Aftakaveður um allt land

Dagurinn hefur verið heldur betur stormasamur. Sennilega hefur veðrið verið verst fyrir sunnan. Hér hefur gengið á með suðvestanroki, sem er leiðinleg átt hér á Akureyri. Virðist ætla að verða ekta hvassviðrisnótt. Hef fengið margar lýsingar á stöðunni fyrir sunnan í spjalli við vini og ættingja þar. Svona óveður eru alltaf ömurleg. Við verðum oft ansi hjálparlaus þegar að máttarvöldin minna á sig.

Það hlýtur að hafa verið alveg skelfileg lífsreynsla að húka um borð í flugvélunum á Keflavíkurflugvelli og komast hvorki lönd né strönd. Finn til með þessu fólki hreinlega að þurfa að bíða þar klukkustundum saman eftir aðstoð til að komast í burtu. Það sannast alltaf vel á þessum stundum hvað við eigum góðar björgunarsveitir sem eru til taks. Þær sanna alltaf mátt sinn er veðrið versnar og við þurfum einhverja aðstoð í nauð.

Annars er best bara að vera heima núna og slappa af og bíða óveðrið af sér. Hér fyrir viku var sama staða uppi í kafsnjókomu. Nú er snjórinn að fara og aðstæðurnar aðrar. En samt sem áður er best að taka því bara rólega í óveðrinu.

Kannski ég horfi bara á meistaraverk John Huston Key Largo, með Bogart og Bacall, á eftir. Það er viðeigandi að horfa á myndina í því leiðindaveðri sem er hérna fyrir norðan þessa stundina - myndin gerist jú í aftakaveðri. :)

Flutningi úr flugvélum lokið

Athugasemdir

[Bimma (IP-tala skráð) 9.2.2008 kl. 02:02]

Er alveg sammála síðasta ræðumanni, hélt ég þyrfti að fara að faðma rúðugler á tímabili....

Sýnist vera að róast aðeins, en ljós eru búin að flökta í allt kvöld og átti allt eins von á rafmagnsleysi, svo ég kveikti bara á fullt af kertum. Stemning. :)

En ég hef alveg skelfilega gaman af vondu veðri (því verra því betra, var m.a.s. fyrir algera tilviljun úti í Dallas þegar Katrina og félagar skullu á 2005) og er ekkert illa við að klofa snjó, enda þekkjum við það frá barnæsku ekki satt? ;)

Síðan ætla ég að horfa á 'Twister' á DVD bara til að koma mér í fílinginn.

 Rok og rigningarkveðjur    -Bimms