Góð skrif Björns - pólitísk sáluskil í Framsókn

Björn Bjarnason, dómsmálaráðherra, skrifar ítarlegan pistil um ummæli Jóns Sigurðssonar, viðskiptaráðherra og formanns Framsóknarflokksins, á miðstjórnarfundi um Íraksmálið. Þar vék Jón klárlega af braut yfirlýsinga Halldórs Ásgrímssonar, verðandi framkvæmdastjóra Norrænu ráðherranefndarinnar, sem var utanríkisráðherra á árunum 1995-2004 og forsætisráðherra 2004-2006, í þeim málum.

Virðist það einna helst líta út sem örvænting vegna stöðu flokksins, enda hefur Jón áður ekki tekið svo sterkt til orða og í frægu viðtali við Helga frænda minn Seljan á Stöð 2 í sumar vildi hann ekki taka svona til orða og fór í mikla og augljósa vörn fyrir Halldór í þessu máli, en segja má að Íraksmálið hafi mála mest sett mark á forsætisráðherraferil Halldórs og skaðað hann pólitískt gríðarlega mikið. Deilur um þetta mál voru innan flokksins en Halldór gerði það ekki upp áður en hann hætti.

Mér finnst Björn skrifa um þetta mál mjög vel, eins og hans er von og vísa. Enda löngu ljóst að Björn er sá þingmanna flokksins sem mesta þekkingu hefur á utanríkis- og varnarmálum. Er ég sammála Birni í því að það veki mikla athygli að nýr formaður annars stjórnarflokksins, sem að auki á engan pólitískan bakgrunn í forystusveit íslenskra stjórnmála, ræði um fjögurra ára gamla atburði sem meginpunkt pólitískrar stefnuræðu á vettvangi flokksins og skilji við slóð og forystu Halldórs Ásgrímssonar, svo skömmu áður en hann heldur til starfa í Kaupmannahöfn. Það er öllum ljóst að Jón telur þetta mál vera steinbarn fyrir flokkinn og slítur á tengsl fyrri tíma.

Mér finnst það vera orðið átakanlegt fyrir Framsóknarflokkinn hversu tómur formaður þeirra er í raun. Þar vantar alvöru pólitískt bit við að greina mál dagsins í dag. Það er svolítill blanko-svipur yfir Jóni, það er bara þannig. Hann er mikill heiðursmaður tel ég og vandaður í alla staði, en mér finnst pólitík hans vera mjög ósýnileg. Það er orðið mjög áberandi.

Ég hélt þegar að Jón var kjörinn formaður á flokksþinginu í ágúst, eftir snarpan slag við Siv Friðleifsdóttur, að hann myndi þá þegar hefjast handa við að kynna sig og sína pólitík. Síðan hefur hann haldið spilum sínum mjög fast að sér. Staða flokksins hefur ekki skánað hætishót eftir kjör hans og fyrri væringar og sundrung lama enn innviði flokksins. Enn er ekki heldur vitað hvaða áhrif fall Sleggjunnar í Norðvestri hefur og enn veit enginn hver þessi formaður er pólitískt.

Stjórnmálamaðurinn Jón Sigurðsson flutti sína fyrstu alvöruræðu í stjórnmálum sem sáluskil yfir síðustu misserum stjórnmálaferils Halldórs Ásgrímssonar og hreinsaði loft væringa og óeiningar innan flokksins. Þar sáum við enga framtíð, enga stefnu né grunnpunkta þess sem Jón ætlar að verða flokknum. Þar var litið í baksýnisspegil átakanna og þau vissulega greind. Vel má vera að það gagnist eitthvað þessum flokki sem hefur upplifað annus horribilis ekki bara síðasta árið heldur öll ár kjörtímabilsins til þessa. Sorgarsaga er rétta orðið. Í ræðunni sáum við ekki neitt nýtt til framtíðar.

Hver er Jón Sigurðsson? spurði ég í pistli í ágúst eftir formannskjör. Í nóvember er þeirri spurningu enn ósvarað. Er Framsóknarflokknum á vetur setjandi með blanko formann? Stórt spurt, svörin vantar.

Hver er Jón Sigurðsson? - pistill í ágúst 2006

Björn: Ríkisstjórn Íslands bar enga ábyrgð á innrásinni í Írak

Athugasemdir

[Villi Asgeirsson, 26.11.2006 kl. 14:48]

Björn skrifar vel um málið? Ég var að skrifa færslu um það sem hann sagði. Væri gaman að heyra hvað þér finnst um hana.

[Sigrún Sæmundsdóttir, 26.11.2006 kl. 20:53]

 Mér finnst nú Jón vera búin að fara hring frá því að hann tók við formennsku. Hann hefur ekki alltaf verið sammála sjálfum sér. Svo er eitt, að mér finnst hann svara fréttamönnum  oft á tíðum með svo miklum hroka og pirringi, eins og sé að tala við óþekktarorma.  Ef honum líkar ekki orðalagið við spurningum þá fer hann í svo mikla vörn, verðu svo pirraður og hreytir orðunum út úr sér.

 En nú er gaman að vita hvað flokkurinn segir við Kristinn H. Hann var aldrei sammála þeim í Íraksmálinu og virðist vera sá eini  sem hefur haft vit fyir þeim í því máli miðað við það sem Jón segir þarna á miðstjórnarfundinum.