Sterk staða Sjálfstæðisflokksins - formannskapall

Greinilegt er að fylgi Sjálfstæðisflokksins er að aukast nú eftir að hinu ógæfulega og ómögulega stjórnarsamstarfi, sem var dauðvona nær alla tíð, með Samfylkingunni lauk. Í öllum könnunum að undanförnu mælist fylgi flokksins á uppleið eftir að stjórnin féll, þetta sést vel í lokaviku janúarkönnunar Capacent Gallup, könnun fyrir Stöð 2 og nú hjá Frjálsri verslun. Sóknarfæri Sjálfstæðisflokksins eru sannarlega til staðar í væntanlegri kosningabaráttu, sé haldið rétt á uppstokkun í forystusveit og þingflokknum, sem er nauðsynleg eftir það sem á undan er gengið.

Þeir sem töldu Sjálfstæðisflokkinn hafa misst öll spil af hendi og eiga erfiða tíma framundan geta litið á kannanirnar og dregið sínar ályktanir af því. Vinstriflokkarnir virðast báðir vera að msisa flugið og Framsókn er á uppleið í öllum könnunum. Kannski fer það svo að Framsókn rís upp úr vinstriflokkunum þegar þeir taka á sig óvinsælu og erfiðu verkin í vinstristjórninni sem er eins og allar slíkar án leiðarvísis og í leit að sjálfri sér og eigin stefnu sem taka skal eitthvað mark á.

Miðað við þessa könnun er freistandi að líta svo á að Framsókn muni stórgræða á því útspili sínu að setja vinstriflokkana saman til verka en sitja á hliðarlínunni þó þeir verði að súpa aðeins af ógeðsdrykknum við að staðfesta vinstrimenn í alla nefndarformannsstóla þingsins og því að setja mann með tveggja ára þingreynslu í forsetastól þingsins. Þeir munu kannski svífa upp yfir vinstrið með þessu verklagi. Skondið ef svo fer, ekki satt?

Hvað varðar formannskapal Sjálfstæðisflokksins kemur ekki að óvörum að Bjarni Benediktsson njóti mests fylgis. Þar á eftir er auðvitað Þorgerður Katrín, en eðlilega er velt fyrir sér hvaða afstöðu hún muni taka til formannsmála. Aðrir valkostir eru langt að baki þeim og mælast varla í þessari könnun. Þetta er merkileg skipting og gefur til kynna að staða Þorgerðar sé vænlegri en margir töldu.

Sjálfur hef ég sagt opinberlega að ég muni styðja Bjarna Benediktsson sem næsta formann flokksins, en ég vonast eftir líflegri og góðri baráttu um formannsstólinn. Mikilvægt er að kosið verði á milli góðra frambjóðenda í forystusætin og stokkað hressilega upp. Tækifæri flokksins eru til staðar með góðri uppstokkun og því að hleypa nýrri kynslóð í forystusætin.

Bjarni og Þorgerður Katrín oftast nefnd

Athugasemdir

[Gestur Guðjónsson, 5.2.2009 kl. 10:09]

Með 40% óvissu er erfitt að sjá að sjálfstæðismenn séu að auka fylgi sitt. Sjálfstæðismenn hafa öðrum fremur verið duglegir að gefa sig upp, VG menn svo, því næst Samfylking og Frjálslyndir en síst Framsókn, þannig að það er alveg ljóst að staða Sjálfstæðisflokksins er verulega ofmetin, skoði menn einungis þá sem afstöðu taka. Manni sýnist fylgi Sjálfstæðisflokksins komið niður í eða undir flokksbundna.

[Ómar Geirsson, 5.2.2009 kl. 10:23]

Blessaður Stefán.

Það er eitt sem ég ekki skil með ykkur Sjálfstæðismenn.  Afhverju eruð þið að fara í formannsslag núna.  Hvenær ætlið þið að átta ykkur á því að Þorgerður Katrín er ykkar glæsilegasti og að sjálfsögðu ekki síður frambærileg en kallarnir í þetta starf.  Ef andstæðingar ykkar eru svo vitlausir að höögva að henni vegna tengsla Kristjáns við Kaupþing (sem er kallremba á hæsta stigi) þá mun það aðeins eitt gera og það er að þjappa ykkar fólki saman og auka ykkar fylgi.  Allir eiga að dæmast á sínum verkum ekki annarra.

Kveðja að austan.

[Helgi (IP-tala skráð) 5.2.2009 kl. 11:05]

Þorgerður á ekki séns vegna fortíðarinnar. Bjarni er líka of innvinklaður í gamla flokkinn og viðskiptaheiminn fyrir minn smekk (N1 eða Essoveldið), þó hann sé ungur og frambærilegur maður. Einn af fáum. En flokkseigendaklíkan í Rvíkinni er víst búin að ákveða þetta. En ég vil fá Guðfinnu Bjarnadóttur í formanninn. Af hverju nefnir enginn hana?

[Bjarni Kjartansson, 5.2.2009 kl. 13:54]

Nú er mér tregt tugnu að hræra.

1.  Tilurð samstjórnar okkar og SF voru með ákveðnum hætti og e´g varaði afar sterkt við þeirri ósvinnu, vildi Nýsköpunarstjórn sem hugsanlega hefði haft burði til, að fara ofaní og uppræta samsæri Katar-vina gegn lýðveldinuÍslandi.

2.  Jafn gegn og góður og Bjarni Ben er, tel ég hann hafa OF ríka hagsmuni af storkapítalinu enn sem stendur til, að þorandi sé, að tefla honum fram sem formanni.

3.  Við þurfum aðila, sem eru gersamlega frjálsir við inntríkur í títtnefndu ,,Gamla Íslandi"  ÉG er hugsandi yfir tilnefnigu Geirs á VillaEgils sem leiðtoga um stefnumótun á endurreisn í anda Sálfstæðisstefnunnar, til þess er ég ekki viss um, að hann sé læs á eldri gögn í þeim efnum.

4.  Það þarf að verða algert afturhvarf frá neo frjálshyggjunni og til þjóðlegra gilda, marg hertra í reynsluheimi forfeðra okkar.  Ekkert væl og aðildaviðrður við ESB með Ole annarsvegar og Hans Gert hinsvegar, gersamlega ósammála um erindi okkar þar inn. 

 5.  Lydduskapur sumra okkar talsmanna ríður ekki við einteyming og þvaður um, að við ,,eignumst VINI" í útlöndum ef við gefum kröfuhöfum banka okkar.

Þá eignumst við nýja HÚSBÆNDUR--EKKI VINI. 

nóg í bili

Miðbæjaríhaldið

Leita hugrakks leiðtoga með forn gildi í skildi sínum.

[Stefán Friðrik Stefánsson, 5.2.2009 kl. 14:50]

Þakka kommentin.

Þakka sérstaklega góðvini mínum og félaga, miðbæjaríhaldinu, fyrir góðar hugleiðingar. Hittumst hressir á landsfundi!

mbk. Stefán Friðrik