Veikburða leiðtogatafl sjálfstæðismanna í Reykjavík

Ég tel að það sé ekki farsæl niðurstaða fyrir Sjálfstæðisflokkinn í Reykjavík ef Vilhjálmur Þ. Vilhjálmsson ætlar sér ekki að horfast í augu við að staða hans veikist sífellt og nær útilokað orðið að hann verði aftur borgarstjóri og leiði flokkinn í kosningum. Miðað við umfjöllun ljósvakamiðlanna í kvöld finnst mér full þörf á því að velta fyrir sér hvert stefni hjá flokknum og hvort ráðleysið sé svo mikið að þar á bæ sé ekki þorað að taka af skarið.

Ég tel að allir sem þekki Vilhjálm Þ. Vilhjálmsson geti borið því vitni að þar fer vandaður og góður maður, sem hefur unnið lengi gott starf fyrir Sjálfstæðisflokkinn og Reykjavíkurborg. Það er eðlilegt að virða það sem hann hefur gert. Honum urðu þó á mjög mikil mistök í REI-málinu og virðist orðið útilokað annað en að hann verði að bera á því ábyrgð með einum eða öðrum hætti. Ella fylgi það flokknum eins og mara í næstu kosningar. Eins og komið er málum er hið eina heiðarlega í stöðunni að Vilhjálmur víki til hliðar og nýr leiðtogi taki við. Þetta er heiðarlegt mat mitt og mér finnst eðlilegt að tjá sig hreint út í þessum efnum. Staðan gefur fullt tilefni til þess.

Mér finnst frekar vond sú tilhugsun að sjálfstæðismenn í Reykjavík ætli að láta þetta mál dankast það mikið að ekki verði tekin heiðarleg ákvörðun um framtíð Vilhjálms Þ. Vilhjálmssonar á leiðtogastóli fyrr en mun síðar. Í mínum huga þarf að taka af skarið hvort hann haldi áfram og fari þá aftur í kosningar nú þegar. Þessi vafi mun aðeins veikja flokkinn í sessi. Það þarf ekki sérfræðinga í stjórnmálum til að sjá að Vilhjálmur hefur þegar veikst umtalsvert í sessi, trúverðugleiki hans er að mestu gufaður upp og það spyrja sig allir um styrk leiðtogans. Það getur aldrei talist gott og þaðan af síður fyrir stjórnmálamann sem lengst allra hefur setið í borgarstjórn Reykjavíkur.

Mér sýnist á allri umræðunni að örlög Vilhjálms séu ráðin en það sé beðið annars tímapunkts með því að staðfesta það. Heldur finnst mér það dapurlegur dómgreindarbrestur þeirra sem leiða Sjálfstæðisflokkinn í Reykjavík og halda þar um tauma. Með því mati eru þau að veikja flokkinn enn meir en orðið er og þætti mér fullt tilefni til að þetta fólk tæki frekar af skarið en ýti þessu máli á undan sér fram úr hófi. Það er í sjálfu sér eðlilegt að framtíð leiðtogans skýrist nú. Ef hann ætlar sér að sitja áfram heldur hann í næstu kosningar og er leiðtogi lengur, ella hættir hann. Valkostirnir geta ekki verið einfaldari.

En hið versta í stöðunni er að einhverjir velti því virkilega fyrir sér að sækja leiðtogaefni í borgarstjórnarflokkinn út fyrir raðir hans þegar að Vilhjálmur Þ. Vilhjálmsson hættir. Það virðist vera að sú dýrkeypta lexía að gera Markús Örn Antonsson, fyrrverandi útvarpsstjóra, að borgarstjóra og leiðtoga borgarstjórnarflokksins fyrir sautján árum hafi ekki verið nógu beisk og erfið til þess að það sé uppi á borðinu sem valkostur. Að flestra mati veikti sú ákvörðun flokkinn og margir rekja tapið í borgarstjórnarkosningunum 1994 til þess. Það hlýtur að hljóma eins og neyðarráðstöfun fyrir vissa aðila.

