Geir sakar fréttamann um að sýna dónaskap

Geir H. Haarde, forsætisráðherra, sakaði Sindra Sindrason, fréttamann Markaðarins á Stöð 2, um dónaskap þegar hann var inntur eftir aðgerðum stjórnvalda í efnahagsmálum. Reyndi Sindri að fá viðbrögð og elti Geir inn í Stjórnarráðshúsið en fékk þessa orðaleppa frá forsætisráðherranum í staðinn þegar spurt var eðlilegra spurninga.

Mér finnst eðlilegt að spyrja sig að því hvers vegna forsætisráðherrann geti ekki svarað eðlilegum spurningum um efnahagsmál þegar eftir því er leitað og auk þess sýnt almennilega kurteisi. Mér fannst svör forsætisráðherrans ekki viðeigandi og spyr mig að því hvers vegna spurningum er ekki bara svarað. Þessi mál eru þess eðlis að allir spyrja sig að því hvað gera eigi og hvað stjórnvöld ætli sér að gera í stöðunni.

Að saka fréttamann sem vill aðeins heiðarleg svör frá þeim sem stjórna landinu um dónaskap er ekki til sóma.

Hér á eftir fara samskipti þeirra:

Sindri: „Jæja, hvar eru peningarnir sem eiga að komast inn í landið?"
Geir: „Á þetta að vera viðtal?
Sindri: „Já, ég myndi vilja heyra aðeins um þetta..."
Geir: „Þú verður að hafa samband fyrir fram."
Sindri: Geir, þjóðin náttúrlega bíður eftir einhverjum aðgerðum frá ríkisstjórninni. Geturðu ekki gefið okkur smá komment?"
Geir: „Ég vildi gjarnan gera það, Sindri, ef þú hagaðir þér ekki svona dónalega."

Athugasemdir

[Huld S. Ringsted, 13.6.2008 kl. 13:21]

Æ þetta var ósköp hallærislegt hjá Geir og ég skil ekki alveg þessi viðbrögð hjá honum.

[Olgeir Marinósson (IP-tala skráð) 13.6.2008 kl. 13:35]

Staðreyndin er sú að Geir hefur engin svör. Ríkistjórn og Seðlabanki virðast vera algjörlega máttvana gagnvart þessari kreppu sem er dýpri en nokkurn gat órað fyrir. Þetta hefur farið úr snertilendingu í brotlendingu.

[Gísli Baldvinsson (IP-tala skráð) 13.6.2008 kl. 14:35]

Kauðslegt. Hver sér eiginlega um PR fyrir GHH?

[Ólöf Jóhanna Pálsdóttir, 13.6.2008 kl. 20:05]

Eðlilega liggja spurningar á vörum fólks og von að það vilji svör. Kurteisi kostar ekkert og það ættu ráðamenn Alþingis að vita og temja sér.

[Kári S. Lárusson (IP-tala skráð) 13.6.2008 kl. 20:13]

Sæll Stefán.

Þetta sannar bara það sem ég hef ítrekað bent á á mínu bloggi, að Geir virðist vera talsvert hrokafullur.

Kannski ætti hann að íhuga að "dramb er falli næst".

Sem Sjálfstæðismaður skammast ég mín fyrir hegðun Geirs í þessu tilfelli.

Kveðja,

Kári Lár.

[Steini (IP-tala skráð) 13.6.2008 kl. 20:47]

Þetta er a.m.k.k í annað skiptið á innað við viku sem Geir svarar svona önugt - þegar fréttamaður spurði hann hvort hann hefði komið að því að Vilhjálmur Þ. "hætti" þá svaraði hann því önugt að spurningin ætti ekki rétt á sér.

Þessi maður á ekkert heima í forsætisráðuneytinu...

[Heimir Eyvindarson, 13.6.2008 kl. 21:28]

Það virðist fara óskaplega í taugarnar á Geir að menn séu að skipta sér af honum. Fréttamenn sem leita svara við ofur eðlilegum spurningum eru ýmist dónar eða "gerendur eineltis". Ótrúlega hrokafullt af honum. Kemur mér talsvert á óvart verð ég að segja.

[Jón Ingi Cæsarsson, 14.6.2008 kl. 13:30]

Hallærislegt hjá Geir... ég held að þið Sjallar þurfið að taka Geir Haarde og Árna Matthiessen á námskeið í fjölmiðlaviðmóti og mannlegum samskiptum