Sextán ára á 101 - háskaakstur í umferðinni

Væri áhugavert að vita hvað sextán ára strákurinn var að spá þegar hann keyrði á 101 km hraða á fjórhjólinu með vin sinn aftan á. Kannski er það bara orðið þannig að fólk gefur í án þess að hugsa og fer jafnvel af stað út í umferðina án þess að hafa próf. Auðvitað kitlar það að prófa en fiktið getur verið banvænt í þessu tilfelli.

Þessi áhætta er sem rússnesk rúlletta. Ökumaðurinn setur sjálfan sig í lífshættu með slíku aksturslagi og þann sem ferðast með honum. Sem betur fer fór vel miðað við aðstæður en þarna hefði getað farið mjög illa. Lögreglan verður að taka á svona málum, enda bein almannahætta um að ræða.

En þetta er svosem ekkert einsdæmi. Verst af öllu er að þrátt fyrir fjölda hraðakstursmála sé alltaf nóg af þeim sem hugsa ekkert um afleiðingar hraðaksturs og taka áhættuna fyrir sig og aðra í umferðinni.

Þrátt fyrir allar auglýsingar og baráttu gegn hraðakstri lærir fólk ekki af reynslunni. En ég held að þessi sextán ára strákur eigi eftir að læra eitthvað af þessu, ætla rétt að vona það allavega.

Ungur ökuníðingur handtekinn

Athugasemdir

[Gunnar Kr., 11.8.2008 kl. 02:04]

Sæll Stefán.
Ekki alveg rétt hjá þér að ökumaðurinn hafi sett sjálfan sig í lífshættu með slíku aksturslagi og þann sem ferðast með honum, því þú gleymir öllum vegfarendunum sem á vegi þeirra urðu og hann hefði getað keyrt á. Þeir voru líka allir í bráðri lífshættu.

Júlli, ökukennarinn minn, sagði einusinni við mig: Það skiptir engu máli hversu varlega þú ekur í umferðinni, þú þarft líka að gera ráð fyrir öllum hálfvitunum sem keyra eins og brjálæðingar og geta keyrt á þig. 

[Stefán Friðrik Stefánsson, 12.8.2008 kl. 10:52]

LF: Það er gott að taka sveiflu á bíl en það verður að fara með gát miðað við aðstæður. Auðvitað er ekki eðlilegt þegar sextán ára ólögráða einstaklingur sem ekki hefur bílpróf fer á svona hraða út í umferðina. Alvarlegt mál. Það verður að taka á aðstæðum í hvert skipti. En það er mannlegt að vilja keyra hraðar, hef fullan skilning á því. Það þarf hinsvegar að hugsa um fleiri en sjálfan sig og keyra eftir aðstæðum.

Gunnar: Alveg sammála. Leitt ef þessi punktur hefur ekki komið fram að þínu mati. Auðvitað var þessi ólögráða og próflausi ökumaður að stefna öllum í umferðinni í stórhættu.

mbk.