Fáránlegar kröfur - ansi langt gengið hjá Árna

Missti endanlega alla virðingu fyrir Árna M. Mathiesen, fjármálaráðherra, við framgöngu hans nýlega í þjóðlendukröfum á svæðum hér. Þar er lýst kröfu á efri hluta fjallsins Súlur og auk þess ásælist fjármálaráðherra í nafni ríkisins vatnsból Akureyringa. Finnst ansi langt gengið í þessu og velti því fyrir mér hversu lengi enn fjármálaráðherra muni ganga í fáránlegum þjóðlendukröfum sínum.

Í kosningabaráttunni hér í fyrra var mjög deilt á verklag ráðherrans og var það sérstaklega gott að Kristján Þór Júlíusson, fyrsti þingmaður kjördæmisins, tók undir það. Er ánægður með að Sigrún Björk Jakobsdóttir, bæjarstjóri, hefur talað mjög ákveðið í þessum efnum og ætlar að standa vörð um þetta svæði. Það verður ekki gefinn þumlungur eftir.

Það væri gott að heyra sama sjónarmið hjá Kristjáni Þór Júlíussyni, forseta bæjarstjórnar og fyrrverandi bæjarstjóra, í fjölmiðlum. Hann er leiðtogi Sjálfstæðisflokksins í kjördæminu og fyrsti þingmaður okkar og þarf að tjá sig um þetta mál, sem kjörinn fulltrúi í bæjarstjórn og á Alþingi í okkar nafni. Er þó ekki í vafa um að hann er sömu skoðunar og bæjarstjórinn.

Eftir allt sem á undan er gengið finnst mér undarlegt að ríkið reyni enn að seilast þetta langt í þjóðlendukröfum. Þeim þarf að mótmæla af krafti. Hvað varðar ráðherrann finnst mér hann ekki rísa hátt eftir þessa framkomu.

Athugasemdir

[Ólafur Hannesson (IP-tala skráð) 14.4.2008 kl. 08:54]

Það hefur verið farið frekar óvarlega í þessum málum, og spyrja margir sig hver ástæðan sé fyrir þessu.   Ég er sammála þér, það má ekki láta þetta ganga áfram án þess að setja stólinn fyrir dyrnar, og gefa frekari skíringar á þessum kröfum, ekki bara þarna fyrir norðan heldur út um allt.

mbk

Óli 

[Davíð Þór Kristjánsson, 14.4.2008 kl. 08:58]

Sæll Stefán, ég skil sjónarmið þín og þetta er eflaust mjög heitt mál á Akureyri. Mér finnst varhugavert að binda þessa kröfu eingöngu á Árna en krafan er fyrir hönd ríkisins og hefur væntalega stuðning ríkisstjórnarinnar. Árna hefur unnið að mörgum góðum málum í gegnum tíðina þó þetta sé ekki endilega eitt af þeim, vert að nefna hvernig hann hefur beitt sér í samgöngumálum sérstaklega svo sómi sé af.

 Ekki skjóta sendiboðann Stefán :)

[Jón Ingi Cæsarsson, 14.4.2008 kl. 09:07]

Þessar kröfur er hreint fáránlegar. Með þessum gjörningi væri Akureyri svipt skipulagsvaldi á helstu útivistarsvæðum bæjarins svo sem skíðasvæðinu í Hlíðarfjalli og útivistarsvæði framtíðarinnar Glerárdal. Hæðarlínan liggur um 800 metra og þá færi efsti hluti skíðasvæðis...stór hluti svæði af neysluvatnssvæðum okkar fer undan okkar yfirráðum og nú er ferli sem hefur verið í vinnslu..í uppnámi.

[Jón Valur Jensson, 14.4.2008 kl. 09:14]

Sammála þér, Stefán, eftir að hafa lengi fylgzt með þessum þjóðlendumálum (sbr. þessa efnismöppu vefgreina: Jarðeignamál kirkju og bænda; þjóðlendur). Það er spurning, hvort Árna þessum haldist lengi á því að vera 1. þingmaður stærsta landbúnaðarsvæðisins, Suðurlandskjördæmis. Hverjir báðu um hann þangað?

[Gísli Baldvinsson (IP-tala skráð) 14.4.2008 kl. 09:45]

Það er annað frumvarp um landsskipulag sem nánast gerir ráð fyrir að skipulags- og bygginganefndir sveitarfélaga færist til ríkisins. Það þarf að stoppa. http://www.samband.is/files/379854380umsogn_skipulags.pdf

[Kári S. Lárusson (IP-tala skráð) 15.4.2008 kl. 18:40]

Sæll Stefán.

Mér finnst Árni hafa gjaldfellt sig ansi hressilega. Sama finnst mér um samráðherra hans Einar Kr. Guðfinnsson landbúnaðarráðherra. Það mætti halda að þessir menn væru illa haldnir af sósíalisma. Ég skammast mín fyrir þá báða fyrir hönd míns flokks. Aldrei í sögunni hafa jafn hatrammar árásir verið gerðar á bændastéttina. Hvað varð um kjörorðið gamla "Stétt með stétt" ? Þessum mönnum er varla sjálfrátt, nema þeim sé vits vant, sem er auðvitað mögulegt.

Vísa hér í ársgamlan pistil sem ég skrifaði um þessi málefni.

Kveðja,

Kári Lár.

[Fannar frá Rifi, 15.4.2008 kl. 22:15]

Það virðist á öllu að sammþykktir síðasta landsþings séu virt að vettugi af Árna.

Þjóðlendur ættu í messta falli að verra 100 til 200 km frá sjó.  Þjóðlendur eiga að vera á miðhálendinu ekki niðri í bæum eða nánast ofan í fjöru eins og sumar kröfurnar voru um. 

Þetta er messta skömm flokksins fyrr og síðar. Það mun lengi verð í minnum haft slíkt eignarnám. 

í mínum huga gildir = ef ríkið tók skatt af því þá áttu það og ríkið er búið að viðurkenna þinn eignarrétt. 

[Stefán Friðrik Stefánsson, 15.4.2008 kl. 23:54]

Takk kærlega fyrir kommentin. Gott að heyra skoðun ykkar á þessu máli. Tala hreint út sjálfur og finnst það mikilvægt. Þetta er einum of, kröfur sem fara langt yfir allt eðlilegt. Tek sérstaklega undir með þér Fannar. Gott innlegg hjá þér félagi.

mbk.