Leiðarljós Vigdísar - sameiningartáknið sanna

Mér þótti mjög vænt um að heyra í Vigdísi Finnbogadóttur í þættinum Sjálfstæðu fólki á Stöð 2 fyrir viku. Rödd Vigdísar og boðskapur hennar var mikilvægt leiðarljós í þeim efnahagsþrengingum sem dynja á íslensku þjóðinni í skammdeginu. Mér hefur alltaf þótt vænt um Vigdísi og finnst mikils virði að hún tali til fólksins í landinu. Hún hefur mikið fram að færa og hefur þann trausta styrkleika að njóta trausts og stuðnings allra. Þó tólf ár séu liðin frá því að hún flutti frá Bessastöðum er hún og verður alla tíð forseti í huga okkar allra.

Vigdís var sameiningartákn þjóðarinnar um langt skeið og er það í raun enn. Á þeim tímum þegar forseti Íslands, sem ætti að öllu eðlilegu að vera sameiningartákn þjóðarinnar, er ekki lengur traustsins verður og hefur farið svo illa úti í efnahagshruninu verður rödd Vigdísar enn meira virði. Við getum treyst því að hún talar af visku og sannleika um stöðuna og hefur þann sess að vera hafin yfir þessar átakalínur - ein af fáum landsmönnum sem allir geta treyst til að tala einlægt og án þess að hefja sjálfa sig upp.

Slíkt er og mikils virði. Eftir að Sigurbjörn biskup dó eru mjög fáir sem eru svo einstakir í þessu samfélagi að vera hafin yfir átök og hversdagslegt blaður. Vigdís er ein af þeim og verður enn mikilvægari fyrir vikið í huga landsmanna.

Íslendingar verða að endurheimta virðinguna

Athugasemdir

[Alexandra Briem, 19.11.2008 kl. 15:24]

Alveg sammála. Ég er kannski ekki alltaf sammála Vigdísi í einu og öllu, en ég held að sá Íslendingur sé ekki til sem ber ekki bæði mikla virðingu fyrir henni og treystir henni til að vera heiðarleg.

[Kári S. Lárusson (IP-tala skráð) 19.11.2008 kl. 16:04]

Sæll Stefán.

Ég er algerlega sammála þér. Á þeim viðsjárverðu tímum sem nú ríkja í þjóðfélaginu væri æskilegt að eiga í forsetanum sameiningartákn, sem öll þjóðin gæti borið virðingu fyrir.

Staða núverandi forseta er ekki með þeim hætti. Hann var að mínum dómi bæði kórstjóri og hirðfífl útrásarkrimmana sem settu þjóðina næstum á hausinn og því varla hægt að bera mikla virðingu fyrir honum.

En Vigdís er alger perla, bæði að vitsmunum og mannkostum. 

Með kveðju,

[Nína S (IP-tala skráð) 19.11.2008 kl. 16:15]

Já, ég heyrði pistilinn frá Spáni. Í viðtali við blað þar úti hafði Vigdís orðað efnahagsvanda okkar í örfáum, afar kurteislegum en djúphugsuðum setningum þegar hún talaði um bankana og orðstírinn út á við. Auk þess að leggja áherslu á að kvenlegs innsæis og hugsunarháttar væri þörf við þessar aðstæður.  Það orðar þetta enginn betur en Vigdís, vel valin orð hennar, án ásökunar út í einn né neinn, það ER tær snilld.