Spennandi kosningar í Bandaríkjunum

Þingkosningar verða í Bandaríkjunum á morgun. Það stefnir í hörkuspennandi kosningar, þar sem miklar sviptingar gætu orðið. Demókratar virðast halda inn í kosningarnar með forskot, sem hefur þó verið að minnka síðustu dagana. Óljóst er hvort þeir halda yfirhöndinni allt til enda. Sigur demókrata í kosningunum yrði táknrænn, enda hafa þeir verið valdalausir allt frá því að þeir misstu völdin í öldungadeildinni í þingkosningunum árið 2002.

Kosið er um alla fulltrúadeildina og hluta sæta í öldungadeildinni. Repúblikanar hafa ráðið í fulltrúadeildinni frá kosningunum 1994, þegar að meirihluti demókrata féll eftir fjögurra áratuga samfellda valdasetu. Demókratar náðu öldungadeildinni á sitt vald á árunum 2001-2003, en hafa annars verið valdalausir þar líka frá 1994. Ósigur repúblikana yrði um leið ósigur George W. Bush, forseta Bandaríkjanna. Segja má að kosningarnar séu einskonar kosningar um forsetann og pólitísk verk hans umfram allt annað. Þar séu átakapunktarnir í raun. Hvort fólk styðji hans stefnu eður ei.

Bush hefur síðustu daga reynt að leggja hönd á plóg fyrir flokk sinn í erfiðri stöðu. Það hefur gengið upp og ofan. Bush forseti er kominn að leiðarlokum á sínum stjórnmálaferli. Þetta er hans síðasta kosningabarátta sem í raun skiptir hann máli. Forsetinn getur ekki boðið sig fram í forsetakosningunum eftir tvö ár og því er hann að berjast fyrir áhrifum sínum á lokaspretti valdaferilsins. Það verður snúið fyrir hann í stöðunni missi flokkurinn annaðhvort fulltrúadeildina eða jafnvel báðar deildir þingsins. Staða mála mun sjást betur í fulltrúadeildinni þar sem öll sæti eru undir, en í öldungadeildinni eru aðeins nokkur sæti undir. Meirihluti repúblikana er 15 sæti í fulltrúadeildinni en 6 í öldungadeildinni.

Svo gæti farið að sigurvegari morgundagsins verði Nancy Pelosi, leiðtogi demókrata í fulltrúadeildinni. Myndu demókratar sigra yrði Pelosi forseti fulltrúadeildarinnar, fyrst kvenna. Hún myndi því taka við af Dennis Hastert, sem stýrt hefur deildinni allt frá árinu 1999, og er orðinn með þaulsetnustu forsetum í sögu deildarinnar. Fall repúblikana í deildinni yrði sögulegt og um leið myndi sigur á morgun byggja demókrata upp fyrir komandi átök, t.d. um Hvíta húsið. Það er öllum ljóst að Bush og hans innsti valdakjarni fer frá eftir rúm tvö ár og fer ekki aftur í kosningar. Það munu blasa við nýjar áherslur innan Repúblikanaflokksins er nýtt forsetaefni stígur þar fram.

Það verður fróðlegt að fylgjast með á morgun og sjá hvernig fer. Það stefnir allt í mjög spennandi og sviptingamiklar kosningar í Bandaríkjunum.

Spennandi kosningar

Örvænting Frjálslyndra í vondri stöðu

Það styttist óðum í þingkosningar. Það verður seint sagt að staða Frjálslynda flokksins sé góð núna. Útspil flokksforystunnar að gera innflytjendamálin að umræðuefni eru skiljanleg, sé litið til fylgisstöðu flokksins, sem verið hefur í stjórnarandstöðu frá því að hann náði fyrst þingsætum í alþingiskosningunum 1999. Í nýjustu mánaðarkönnun Gallups mælist hann með engan mann inni, ekki einu sinni formanninn Guðjón Arnar Kristjánsson í Norðvesturkjördæmi.

Yfirgangur Magnúsar Þórs Hafsteinssonar í umræðu um innflytjendamál í Silfri Egils nú um helgina sýnir vel örvæntinguna innan forystusveitar flokksins. Það dugar ekki fyrir frjálslynda að koma með kvótamálin enn einar kosningarnar sem umræðuefni. Þar þarf eitthvað nýtt. Þeir veðjuðu rétt á kvótamálin árið 2003 og græddu á því að mikið var talað um málin og náðu meiru fylgi til sín á þeirri umræðu en Samfylkingin sem talaði fyrir fyrningarleiðinni. Frjálslyndir fengu fylgissveiflu út á umræðuna, þó óljósar hugmyndir hafi einkennt talandann. Sama varð í kosningunum 1999. Þá tókst frjálslyndum að komast inn á kvótaumræðu aðeins fyrir vestan.

