Enn um andstöðu við neyslustýringu

Ég átti von á viðbrögðum þegar að ég ákvað að skrifa um neyslustýringu ríkisins en satt best að segja ekki eins miklum og reyndin varð. En það er gleðiefni. Mér fannst mikilvægt að skrifa um þetta og benda á skoðanir mínar. Mér fannst sum kommentin vissulega athyglisverðari en önnur. Þar fannst mér koma vel fram skoðanamunur til hægri og vinstri, þeirra sem vilja að ríkið hugsi fyrir sig og sína og þeirra sem gera það ekki. Einnig sá ég að Ingimundur Kjarval skrifaði athyglisvert innlegg um greinina á málefnin.com.

Ingimundur leggur þetta út með þeim hætti að ég sé að hvetja foreldra til að hella kók í börnin sín og eða að berjast á móti almennu heilbrigði. Það er alveg fjarri lagi að ég sé að hvetja fólk til að gefa skít í heilsu sína og hugsa ekki um hvað það lætur ofan í sig. Ég var aðeins að segja ofur einfaldlega að það er ekki verkefni ríkisins að stjórna því hvað við látum ofan í okkur. Ég vona að fólk sé ekki svo einfalt að telja að ég hafi með skrifum mínum að hvetja til þess að fólk horfði ekki gagnrýnið á eigin forsendum á það hvað það lætur ofan í sig. Ég er aðeins að segja að valið á að vera okkar, ekki ríkisins. Mjög einfalt mál það.

Finnst merkilegt að tala sérstaklega um börnin. Yfir skrifum Ingimundar og annarra hafði ég á tilfinningunni að þau teldu að ríkið ætti að ala upp börnin. Sé það vandamál að börn drekki of mikið af gosdrykkjum og hámar í sig skyndibitafæði og óhollustu er það vandamál foreldranna. Þeir bera ábyrgð á börnunum sínum og hvað þau borða. Sé heilsufarslegt vandamál að aukast í tilfelli barna er það heimatilbúinn vandi, sem ríkið getur minnt á vissulega en ekki lagað. Foreldrar og forráðamenn verða að horfa í spegil og viðurkenna þá að eitthvað sé bogið við stöðuna á heimavelli. Það verður enginn vandi til fyrir einskæra tilviljun. En þarna komum við að meginpunktinum. Ríkið getur ekki hugsað fyrir okkur.

Mér finnst neyslustýring fáranleg og stend við þau orð. Er á hólminn kemur er það mitt mál hvað ég borða og ég get engum kennt um það nema sjálfum mér. Ég skal alveg taka undir að það er í lagi að benda á skaðsemi óhollra matvæla eða minna á að mikil sykurneysla getur verið hættuleg og skaðleg til lengri tíma litið. En þar eiga mörkin að liggja.

Það getur enginn lagt börnum lífsreglurnar nema foreldrarnir. Sé uppeldi ábótavant eða krakkinn kominn á kaf í kókþamb eða pizzuát er það engum um að kenna nema ástandinu á heimavelli. Það má vel vera að menn líti á Siv Friðleifsdóttur sem móðurímynd allra landsmanna, en mér finnst það of mikið verkefni fyrir hana að taka á sig uppeldi allra barna landsins. Það er líka hlægilegt verkefni finnst mér. En eru foreldrarnir þarna að kasta frá sér uppeldishlutverkinu?

Við eigum því að benda á meginþætti með áberandi hætti en þar liggja mörkin. Við eigum að treysta fullorðnu fólki til að taka eigin ákvarðanir og börnin verða að vera undir eftirliti foreldra sinna, enginn annar getur tekið við uppeldishlutverkinu. Miðstýring ríkisins er engin lausn. Ég hugsa ekki allavega um það úti í búð hvort ein vara sé skattlögð meira en aðrar, vilji ég kaupa eitthvað og finn innri freistingu myndast fyrir því að kaupa mér vöruna stöðvar varla nokkuð þá ákvörðun.

En þarna mætumst við augliti til augliti þeir sem vilja frelsi einstaklingsins og þeir sem vilja miðstýringu ríkisins í líf fólks. Þetta er skýrt dæmi þess að mínu mati. En mín skoðun er alveg ljós. Við verðum að hafa vit fyrir okkur sjálf, ekki ríkið og krumla "stóra bróður".

Athugasemdir

[Stefán Friðrik Stefánsson, 10.12.2006 kl. 17:46]

Mér finnst athyglisvert að flokka eiturlyf í þessa umræðu. Ég var að tala um matvæli fyrst og fremst. Það er eflaust hægt að flokka áfengi með því, enda drekkum við það auðvitað rétt eins og kók, kaffi og mjólk. En eiturlyf er eitthvað sem við getum varla keypt nema ólöglega, enda veit ég ekki til þess að fólk megi kaupa það með heiðarlegum hætti.

[Bjarki (IP-tala skráð) 10.12.2006 kl. 18:27]

Þetta með eiturlyfin er nú eitt það al heimskulegasta sem ég hef séð í langan tíma og lýsir vel hvernig vinstri menn hugsa oft.  Þykjast hafa hitt naglan á höfuðið en gleyma sér alveg, eiturlyf eru fyrir það fyrsta ávanabindandi, í öðru lagi geta þau valdið alvarlegu heilsutjóni strax við fyrstu notkun og í því þriðja getur langvarandi neysla valdið margskonar geðkvillum og það miklu heilsutjóni að dauði hlýst af.  Ef þú (keli) ert að reyna að halda því fram að svo sé með sykur,fitu og koffein þá ættiru að fara á námskeið í næringarfræði

[Sigurjón Benediktsson, 10.12.2006 kl. 20:04]

Það stendur enn óhaggað og ómótmælt að neyslustýringin virkar í báðar áttir. Nú er stýringin afleiðing lobbýistavinnu Vífilfells og Ölgerðarinnar og fl. En ríkið stendur á brókinni með einhver vonlaus apparöt til að hafa áhrif í einhverjar aðrar áttir. Og við? Við bara borgum brúsann hvor leiðin sem farin er.

[Árni (IP-tala skráð) 11.12.2006 kl. 09:11]

Það er náttúrulega alveg með ólíkindum að hlusta á sumt fólk sem er fylgjandi neyslustýringu. Vill fólk virkilega enn halda í anga af kommúnismanum sem var og er ríkjandi sumsstaðar í heiminum.