Geir fikrar sig í Evrópusambandsátt

Enginn vafi er á því að forysta Sjálfstæðisflokksins sýnir afgerandi merki þess nú að lagt verði upp með Evrópusambandsaðild á landsfundinum eftir fimmtíu daga og það verði í raun niðurstaða Evrópunefndarinnar. Ummæli Geirs H. Haarde í morgun eru mjög afgerandi stefnubreyting frá því sem verið hefur undanfarin ár og kom t.d. fram á fundi í Valhöll síðast í haust þar sem hann beinlínis lokaði umræðunni með þeim orðum að þetta kæmi ekki til greina. Nú hefur hann sjálfur opnað dyrnar og er augljóslega að feta sama stíg og Friðrik Sophusson talaði um í Moggaviðtali um daginn.

Mér finnst þetta vera mjög hönnuð atburðarás, svo ekki sé nú meira sagt. Geir hefði vissulega getað komið fram á blaðamannafundinum með Þorgerði Katrínu um daginn og sagt hreint út hvert hann vildi að væri veganesti nefndarinnar og um leið sína eigin skoðun nú. Í staðinn kemur það fram í einhverjum skömmtum og fikrað sig í áttina. Um leið verður æ augljósara að niðurstaða nefndarinnar verður í samræmi við það sem Geir og Þorgerður hafa lagt upp með.

Ég á von á mjög líflegum viðræðum um Evrópusambandið á landsfundinum. Þar verður hin endanlega niðurstaða tekin og væntanlega munu ekki allir verða sáttir við hana, ef marka má hin afgerandi skilaboð formannsins. Hitt er aftur á móti alveg ljóst að mikilvægt er að niðurstaða fundarins verði skýr en ekkert hálfkák, hvort svo sem öllum líkar það.

Aðildarviðræður koma til greina

Athugasemdir

[Óðinn Þórisson, 6.12.2008 kl. 14:15]

Sammála þér Stefán að niðurstaðan verður að vera skýr.
GHH hefur sagt að flokkurinn muni nálagast þetta fyrst og fremst út frá  hagsmunum Íslendinga.
Var að hlusta á BGS í morgun og miðað við hvernig ég a.m.k túlkaði hans orð þá er það ljóst að framhald ríkisstjórnarinnar veltur á hvað kemur út úr landsfundi Sjálfstæðisflokksins.

[Gísli Ingvarsson, 6.12.2008 kl. 17:22]

Predíkun dagsins: Ef menn óska eftir samningaviðræðum þá þýðir ekkert hálfkák. Þess vegna fæ ég ekki séð hvernig forysta sjálsftæðismanna ætti að koma að því máli. Við erum ekkert að þessu til að sjá hvaða vörur eru í ESB hyllunum. Við vitum það mæta vel. Ætlum við að halda áfram að bara vinna í sjoppunni eða ætlum við að gerast meðeigendur? það er valið. Og stjórnarskrárbreytingu strax svo samninganefndinn hafi yfirleitt umboð.

[Fannar frá Rifi, 7.12.2008 kl. 00:29]

Gísli. þú meinar væntanlega hvort að við ætlum að gerast litlir meðeigendur í sjoppunni eftir að hafa selt okkar eigin verslun? því jú við eigum og ráðum okkur sjálf utan ríkjasambandsins.