Það sést á öllu núna að kvótamálin eru ekki umræðuefni af sama þunga og var fyrir kosningarnar 2003. Örvænting er greinilega orðin innan veggja um hvert eigi að stefna. Það á greinilega að beina sjónunum að innflytjendamálunum og reyna að flagga þeim skoðunum sem fram komu í Silfrinu í dag hjá Magnúsi og Jóni Magnússyni, lögmanni. Það gerðist reyndar hægt og hljótt fyrir skömmu að smælingjaflokkurinn Nýtt afl gekk í eina sæng með Frjálslyndum. Ekki var það mikið rætt, enda ekki stórpólitísk tíðindi, sé litið til þess fylgis sem Nýtt afl fékk í kosningunum 2003, þrátt fyrir framboð í öllum kjördæmum. Það er enda engin furða að ekki vill sá flokkur fara fram aftur á eigin vegum.

Ég verð að segja það eins og er að mér hugnast ekki talsmáti varaformanns Frjálslynda flokksins í þessum efnum. Það verður vissulega að hafa reglurammann í lagi í þessum efnum, sem og öðrum. En mér finnst kuldalegt hvernig talað er og þetta eru ekki skoðanir sem mér líkar. Það er hinsvegar greinilegt að Frjálslyndir ætla sér að reyna að gera út á afstöðu og bjarga sér frá niðurlægingu í kosningum að vori með því. Ekki verður það frýnileg barátta tel ég og það verður kostulegt að sjá þá félaga Magnús og Jón, eftir að lögmaðurinn hefur verið hafinn upp til skýjanna í framboði í Reykjavík.

Ég verð aldrei þessu vant að taka undir með Steinunni Valdísi Óskarsdóttur í skrifum á vef hennar. Strategía Frjálslyndra er að reyna að koma sér frá skelli í kosningunum með því að reyna að hala sig inn á þessari áherslu. Það blasir við öllum sem sáu Silfur Egils í dag. Það er ýmislegt svosem alltaf reynt í lífróðri í pólitík. Það gildir um Frjálslynda flokkinn eins og flest annað greinilega.

Magnús Þór segir að það rigni yfir hann stuðningsyfirlýsingum

Ástríðan á bak við bloggskrifin

Bloggskrif eru lifandi og skemmtileg. Sjálfur hef ég bloggað mjög reglulega í fjögur ár. Þetta form tjáningar er einstakt í raun og gefur góð tækifæri til að kynna skoðanir sínar betur fyrir þeim sem gefa sér tíma til að lesa.

Mörgum hef ég kynnst í gegnum þessi skrif mín í gegnum árin. Ég get ekki hugsað mér lengur að sleppa þessu, þetta er ástríða sem skiptir mig miklu máli. Bæði hef ég skoðanir á málum hversdagsins og hef áhuga á að láta þær standa eftir einhversstaðar.

Bloggskrif stjórnmálamanna hafa aukist til mikilla muna. Það fer varla neinn orðið í gegnum virk stjórnmálastörf, í tengslum við framboð og lykilverkefni nema að skrifa af krafti og með ástríðu að leiðarljósi. Það sést reyndar best milli kosninga hverjir eru í þessum bransa af ástríðu og hverjir ekki. Um leið og það sést af driftinni við að koma upp vefnum hverjir séu duglegir sést það æ betur hvernig vefurinn er svo nýttur.

Þeir vefir sem verða sem steindauð draugahús handan prófkjörsbaráttu og einhverrar maskínuvinnu verða skiljanlega frekar tómlegir. Það er best að halda kraftinum gangandi með því að venja sig við að skrifa. Þetta er heillandi verkefni. Án vinnuþreks við skrifin er til lítils svosem að halda í þetta. Allavega met ég mikils hversu margir lesa hér og ég þakka öllum sem líta hér við fyrir að hafa áhuga á skrifunum. Það verður seint sagt að ég hafi ekki áhuga á þessu.