Það er illa komið fyrir flokknum í Reykjavík og stoðum hans ef að kjörnir fulltrúar geta ekki leyst mál á borð við þetta þar sem leiðtoginn riðar til falls og velja þarf nýjan leiðtoga.

Ekki ástæða til að ræða við Vilhjálm og Björn Inga

Athugasemdir

[Árni Gunnarsson, 10.2.2008 kl. 21:57]

Mér er það mjög til efs að allir borgarfulltrúar hafi gert sér fulla grein fyrir REI málinu og þeirri atburðarás sem þar var sett í gang. Vilhjálmur lenti í því að gera sig að glópi og missa stjórn á málinu ásamt öllu því sem á eftir kom.

Þetta mál snerist um afar flókin viðskipti sem átti frá því fyrsta að vera í höndum fagmanna í öllu viðskiptalegu tilliti.

Vilhjálmur er hinsvegar duglegur borgarfulltrúi sem þekkir þar alla innviði öðrum betur. Væri það gott fyrir borgina að henda honum út úr borgarstjórninni?

Ég er ekki viss um það.

Ég hef nefnilega miklu meiri áhuga á góðri stjórn í borginni en fíkn sjálfstæðismanna í vandræðagang, samanber dómaraklúðrið.

[Gestur Guðjónsson, 10.2.2008 kl. 22:21]

Hvenær losnar staða framkvæmdastjóra Sambands íslenskra sveitarfélaga. Er ekki að styttast í það?

[Auður (IP-tala skráð) 10.2.2008 kl. 23:03]

Þetta er afar góður pistill, Stefán Friðrik.  Mér þykir sárt að horfa á þessa atburðarás og hve ótrúlega illa þessi ágæti maður, Vilhjálmur, hefur höndlað það stórkostlega hlutverk að verða borgarstjóri í Reykjavík.  Það er eiginlega næstum ekki til að trúa því  hve gæfusnauður Vilhjálmur hefur verið á þessu sviði.  En ég tek undir með þér og mörgum öðrum, sem um þetta fjalla.  Vilhjálmur verður að víkja.  Því fyrr því betra.  Forysta  Sjálfstæðisflokksins verður að taka af skarið ef hann sér þetta ekki sjálfur.  Að hika er sama og tapa. 

[Þorgils Hlynur Þorbergsson (IP-tala skráð) 11.2.2008 kl. 00:18]

Sæll Stefán Friðrik.

Ég er sammála síðustu ræðumönnum. Þetta er vandaður og góður pistill um borgarmálin. Þú ert augljóslega maður með sterkar skoðanir. Vilhjálmur Þ. Vilhjálmsson stóð sig afskaplega vel sem borgarstjóri, þar til kom að REI-klúðrinu og þeirri sorgarsögu sem sigldi í kjöfarið. Það verður gríðarlega erfitt fyrir blessaðan manninn að ávinna sér nauðsynlegt traust á nýjan leik. En greinilegt er á öllu að hann er baráttumaður og vill reyna til þrautar. Farsælasta lausnin fyrir Sjálfstæðisflokkinn og Reykjavíkurborg í heild er sú, að þegar að borgarstjóraskiptum kemur í mars árið 2009 verði Hanna Birna Kristjánsdóttir borgarstjóri. Tillaga mín er sú að þá fari Vilhjálmur niður í sjöunda sætið, en allir hinir borgarfulltrúarnir hækki upp um eitt sæti sem því nemur. Gjarnan mætti það gerast sem fyrst. Þannig yrði hægt að leyfa honum að sitja í borgarstjórninni út kjörtímabilið, án þess að hann hafi of mikil áhrif, Þannig getur hann staðið við sitt — hann vill ekki hætta og yfirgefa skipið á miðju kjörtímabili. Þetta er virðingarverður hugsunarháttur. Vilhjálmur er vænn maður sem öllum vill vel. En hann verður að vita hvað hann segir og gerir. Enginn vafi leikur á því.

