MR sigrar í Gettu betur

Liði Menntaskólans í Reykjavík tókst í kvöld að sigra í Gettu betur í fimmtánda skiptið frá því að keppnin hófst árið 1986. Skólinn sigraði fyrst árið 1987, en síðan vann skólinn keppnina í heil ellefu ár í röð, á árunum 1993-2003, og svo þrjú síðustu ár, frá 2007. Langa sigurtímabilið var ótrúleg sigurganga, sem andstæðingum þeirra á þessu langa tímabili gramdist mjög í geði vissulega en gerði þá sigursælasta lið í sögu keppninnar. Þeir festa það enn í sessi á þessu kvöldi.

Óska MR innilega til hamingju. MH átti mjög flott lið í keppninni í ár og komst ansi nærri sigri og hefði verið ansi gaman að sjá MH loksins sigra. MH hefur ansi oft tapað fyrir MR og t.d. komst Inga Þóra aldrei á sigurpall, en hún tapaði alltaf fyrir MR á mikilvægum tímapunkti. MR og MH voru með bestu liðin í ár, bæði sterk og satt best að segja fannst mér erfitt að spá um sigur fyrir kvöldið, þó auðvitað vonaði ég að MH næði loksins að sigra.

En svona á þetta að vera, spenna og fjör í líflegri keppni. En ég held að ansi margir séu þeirrar skoðunar að kominn sé tími á annan skóla að sigra í Gettu betur. Vonandi gerist það að ári. :)

MR vann Gettu betur

Athugasemdir

[Ómar Ragnarsson, 4.4.2009 kl. 23:46]

Mér sýnist fólk etja kappi við flest. Í fyrradag var sagt að Tiger Voods hefði sigrað golfmótið, sem sagt, golfmótið beið mikinn ósigur fyrir Tiger.

Mig grunar að vísu að MR hafi unnið sigur í keppninni og er ánægður með að minn gamli skóli skuli hafa komist alla leið í keppninni án þess að keppnin hafi tapað fyrir MR, þótt MR hafi unnið hana.

[Skúffustrumpurinn (IP-tala skráð) 5.4.2009 kl. 01:16]

En svei RÚV fyrir að klippa á vefútsendinguna í miðju kafi. Og síðan aftur á síðustu mínúturnar. Ætla þeir aldrei að læra þetta?

[Bragi Þór Valsson (IP-tala skráð) 5.4.2009 kl. 12:17]

Er ekki eðlilegt að besta liðið vinni? Ef MR á alltaf besta liðið ættu þeir alltaf að vinna. Er ekki kominn tími til að t.d. Þróttur Neskaupsstað taki Íslandsmeistaratitilinn í körfubolta? Voða þreytt að bestu liðin vinni það alltaf (-:

[Stefán Friðrik Stefánsson, 5.4.2009 kl. 13:42]

Það var rosalega sætt, Gummi, að sjá MA taka MR árið 2006. Það var engin smá niðurlæging fyrir þá og sumir varla náð sér af þeirri rassskellingu. Svo tók MA Versló í úrslitaþættinum. En auðvitað átti MA að taka þetta í fyrra. Voru svakalega nærri því. Tókst að vinna upp sjö eða átta stiga forskot í bjölluspurningunum, sem er mikið afrek og komast í bráðabana. Vona að MA komi sterkt til leiks að ári. :)

[Guðmundur St Ragnarsson, 5.4.2009 kl. 14:26]

Það er kominn tími á að Fjölbrautaskóli Norðurlands vestra (áður Fjölbrautaskólinn á Sauðárkróki) taki þetta. Það er ekki nóg að geta bara sungið vel Skagfirðingar! Til hamingju M.R.