Það kom mér ekki á óvart við að sjá á góðum vef Guðmundar Magnússonar upptalningu um hverjir skrifi enn virkar bloggfærslur eftir prófkjör Sjálfstæðisflokksins í Reykjavík. Þar stóð aðeins eitt nafn eftir, er litið var á netvettvanginn með lifandi og hressandi skrif um stjórnmál, virkar skoðanir - ástríðuskrif um stjórnmál. Það var nafn Björns Bjarnasonar.

Það kemur engum að óvörum að hann sé eini maðurinn sem haldi áfram af krafti og nýti lénið sitt skynsamlega með skrifum til kjósenda og annarra lesenda sem vilja kynna sér skoðanir og áherslur hans. Vefur hans er að verða tólf ára gamall og þar hafa verið vikulegar uppfærslur allt frá upphafi og er nú komið líflegt blogg á hverjum degi.

Ég hef lengi dáðst af því hversu kraftmikill stjórnmálamaður Björn er. Hann leggur mikla vinnu í vef sinn og hann má svo sannarlega dást að því hversu flottur hann er. Þar fer allavega ekki stjórnmálamaður án skoðana. Ég undrast mjög að sjá duglega þingmenn og frambjóðendur hætta allt í einu eftir prófkjörsbaráttu og kosningavinnu að skrifa um stjórnmál og áherslur sínar. Það er mjög dapurlegt.

Þetta segi ég sem virkur bloggari, einstaklingur sem geri þetta af ástríðu og áhuga. Það er reyndar grunnforsenda þess að halda út í svona bransa; að hafa áhuga á að skrifa og hafa skoðanir fram að færa. Án þess er vefurinn eins og tómt hús sem maður býr í, án húsgagna og hversdagslegra hluta.

Talningu í prófkjöri frestað til morguns

Hætt hefur verið við að telja atkvæði í prófkjöri Samfylkingarinnar í Suðurkjördæmi, sem fram fór í gær, nú í kvöld vegna veðurhamsins í dag, sem hamlaði því að öll kjörgögn kæmust á einn stað. Skv. reglum kjörnefndar er ekki hægt að hefja talningu fyrr en að öll kjörgögn komast á einn og sama staðinn. Atkvæði verða því talin síðdegis á morgun.

Mikil spenna er yfir prófkjörinu. Þar verður eftirmaður Margrétar Frímannsdóttur á leiðtogastóli kjörinn. Alþingismennirnir Björgvin G. Sigurðsson, Jón Gunnarsson og Lúðvík Bergvinsson sækjast eftir leiðtogasætinu ásamt Róberti Marshall, fjölmiðlamanni og fyrrum forstöðumanni hinnar sálugu fréttastöðvar NFS, en hann nefnir annað sætið líka.

Spennan magnast því og bíður morguns að heyra hver erfir ríki Margrétar í Suðrinu, en Margrét er nú fyrsti þingmaður kjördæmisins og hefur leitt lista á Suðurlandi allan sinn þingmannsferil, eða frá því að hún bauð sig fyrst fram fyrir tveim áratugum, í alþingiskosningunum 1987 fyrir Alþýðubandalagið.

Talningu atkvæða frestað til kl. 14 á morgun

Harkalegt rifrildi um innflytjendamál

Heldur betur var líflegt yfir spjallþættinum Silfri Egils í dag á Stöð 2 þar sem rifist var heiftarlega um innflytjendamál. Kom til hvassra orðaskipta milli Magnúsar Þórs Hafsteinssonar, varaformanns Frjálslynda flokksins, Steinunnar Valdísar Óskarsdóttur, borgarfulltrúa, og Þórhildar Þorleifsdóttur, fyrrum alþingismanns. Sagði Magnús Þór í þættinum að stemma þyrfti stigu við straumi innflytjenda til Íslands. Voru múslímar sérstaklega nefndir og þeir sem ættu erfitt að aðlagast íslensku samfélagi.

Ekki féllu þessi orð í kramið hjá þeim stöllum og veittust þær harkalega að Magnúsi Þór og Steinunn Valdís sagði skoðanir Magnúsar Þórs jaðra við rasisma. Þórhildur komst varla að til að tala fyrir tali Magnúsar Þórs sem talaði þær báðar í kaf með frekar ósmekklegum hætti og með hreinum ólíkindum að Egill Helgason skuli ekki hafa haft betri stjórn á þætti sínum en raun bar vitni. Þær tvær höfðu varla í við Magnús Þór sem samkjaftaði svo með ólíkindum var á að horfa. Rætt var um þessi mál eftir viðtal við Jón Magnússon, lögmann, en skoðanir hans á innflytjendamálum hafa verið umdeildar eftir grein hans í Blaðinu.

