Viljum við að löggan hér taki upp taser-byssur?

Þrír hafa látist á undanförnum vikum í Kanada eftir að þeir voru stuðaðir með taser-byssu. Þetta er sama vopn og íslenska lögreglan vill taka upp hérlendis. Mér finnst þessar fréttir af láti fólks sem hefur verið stuðað mjög sláandi, enda er þetta einum of mikið af dauðsföllum í einu vegna sömu aðstæðna til að útilokað verði að rafstuðbyssan leiki ekki lykilþátt í dauða þeirra.

Taser er að mínu mati mjög kuldalegt vopn, sem mér finnst æ oftar vera talað um að sé notað á fólk. Það er vopn sem mér finnst mjög ómannúðlegt. Tilhugsunin um að íslenska lögreglan fari að beita því á fólk sama hversu stór tilefnið sé á vettvangi finnst mér ekki góð og fær mig til að hugsa um á hvaða leið við erum eiginlega. Mér finnst það mannleg grimmd að beita þessu vopni og við hljótum að hugsa okkar við að sjá fréttir erlendis frá af dauða fólks sem hefur verið stuðað.

Það þarf að hugleiða mjög alvarlega hvort að íslenska lögreglan eigi að fá þetta vopn í hendur. Finnst það ekki gleðileg tilhugsun, fjarri því. Hvað segið þið - viljið þið að íslenska löggan sé vopnuð taser?

Athugasemdir

[Hörður (IP-tala skráð) 25.11.2007 kl. 21:49]

Hafa þarf í huga að dauðsföll í kjölfar taserbyssu ratar beint í fjölmiðla og er smellt í áberandi fyrirsögn þar.  Að síðan álykta að taserbyssan eina orsök þessara dauðsfalla, áður en niðustöður krufninga eru ljósar er frekar innantóm ályktun. 

Kannanir hingað til hafa sýnt að þeir sem verð fyrir stuðinu hljóta engan skaða af nema tímabundinn (og mikinn) sársauka og rannsóknir á dauðsföllum eftir taser stuð hafa sýnt að viðkomandi hefur verið veikur fyrir.

Síðan er allt annað mál hvort þetta sé mannleg grimmd eða ekki, og reyndar skil ég ekki hvernig þú getur fengið það út.  Hver er munurinn á því að stuða menn eða snúa hann niður í armlás?  Þú talar eins og löggan geri þetta að gamni sínu.  Það er auðvelt að sitja fyrir framan tölvuskjáinn og hneykslast á myndböndum þar sem menn eru stuðaðir að því er virðist að óþörfu.  Ég treysti því að löggurnar hafi reynslu og þjálfun til að vega og meta hvenær er rétt að beita þessu.  Hins vegar eru eflaust svartir sauðir sem beita þessu rangt en að dæma hin 99.9% tilfellin út frá þeim er rangt.

Ég hefði ekkert á móti taserbyssum á íslensku löggunni.

[Haraldur Haraldsson, 26.11.2007 kl. 13:17]

þarna er maður sammál þer  Stefán Friðrik þetta er ekki okkur verjandi að taka þetta upp/alls ekki!!!!! /Halli gamli

[Steini Bjarna, 27.11.2007 kl. 01:23]

Alfarið á móti þessu.  Ættu mesta lagi að vera í höndum sérsveitarinnar en einmitt ósýnileg, undirliggjandi veikindi fólks geta gert það að verkum að stuðið verður að vist hjá Guði, þegar tilgangurinn var aðeins að "róa" viðkomandi eins og sagt var í frétt af aumingja Pólverjanum sem var drepinn á Vancouverflugvelli að ósekju.

Einnig ömurlegt dæmið af ökumanninum í Bandaríkjunum sem var stoppaður fyrir of hraðan akstur en var stuðaður fyrir að neita að skrifa undir radarskýrsluna nema sjá hraðaskiltið fyrst. Má ég þá frekar biðja um gamla góða armlásinn eða maze, eða bara einfaldlega hina mannlegu hlýju og það að geta talað við fólk á rólegan hátt, með aðstoð túlks ef þörf er á.