðið.

[Jónína Dúadóttir, 22.11.2007 kl. 07:26]

Ég sá smáglefsu úr þessum leik í vinnunni í gærkvöldi og ég gat ekki betur séð en íslenska liðið vildi bara alls ekkert hafa boltann...

[Jón Ingi Cæsarsson, 22.11.2007 kl. 07:37]

Stebbi...datt þér í hug að yrðu betri úrslit en þetta....ég sem er hógvær maður og hef lengi fylgst með boltanum spáði 6-0. Þetta var helmingi betra en það en líkleg tóku danir ekkert sérstaklega mikið á því þegar þeir voru búnir að innbyrða sigur. Íslenska liðið er afar slakt og getustig margra leikmanna er bara ekki meira en þetta í alþjóðabolta. Það mun taka Ólaf langan tíma að breyta þessu liði og hugarfarinu. Það er auk veikra leikmanna búið að tala niður allan móral og trú manna á sjálfa sig.