Klúður aldarinnar hjá Englendingum

Það var fátt sem minnti á forna frægð Englendinga í knattspyrnu í kvöld þegar að Króatar gerðu sér lítið fyrir og rassskelltu þá á heimavelli og gerðu þar með að engu vonir Tjallanna um sæti á EM á næsta ári. Sú var tíðin að Englendingar áttu að heita mátti öruggt sæti á alla lykilkeppnir knattspyrnunnar og áttu möguleika á titlum. Það er þó óralangt síðan að þeir urðu heimsmeistarar og þeir hafa átt í miklu brasi síðustu árin.

Var vissulega svolítið merkilegt að sjá þessa merkilegu stund er Englendingar lutu í gras og urðu að játa sig sigraða. Það verður athyglisvert að horfa á EM á næsta ári og það án Bretanna. Fyrir okkur sem fylgjumst með enska boltanum og höfum átt okkar uppáhaldslið þar árum saman verður það nýtt móment. En þeir einfaldlega áttu ekki betra skilið, hafa verið mjög slappir að undanförnu og virðast ekki vera í formi af því tagi sem þarf í stórkeppni af þessu tagi núna.

En vonandi verður þessi rassskellur sem nýtt upphaf fyrir landslið Englands. Þeir hinir stóru þurfa oft að fá vænan skell til að vakna til veruleikans og upplifa að þeir þurfi að berjast fyrir upphefðinni.

England tapaði og Rússar náðu síðasta EM-sætinu

Athugasemdir

[Fannar frá Rifi, 22.11.2007 kl. 15:20]

Ætli það komi ekki núna krafa um að Ensku knattspyrnuveldin fari í grasrótar uppeldi. Ætli það muni ekki einnig heyrast kröfur frá hörðustu áhangendunum að það verði settar einhverskonar takmarkanir á fjölda útlendinga (innan ESB) í enskum liðum?

[Stefán Friðrik Stefánsson, 23.11.2007 kl. 12:14]

Jú, eflaust Fannar. Þetta er þeim mikið högg, en þeir þurfa að hysja upp um sig buxurnar, rétt eins og við. Bæði hér og í Englandi eru allir að skammast út í fótboltasamtökin. Það er heiðarlegt og rétt mat tel ég.

mbk.