Jólaafmæli

Ég er einn þeirra fjöldamörgu Íslendinga (við erum mörg, er viss um það :) sem á afmæli í aðdraganda jólahátíðarinnar. Lengst af hefur mér mislíkað þetta mjög, enda verður þetta seint talinn hinn fullkomni tími afmælishalds. Það hefur enda verið svo að ég hef lítið sem ekkert haldið upp á afmælið nú í seinni tíð, ef frá er talið öflugt og gott tvítugsafmæli fyrir tæplega áratug og 25 ára afmælið fyrir nokkrum árum.

Hinsvegar hef ég oft verið með rólegheitaafmælishald heima nær alltaf fyrir vini og nánustu ættingja, en það er svosem ekkert stórt afmælishald. Ég hef ákveðið að halda vel upp á þetta að ári, en þá verður um merkisafmæli að ræða. Ein af vinsælustu spurningunum sem ég hef fengið í áranna rás er hvort ég hafi fengið afmælis- og jólagjöf saman. Góð spurning. Svarið er oft ansi augljóst, en það hefur allavega ekki gert mig ríkan, nema þá kannski andlega, að eiga afmæli á þessum tíma.

Að sumu leyti er afmæli á þessum tíma notalegt. Ég hef lært að sleppa jólastressinu á þessum tíma og klára jólaundirbúninginn tiltölulega snemma og njóta þessa tíma eins mikið og mögulega hægt er. Þetta á að vera notalegur og góður tími. Við eigum enda að meta boðskap jólanna og hugsa vel um hann; ekki að drekkja okkur sjálfum í stressi og ergju þess sem fylgir því að vera fastur í búðum fram til hádegis á aðfangadaginn.

Athugasemdir

[Sveinn Hjörtur , 21.12.2006 kl. 16:35]

Sæll. konan mín á afmæli 23. des svo hún þekkir þetta. Ég hef EINU sinni "gleymt" deginum, en það var líka bara 1 sinni. konur láta mann ekki klikka nema 1 sinni með afmælisdaginn. Til hamingju þá með daginn...

[Stefán Friðrik Stefánsson, 21.12.2006 kl. 17:09]

Takk kærlega fyrir kveðjuna. Já, þetta eru svona einmitt afmæli sem vilja oft gleymast í hita og þunga jólastressins. :)

mbk.