Páll Óskar rakar að sér verðlaunum

Það kemur ekki að óvörum að Páll Óskar hafi verið sigursæll á íslensku tónlistarverðlaununum. 2007 var árið hans; hann átti vinsælustu sumarsmellina, seldi heilu bílfarmana af plötunni sinni og byggði upp feril sinn að nýju. Það er því við hæfi að hann fái verðlaun og sést það best á netkosningunni hversu sterka stöðu hann hefur meðal landsmanna.

Björk vinnur enn og aftur. Mætti ekki frekar en mörg hin fyrri árin. Held að hún hafi unnið þessi verðlaun sjö eða átta sinnum síðustu fimmtán árin, kannski meira en það. Man það satt best að segja ekki. Það eru orðin svo lítil tíðindi að hún vinni að sömu mennirnir mæta alltaf og taka við verðlaununum. En hún á þau skilið, er söngkona á heimsmælikvarða og stóð sig vel með því að helga Tíbet lagið Declare Independence um daginn.

Fannst það súperflott að sjá meistara Rúnar Júl taka við heiðursverðlaununum. Hann er enn flottur kappinn, syngur á fullu og stendur sig vel. Það er flott statement að verðlauna poppgeirann með þessum hætti, en oft hafa söngvarar á lokum ferilsins unnið verðlaunin - vissulega átt þau skilið en þetta hafa mun frekar verið verðlaun viss geira tónlistarinnar og því gaman að sjá frontmann einnar bestu hljómsveitar sjöunda áratugarins fá þessi verðlaun. Á þau líka svo innilega skilið.

Gaman að sjá Hjaltalín taka verðlaun. Flott band og mér fannst platan þeirra með þeim betri á síðasta ári. Merkilegast að sjá að Sprengjuhöllin fór frekar sneypt frá velli, taldi þá myndu fá meiri sess á kvöldinu, en þeir áttu flotta plötu í fyrra, sem einhvernveginn varð tímamótaplata strax og hún kom út. En auðvitað var lagið Verðum í sambandi valið hið besta á síðasta ári - enda klárlega það lag sem mest var spilað síðasta sumar. Flott lag.

En kannski eru þessi verðlaun orðin stöðnuð og þarf að hrista þau upp. Það mætti eflaust eitthvað taka þau í gegn og stokka upp.

Páll Óskar og Björk söngvarar ársins

Athugasemdir

[halldór (IP-tala skráð) 19.3.2008 kl. 15:05]

Ég skil ekki þetta með Rúnna Júll, það er líklega ekki til annar íslendingur sem ber ábyrgð á eins mikilli rusl tónlist og hann á Íslandi. Nefni til leiks Halastjörnuna, hann trúði því að Hemmi Gunn gæti sungið og gaf út slatta af plötum þar sem þjóðarfíflið gólaði svo enginn gleymir sem heyrt hefur. Rúnni er er raulari, heldur varla tón og getur ekki samið tónlist sem hægt er að humma, mér fannst hann gera upp feril sinn í þessari beinu útsetningu í gær, mundi ekki eigin texta og þegar hann kom svo loksins þá var þetta þvílíkur leirburður að ég sökk í sófann og allir stóðu upp og klöppuðu....verð samt að taka ofan hatt minn fyrir honum að hafa lifað á því að vera tónlistarmaður í 45 ár, það sannar enn og aftur að túnglið er úr osti.