Obama að missa forskotið - slagurinn jafnast út

Það kemur ekki að óvörum að forskot Barack Obama á Hillary Rodham Clinton sé að gufa upp þessa dagana. Hann er stórlega skaddaður eftir ummæli fjölskylduklerksins, Jeremiah Wright, sem fór nærri því að grafa endanlega undan trúverðugleika hans í öryggis- og varnarmálum.

Obama skaðar sig enn meira með því að afneita ekki þessum klerki og reyna að veikum mætti að halda í böndin við hann, þegar að ljóst er að hvíta fólkið er mjög hugsi yfir málinu. Tapi Barack Obama útnefningarslagnum eða forsetakosningunum síðar meir verður þetta fíaskó með Wright talið örlagamálið sem gekk frá framboðinu. Þessar trúaráherslur sem boðaðar eru í fjölskyldusöfnuði Obama eru einfaldlega þess eðlis að efast er um grunn hans sem frambjóðanda.

Með því að afneita ekki klerkinum er hann í raun að skrifa upp á hann og rýrir trúverðugleika sinn í leiðinni. Það er líka merkilegt hversu lengi hann beið með að fordæma óverjandi ummæli Wright og sú bið stóð of lengi. Það sést á könnunum að Obama er að tapa stuðningi hvítra og margir hópar sem flykktust til hans eru í vafa. Þetta mál hefði orðið annað hefði fjölskylduklerkurinn ekki staðið jafn nærri rótum Obama og eiginkonu hans Michelle eins og raunin er. Þetta er skaðlegt mál sem grefur undan fylginu á viðkvæmustu stöðunum.

Það er eiginlega ómögulegt að segja til um hvernig að þetta fer að lokum. Eins og staðan er núna stefnir allt í að flokksþingið í Denver verði blóðugur bardagi um hvern einn og einasta þingfulltrúa. Það verður lítið stífelsisyfirbragð yfir þeirri samkundu og gæti orðið harkalegt pólitískt einvígi. Tel að Hillary muni vinna nokkuð góðan sigur í Pennsylvaníu og það gefur henni farmiða til að taka þennan slag alla leið. Obama getur þakkað fjölskylduklerkinum það ef að hann veikist meira í könnunum en orðið er.

Það er alveg ljóst að tíðindin um að ekki verði kosið aftur í Flórída boða það að hvorugur frambjóðandinn nái lágmarki þingfulltrúa til að hljóta útnefninguna í forkosningaferlinu. Það var reyndar í vafa með það fyrir, enda er þetta svo jafn slagur að fá dæmi eru um áratugum saman á þessum tímapunkti, síðla marsmánaðar.

John McCain er að græða stórlega á þessum hjaðningavígum. Á meðan að hann byggir baklandið fyrir átökin í nóvember logar Demókrataflokkurinn í hörðum átökum og ekki fyrirséð hvernig endar. En það er þó ljóst að staða Obama hefur veikst og spurt að leikslokum hvort að fjölskylduklerkurinn hafi grafið undan honum.

Hér má sjá hin frægu ummæli Jeremiah Wright - maðurinn er auðvitað snargalinn og mikil áhætta sem Obama tekur með því að afneita ekki þessum skaðvaldi.

Forskot Obama að hverfa

Athugasemdir

[Guðmundur (IP-tala skráð) 19.3.2008 kl. 14:46]

Bendi bara á þetta og þetta. Greinilega ekki sama hver er

[Stefán Friðrik Stefánsson, 19.3.2008 kl. 14:54]

Mér er nákvæmlega sama hvort aðrir eru betri eða verri. Þessi klerkur Obama-safnaðar hefur skaðað hann gríðarlega og kannanir staðfesta það. Þýðir ekkert að stinga höfðinu í sandinn með það. Þetta er alvöru krísa og þarna á hann á hættu að missa það fylgi sem hefði jafnvel tryggt honum forsetastólinn. Það eru miklar efasemdir. Hann átti að afneita þessum presti, enda gengur hann einum of langt. Verð að viðurkenna að ég hef miklar efasemdir um Obama, en ég hef oft lofað hann í skrifum hér og metið hann mikils og sögulegu tækifærin sem fylgja honum en hann hefur skaddast á þessu máli.

[Haraldur Haraldsson, 19.3.2008 kl. 15:18]

Algjörlega sammála þessu Friðrik, þetta mun skifta sköpum/Halli gamli

[Guðmundur (IP-tala skráð) 19.3.2008 kl. 15:21]

Þetta er held ég ekki spurning um hver sé betri eða verri, Schaefer er einungis að benda á hræsnina sem felst í því að Obama lendir í miklum "skandal" þegar predikari honum tengdur segir eitthvað óviðeigandi, en öllum virðist nákvæmlega sama þegar predikarar tengdir repúblikönum segja áþekka hluti. Segir líklega ansi mikið um stjórnmálaumræðu (eða skortinn á henni) í Bandaríkjunum, sem getur verið alveg ótrúlega yfirborðskennd.

Mér finnst það reyndar hugrakkt af Obama að afneita ekki klerkinum, enda hefði það verið "the easy way out".  

Annars reyni ég að láta mér standa á sama um frambjóðendur í þessum kosningum, enda ekki með kosningarétt í USA

[Stefán Friðrik Stefánsson, 19.3.2008 kl. 16:02]

Já, Páll, ég hef litla samúð með þessum klerki og Obama í þessari stöðu. Verð alveg að viðurkenna að ég hef þurft að hugleiða upp á nýtt hver grunnur þessa manns og hvernig hann er satt best að segja. Þetta er mjög skaðlegt mál og þýðir ekkert að moka yfir það.

Mér finnst þessi predikari ekki merkilegur pappír og hatrið sem vellur upp úr honum er ekki neinum til framdráttar, síst af öllum þessum frambjóðanda.

Hvað varðar annað er það alveg rétt að þetta er ekki kosning sem við getum skipt okkur af, en það hafa allir skoðun á því hverjir verði valdamestu stjórnmálamenn heims. Líst ekkert á það að trúarskoðanir þessa manns verði í hávegum hafðar mögulega af valdamesta manni heims, segi það alveg hreint út.

[Guðmundur (IP-tala skráð) 19.3.2008 kl. 16:08]

En það er þá væntanlega endanlega búið að drepa goðsöguna um að Obama sé í rauninni múslimi, ekki satt?

[Árni Steingrímur Sigurðsson, 19.3.2008 kl. 19:42]

Ef þið viljið sjá viðbrögð Obama við þessu, skoðið þá nýjustu færsluna á http://beltiras.blog.is

Skv. heimldum mun hann hafa samið þessa ræðu sjálfur, án teljandi aðstoðar ræðuhöfunda.