Hillary afhjúpar veikleika Obama með sigri í WV

Sigur Hillary Rodham Clinton í Vestur-Virginíu sýnir mikla veikleika í framboði Barack Obama en mun væntanlega ekki koma í veg fyrir að hann nái útnefningunni á næstu vikum. Hillary hefur barist af miklum krafti síðustu dagana gegn öllum þeim sem hafa talið hana af og sýnt að hún er mjög dugleg og einbeitt í baráttu sinni þrátt fyrir að valkostunum í baráttunni fækki.

Þó að sífellt verði erfiðara að sannfæra aðra um að framboðið nái á leiðarenda ferðast hún um fylkin sem eiga eftir að kjósa og talar eins og hún eigi enn alvöru séns. Hvernig sem allt fer á næstunni má hún vera stolt af sinni framgöngu og eiginlega hefur hún sýnt alla bestu kosti sína síðustu vikurnar, rétt eins og baráttan gekk illa framan af og hún missteig sig á lykilhluta baráttunnar. Sennilega voru mestu mistökin eftir kosninguna í Suður-Karólínu og í kjölfar stóra þriðjudags í febrúar.

Hillary hefur nefnilega verið að standa sig mjög vel að undanförnu og náð að eiga endurkomu í slaginn með mikilvægum sigrum síðustu vikurnar eftir að hafa höktað. Þau mistök verða henni dýrkeypt en hún hefur með sigrunum að undanförnu sýnt að Obama á erfitt með að sparka henni úr slagnum. Sama hversu illa hefur verið talað um hana og þrátt fyrir kjöraðstæður Obama að ná að klára dæmið skýst hún alltaf aftur í slaginn og nær að fá alla til að velta fyrir sér hvort að hann geti verið sterkur frambjóðandi þrátt fyrir að tölfræðin í þessum slag sýni að hann sé í raun búinn.

Efasemdir um Obama eru miklar, einkum vegna þess að greinilegt er að honum tekst mjög illa að ná alþýðufylginu; verkafólki, konum og eldri borgurum. Auk þess er hann veikur í hópi hvítra kjósenda í fylkjum síðustu vikurnar. Hann hefur aldrei náð þessum hópum almennilega á sitt band og þar er stærsta spurningamerkið í stöðunni. Þetta er aðaltrompið hennar Hillary, er eiginlega að verða það eina sem eftir er fyrir hana að tala fyrir eftir því sem slagurinn verður langdregnari og alltaf verði undrunin meiri af hverju Obama hafi ekki náð að klára dæmið.

Möguleikar Hillary eru mestir í baráttunni með því að benda á veikleika Obama, sem skýrast koma fram í Vestur-Virginíu. Þrátt fyrir að flokkselítan og ofurfulltrúar séu að færast á band Obama er enn spurt hversvegna hann geti ekki náð að klára dæmið með sigrum í þessum týpísku fylkjum hvítra kjósenda sem helst hafa stutt Hillary.

Þó að dæmið sé metið búið og allt virki slétt og fellt, Obama í hag, nær hann ekki að slá Hillary út sannfærandi og án hiks. Þetta eru stóru efasemdirnar núna, sem verða bráðum aðalpælingin um hvort hann geti sigrað í nóvember. Ekki er hægt að segja annað en þessar veigamiklu staðreyndir séu hróplega áberandi þessa dagana.

Nú sýna kannanir að flestir demókratar vilji að Hillary verði við hlið Obama í forsetakosningunum í nóvember, sem varaforsetaefni hans, þó minnihluti stuðningsmanna Obama vilji það. Sá möguleiki er uppi á borðinu, enda blasir við að Obama verður að fá stuðning þeirra sem styðja Hillary eigi hann að geta unnið í nóvember.

Hið stóra verkefni Obama, þegar hann nær útnefningunni, verður að svara þeirri spurningu með strategíusnillingum sínum hvernig hann höfði til þeirra sem stutt hafa Hillary síðustu vikurnar og tryggt henni baráttukraft svo lengi í slag við mann sem hefur nóg af peningum og allt sem þarf til að klára dæmið.

Ef hann vill ekki Hillary sér við hlið verður hann að horfa í þá átt engu að síður, þ.e.a.s. ef hann vilji vinna kosningarnar. Veikleikar hans eru augljósir og Hillary er að sýna þá allra best með því að lengja lokahrinu baráttunnar.

Clinton vann í Vestur-Virginíu

Athugasemdir

[Þroftur (IP-tala skráð) 14.5.2008 kl. 01:25]

Það virðist vera löngu gleymt hver var (og er) hinn raunveruleg underdog í þessari baráttu.  

Það er öllu snúið á haus .... með fullri virðingu Stefán...  í þessum pistli hjá þér.

[Stefán Friðrik Stefánsson, 14.5.2008 kl. 01:29]

Hvað er rangt í þessum pistli? Af hverju hefur Obama ekki klárað forkosningaferlið með afgerandi hætti? Það hefur ekki tekist enn. Þrátt fyrir atburðarás síðustu dagana vinnur Hillary enn sigra og það einn mest afgerandi forkosningasigur sinn í baráttunni á þessu kvöldi þegar að flest sund virðast lokuð. Staðan núna afhjúpar veikleika í baráttu Obama. Það er ekki hægt að neita því.

[Sigurður Viktor Úlfarsson, 14.5.2008 kl. 02:54]

Obama mun aldrei taka Hillary með sér í Hvíta húsið enda efast ég fastlega um að hún vilji það.  Hún er of sterkur "charismatic" leiðtogi til að vera í aftursætinu með öðrum.

Hann gæti tekið t.d. John Edwards með sér.  Hann er svona passlega öflugur til að setjast í aftursætið, hvítur og sætur án þess að vera of afgerandi og þeir gætu hugsanlega orðið nokkuð öflugt lið saman.

[Halldór Ingvi Emilsson, 14.5.2008 kl. 16:06]

Er ekki hægt að hugsa þetta frá hinni hliðinni líka?

Að Hillary hefur engan veginn tekist að slá Obama út úr baráttunni á sannfærandi hátt svo eru ekki stórar efasemdir um hvort að hún geti mögulega klárað þetta í Nóvember?