Eru átök í meirihlutanum um Orkuveituna?

Það virðist vera að enn hafi ekki náðst samstaða í vinstrimeirihlutanum í Reykjavík um málefni Orkuveitu Reykjavíkur. Seinkun á stjórnarfundi OR sýnir vel hversu erfiðlega gengur fyrir framboðin fjögur sem mynda meirihlutann að ná saman. Reyndar er öllum ljóst að meirihlutinn er án málefnagrunns að öllu leyti - enda ekki lagt í málefnasamning þrátt fyrir að sitja við völd í rúman mánuð.

Það eina sem var gert er meirihlutinn var myndaður var einfaldlega að koma sér saman um það hvaða toppembætti hver ætti að fá. Held þó að fyrst og fremst verði áhugavert að sjá hvaða samstöðu nýr meirihluti nær um Orkuveitu Reykjavíkur og verklag mála á þeim bæ. Um þau mál hefur verið deilt mjög. Eftir að nýr meirihluti var myndaður hefur hann tekið við sama leyndarhjúp um málefni OR og einkenndi störf fyrri meirihluta. Það eru ekki trúverðug vinnubrögð. Ég sé altént ekki mikinn mun á þögninni yfir OR og leyndarhjúpnum og sem er til staðar undir stjórn þessa meirihluta og hins fyrri.

Háværar kjaftasögur hafa verið um að gera eigi REI að fjárfestingararmi Orkuveitunnar, selja eigi einfaldlega eignir félagsins til Geysis Green Energy og um leið að kaupa hlut í félaginu, sem er eins og flestir vita undir forystu Hannesar Smárasonar og FL Group. Það er varla ofmælt að kjósendur verða hafðir af fíflum af nýja meirihlutanum ef þetta verður niðurstaða mála. Það er eðlilegt svosem að deilt sé um sjónarmið varðandi Orkuveituna. Fyrir meirihlutamyndun í október voru Björn Ingi Hrafnsson og borgarfulltrúar þáverandi minnihluta að tala fyrir ólíkum áherslum, en eru nú að reyna að finna úr úr því.

Fróðlegt verður að sjá hvort að vinstri grænir ætli sér að fara í samstarf með Geysi Green Energy eftir öll stóru orðin um að orkuauðlindir landsmanna eigi að vera að fullu í opinberri eigu. Á prinsipp vinstri grænna nú að verða með þeim hætti að standa að því að einkaaðilum sé hjálpað við landvinninga sína í orkumálum? Ef það verður niðurstaðan í Reykjavík er ljóst að vinstri grænir hafa skipt um skoðun á landsvísu í þessum efnum. Þannig að það verður áhugavert að sjá hversu langt prinsipp vinstri grænna ná í raun og veru.

Frá fyrsta degi hefur verið áhugavert að fylgjast með því hvort muni standa uppi sem sigurvegari rimmunnar um REI og OR innan nýja vinstrimeirihlutans, REI-listans, sem sumir nefna X-listann, með kómískum hætti; Björn Ingi eða Svandís. Annað þeirra mun þurfa að gleypa mjög stór orð. Vissulega varð Björn Ingi að hopa mjög með riftun samruna REI og GGE, en víst er að margir munu líta þann sigur Svandísar öðrum augum fari svo að REI verði að fjárfestingararmi Orkuveitunnar í beinu samstarfi við GGE.

Það verður áhugavert að sjá hver niðurstaða meirihlutans í Reykjavík verði. Tafir á ákvörðunum eru til marks um að eitthvað höktir innan meirihlutans og áhugavert að sjá hvaða sambræðingur kemur út úr þessu, er yfir lýkur. 

Stjórnarfundi í OR frestað

Athugasemdir

[Sigurður Viktor Úlfarsson, 23.11.2007 kl. 00:26]

Þau þurfa nú ekki bara að ná samkomulagi við hvort annað heldur líka við Geysi Green.  Það verður fróðlegt að sjá niðurstöðuna. 

Björn Ingi hefur auðvitað haft rétt fyrir sér allan tímann.  Allur þessi sameiningarpakki og samstarf OR og GGE er auðvitað hið besta mál enda hefur aldrei verið deilt um það þangað til borgarstjórnarflokkur Sjálfstæðismanna, tók vegna reiði gagnvart Villa viðutan, u-beygju frá stefnu síns flokks og lagðist allt í einu gegn þátttöku OR í útrásinni.

Það sem betur mátti fara voru einungis útfærsluatriði á þessum samningum og samvinnu og ber þar hæst að nefna að OR veiti ekki utanaðkomandi aðila vörumerki sitt til 20 ára án þess að geta sagt upp samningnum á tímabilinu.  Önnur atriði voru nokk í lagi.  Það sem Svandís hefur verið að gera undanfarið er að hún hefur einfaldlega verið að setja sig inn í málin og því komist að sömu niðurstöðu og þeir sem búnir voru að gera það áður.  Þau eru því líklega að reyna að framkvæma sama hlut en þó þannig að þeir sem lítið fylgjast með þessu máli (sem eru flestir) haldi að eitthvað hafi breyst.