Sarah Palin í aðalhlutverki - Obama kominn í vörn

Sarah Palin, varaforsetaefni repúblikana, hefur haft mikil áhrif á baráttuna um Hvíta húsið og náð þar traustu aðalhlutverki. Hún skyggir mjög á Joe Biden og hefur á nokkrum dögum tekist að gera meira fyrir framboð John McCain en nokkur annar sem hefur lagt honum lið í kjölfar þess að hann náði útnefningu repúblikana fyrir hálfu ári. Best sást þetta í dag er flytja varð framboðsfund hennar og McCain í Virginíu á annan stað þar sem áhuginn er mun meiri á framboðinu.

Ef marka má kannanir hefur Sarah Palin gjörbreytt stöðu mála í kosningabaráttunni. Forysta McCains í könnunum hefur aukist í dag og verður traustari í lykilfylkjunum, nú hefur McCain t.d. náð forskoti í Virginíu, sem Obama hefur lagt mikið á sig að vinna, fyrstur demókrata frá árinu 1964. Hvítar konur styðja nú McCain í auknum mæli og hann hefur stóraukið forskot sitt meðal óháðra kjósenda og þeirra sem eru ákveðnir að mæta á kjörstað.

Ekki fer á milli mála að Sarah Palin hefur sótt sér traustan sess í baráttunni og hún er nú bæði ferskasti frambjóðandinn í baráttunni og líka sú sem gæti tryggt mestar breytingar í Washington. Allt í einu er Barack Obama kominn í mikla vörn - hefur misst frumkvæðið í átökunum. Nú þarf hann að verja sjálfskipaðan sess sinn sem maður breytinganna í Washington. Greinilegt er að Obama tekur því mjög illa að vera ekki lengur ferskasti frambjóðandinn í þessari kosningabaráttu og reynir allt sem hann getur til að slá Palin við.

Lykilpunktur í velgengni Obama allt frá upphafi í forkosningum demókrata var að hann væri sá sem myndi tryggja breytingar í Washington og væri ferskasti frambjóðandinn. Ef hann missir þann sess hefur hann misst trausta undirstöðu undir framboð sitt. Því er ekki óeðlilegt að demókratar séu hræddir og óttist sterka frammistöðu Söru. Fram til þessa hafa árásir á hana ekki haft nein áhrif. Hún virðist styrkjast við hverja raun og hverja atlögu demókrata og blaðamannahópsins í Washington.

Ef Obama nær ekki að endurheimta fyrri stöðu og styrkleika er illt í efni fyrir hann. Ég hallast að því að Obama muni ekki ná að tækla Söru Palin. Staða hennar er augljós sem frambjóðanda breytinganna í forsetaslagnum. Því verður ekki neitað. Hún hefur aldrei búið eða starfað í Washington. Vonlaust verður fyrir Obama að tengja hana við þá sem ráða þar för. Dæmt til að mistakast. Eina leið Obama felst í því að ráðast að McCain og verkum hans í Washington.

Í gær var Hillary Rodham Clinton í Flórída með fund fyrir Obama. Hún réðst þar ekki beint að Söru Palin og greinilegt að hún ætlar ekki að vera varðhundur fyrir Obama og taka að sér skítverkið sem felst í árásum á Palin. Vonbrigði fyrir Obama. Biden virðist ekki ná neinu sviðsljósi og þetta er allt undir Obama sjálfum komið. Hann þarf að verja eigin sess með beinum árásum á Palin.

Fjarri því er víst að það takist. Það gæti komið út sem karlrembulegar árásir og hroki hans við að verja sess sem önnur manneskja hefur tekið af honum. Þetta er því viðkvæm staða og demókratar eru í vörn, hafa misst hluta af veigamestu undirstöðunni undir Obama og reyna að sækja þann sess aftur. Mistakist það er baráttan töpuð.

Staðan er einfaldlega sú að Palin hefur sess við hlið beggja forsetaefnanna á meðan Biden er til hliðar. Æ augljósara er að Obama veðjaði þar á rangan hest, mann sem virðist dæmdur til að gleymast í átökunum.

Palin fékk dagpeninga fyrir að vera heima

Athugasemdir

[Erna Hákonardóttir Pomrenke, 11.9.2008 kl. 12:11]

Takk fyrir skrifin. Stebbi, ég fór á framboðfund þeirra McCain og Palin í gær  eins og þú getur séð á síðunni minni. Þetta er rétt hjá þér að það þurfti að flytja fundin um stað vegna mikillar aðsóknar í miða. Þarna voru yfir 23.000 manns og garðurinn var troðfullur. Rétt eins og á rokk konsert. Þegar Obama var á svæðinu fyrr í sumar leigði hann Nissan Pavilion sem tekur yfir 20.000 manns en aðeins 10.000 létu sjá sig og það var áður en Sarah Palin kom inn í spilið.