Nú er Ólafur Friðrik Magnússon orðinn borgarstjóri og þá er einmitt lag fyrir hann og Sjálfstæðisflokkinn að drífa sig við mislægu gatnamótin við Miklubraut/Kringlumýrarbraut. Einnig væri gott að finna svipaða eða sömu lausn við gatnamót Bústaðavegar og Sæbrautar/Reykjanesbrautar, þar sem umferðin getur orðið æði þung á álagstímum. Síðan er alltaf hægt að bæta við göngu- og hjólreiðastígum víðs vegar um borgina, ekki síst á milli hverfa. Hvernig er til dæmis núna hægt að hjóla á milli Laugardals og Árbæjar án þess að leggja sig í lífshættu? Nú er ég farinn að hugsa upphátt en ég vil umfram allt sjá eitthvað gerast í skipulags- og samgöngumálum. Af hverju gengur svona vel í Kópavogi? Af því að þar er unnið að framfaramálum af krafti! Mér líst vel á þessa 17 punkta sem Ólafur og sjálfstæðismennirnir lögðu fram — en þá þarf að láta hendur standa fram úr ermum og reyna umfram allt að leysa vandamál sjálfstæðismanna. Þeir ávinna sér varla traust í Reykjavík nema þeir standi við gefin loforð! Hvað flugvöllinn varðar finnst mér að hann megi vera í Vatnsmýrinni fram yfir næstu kosningar. Enginn veit hver framtíð F-listans eða Ólafs verður. Hvorki Margrét Sverrisdóttir né Guðrún Ásmundsdóttir standa með honum þó þær tilheyri sama lista á pappírnum. Ef Sjálfstæðisflokkurinn kemst til valda eftir næstu kosningar (og heldur völdum — vel að merkja —) má ræða flutning flugvallarins til Hólmsheiðinnar og byggð í Vatnsmýri, eins og Gísli Marteinn vill. En hver veit hvað framtíðin ber í skauti sér?

Ég bið þið þig, Stefán Friðrik, afsökunar á þessi pári mínu. Ég hef mikla samúð með Vilhjálmi Þ. Vilhjálmssyni og býst raunar við að hann dragi sig endanlega í hlé eftir næstu kosningar — hleypi nýju blóði og nýrri kynslóð til valda — ungu og metnaðargjörnu fólki sem vill Reykjavíkurborg aðeins það besta.

Með vinsemd og virðingu,

Þorgils Hlynur Þorbergsson.

[Helgi Jóhann Hauksson, 11.2.2008 kl. 01:57]

Mér finnst þetta virkilega sorglegt hvernig komið er fyrir „góða gamla Villa“ en pólitískri stöðu hans verður vart bjargað úr þessu. Hann er mannlegri en margir og kannski of mannlegur. En það verður að segjast eins og er að aðrir borgarfulltrúar Sjálfsstæðisflokks hafa ekki spilað vel úr sínum málum. Ég var vongóður um Júlíus Vífil en hann fór alveg með það þegar hann talaði þvers og kruss yfir og í kringum eigin staðhæfingar í fyrri lotu þessa máls. - Í raun er Hanna Birna ein eftir - og kannski er hún ekki eins ofur-agressív og manni hefur virst? - Á Sjálfstæðisflokkur nokkurn annan kost en að veðja á hana?

[María Anna P Kristjánsdóttir, 11.2.2008 kl. 11:37]

Ég er mjög ósátt við framkomu borgarstjórnarflokksins,með Villa í fararbroddi.Ég hefði kosið að þeir væru rólegir í minnihluta,og inni að sínum málum.Þeir hefðu getað komið sterkir inn í næstu kosningum,en það er búið að eyðileggja það,ég veit ekki hvernig fer í næstu borgarstórnar og alþingiskosningum ég hef  á tilfinningunni að það verði ljótt.,en vona samt ekki.

[Stefán Friðrik Stefánsson, 11.2.2008 kl. 13:16]

Þakka ykkur kærlega fyrir kommentin. Það er gott að heyra í öðrum með þetta. Mér finnst heiðarlegt að tala hreint út. Verður áhugavert að sjá hvað gerist. Í öllu falli sýnist mér stjórnmálaferli Vilhjálms lokið. Dagsetninguna vantar, hvort það er í dag eða síðar á tímabilinu er stóra spurningin.

mbk.