Stuldurinn á Fangavaktinni

Rétt eins og með Næturvaktina og Dagvaktina er deilt um stuld á Fangavaktinni á netinu. Eðlilega er aðstandendum þáttanna umhugað um að efni þeirra sé ekki fjölfaldað með ólöglegum hætti. Vandinn er hinsvegar sá að í því nútímasamfélagi sem við lifum í er nær ómögulegt að koma í veg fyrir að sjóræningjaútgáfur leki út á netið af kvikmyndum, sjónvarpsþáttum og tónlist. Þegar að einn er lagður að velli spretta tveir upp í staðinn.

Þessi barátta kom vel fram áður með Torrent-síðuna. Þegar að fólk er orðið vant því að geta hlaðið niður efni vill það meira, þannig er það víst bara. Þetta er því erfið barátta, sumpart vonlaus. En nú reynir á málið fyrir dómstólum. Ekki fyrsta málið það tengt niðurhali á netinu. Þessi rimma verður varla minna spennandi en hinar.

En hvað varðar Fangavaktina sjálfa hefur hún allavega hlotið verðskuldaða athygli, hvort sem er meðal þeirra sem hala þáttunum af netinu, eða borga fyrir það með áskrift að Stöð 2. Fangavaktin er eins og fyrri Vaktarseríur vönduð og góð þáttaröð sem fylgir vel eftir fyrri ævintýrum Georgs, Ólafs Ragnars og Daníels.

Stjarna seríunnar er þó að mínu mati enginn þremenninganna heldur Björn Thors, sem á sannkallaðan stórleik í hlutverki Kenneths Mána, eða Ketils Mána eins og kommúnistinn sannkristni Georg Bjarnfreðarson kallar hann og hefur afskrifað hann sem Bandaríkjamann í ofanálag. Brill frammistaða.

Samt er ekki annað hægt en njóta snilldar Jóns Gnarr sem slær ekki feilnótu í túlkun sinni. Georg verður sífellt aumari tragedíupersóna eftir því sem kafað er dýpra í hann. Þessi karakter er einn af þeim sem allir elska að pirrast á, en er samt meistaralega skrifaður og Jón Gnarr fer á kostum.

Fangavaktinni stolið

Athugasemdir

[Jónas Egilsson, 3.11.2009 kl. 15:22]

Það er e.t.v. ekki hægt að tala um að rétthafar í þessu máli séu að tapa einhverju á þessu niðurhali. Ástæðan er einfaldlega sú að þeir sem hala niður efni með þeim hætti sem hér er sagt frá, fara ekki að kaupa áskrift til að geta horft á efnið eða CD disk síðar með þáttunum. Slíkt réttlætir engan vegin ólöglegt niðurhal eigi að síður.

Þetta vekur einnig upp spurningar um áskriftarsjónvarp, hvort "frítt" auglýsingasjónvarp væri ekki kostur í stöðunni.

Sjálfur horfi ég reyndar ekki á þessa þætti, en það er annað mál.

[Árni Sigurður Pétursson, 3.11.2009 kl. 17:51]

Jónas Egilsson Skrifaði;

"Ástæðan er einfaldlega sú að þeir sem hala niður efni með þeim hætti sem hér er sagt frá, fara ekki að kaupa áskrift til að geta horft á efnið eða CD disk síðar með þáttunum. Slíkt réttlætir engan vegin ólöglegt niðurhal eigi að síður."

 Vilt þú semsagt meina að allir þeir sem að niðurhali þessum þáttum komi hvorki til með að vera með áskrift af stöð 2 né kaupa DVD ?

nú veit ég persónulega um fjölmarga sem að niðurhala þessu þrátt fyrir að vera með áskrift af stöð 2.

en þetta með að kaupa DVD

þegar að næturvaktin var gefin út á DVD rétt fyrir jólin 2007 þá ætlaði ég að kaupa 3 eintök.

2 til þess að gefa í jólagjafir og 1 handa sjálfum mér.

ég gat það einfaldlega ekki vegna þess að þetta seldist upp, og það var þriðja sendingin til landsins af DVD diskunum sem að þá var uppseld.

ég endaði á því að kaupa eintak handa sjálfum mér löngu seinna, og gaf aðra hluti í jólagjöf.

nú er það einfaldlega þannig að það hafa fáir DVD diskar selst jafnvel og Næturvaktin og Dagvaktin.

það hefur einnig fáum íslenskum sjónvarpsþáttum verið niðurhalað jafn mikið af netinu.

það þarf ekki að segja mér að það sé tilviljun.