Mér fannst þetta merkilegar umræður. Ég tek undir skoðanir þær sem fjórði gesturinn í þættinum, Ragnheiður Elín Árnadóttir, aðstoðarmaður forsætisráðherra og prófkjörsframbjóðandi Sjálfstæðisflokksins í Suðvesturkjördæmi, talaði fyrir. Hún horfði að mestu á rifrildi Magnúsar, Steinunnar og Þórhildar, en kom með mjög gott innlegg og málefnalegt. Er ég sammála henni um það.

En það var svo sannarlega show í Silfrinu í dag. Það er greinilegt að Magnús Þór bætir ekki fyrir málstað sínum með þeirri framkomu sem hann kom fram í þættinum, sem er sami gamli yfirgangurinn gegn öllum þeim sem ekki eru sammála honum. Bendi annars öllum á að smella á tengilinn hér að neðan og sjá þessar umræður í þættinum sem urðu heldur betur hvassyrtar í meira lagi.

Silfur Egils - rætt um innflytjendamál

Steinunn Valdís segir ummæli Magnúsar Þórs bera keim af kynþáttahatri

Saddam Hussein dæmdur til dauða

Saddam Hussein, fyrrum forseti Íraks, var dæmdur til dauða í morgun. Verður hann hengdur verði refsingunni framfylgt. Dómnum hefur nú þegar verið áfrýjað, svo að ekki kemur að örlagastundinni fljótlega fyrir þennan fyrrum einræðisherra, sem ríkti í Írak með harðri hendi á árunum 1979-2003. Valdaferli hans lauk í innrás Bandamanna í landið í marslok 2003 en stjórnin féll með táknrænum hætti í kastljósi heimsfjölmiðlanna þann 9. apríl 2003.

Hálfbróðir Saddams, Barzan al-Tikriti, sem var yfirmaður írösku leyniþjónustunnar, var einnig dæmdur til dauða. Taha Yassin Ramadan, fyrrum aðstoðarforseti Íraks, var dæmdur í lífstíðarfangelsi fyrir aðild að morðum á 148 íbúum þorpsins Dujail en flestir íbúa þorpsins eru sjíta-múslimar. Búast má við ófriðarbáli meðal stuðningsmanna einræðisherrans fyrrverandi við þessum tíðindum, en þessi tíðindi boða ekki endalok alls málsins. Þetta eru aðeins fyrstu réttarhöldin af mörgum í málum gegn Saddam.

Þrjú ár eru um þessar mundir frá því að Saddam var handtekinn í sveitahéruðum Íraks. Það markaði mikil tímamót, enda hafði honum tekist að komast undan í rúmlega hálft ár og töldu flestir þá að honum yrði aldrei náð. Handtakan var alheimsviðburður og flestum gleymist vart myndirnar af Saddam fúlskeggjuðum og hrörlegum, eftir flóttann og að hafa í raun þurft að lifa sem útigangsmaður væri til að komast undan þeim sem leituðu hans.

Þessi stóru tíðindi dagsins boða viss þáttaskil í málinu en svo sannarlega engin endalok. Þetta er einn áfangi málsins. Ekki er hægt að segja að tíðindin komi að óvörum.

Saddam Hussein dæmdur til dauða

Gunnar sigrar í prófkjöri Samfó í Kraganum

Úrslit liggja nú fyrir í prófkjöri Samfylkingarinnar í Suðvesturkjördæmi. Gunnar Svavarsson, forseti bæjarstjórnar í Hafnarfirði, sigraði Þórunni Sveinbjarnardóttur, alþingismann, og verður leiðtogi Samfylkingarinnar í kjördæminu í stað Rannveigar Guðmundsdóttur, sem gaf ekki kost á sér til endurkjörs, en hún hefur setið á þingi síðan 1989. Gunnar hefur ekki áður setið á þingi og er því nýliði í þessum efnum. Hann hlaut fyrsta sætið með 1376 atkvæðum. Aðeins munaði 46 atkvæðum á honum og Þórunni í fyrsta sætið.

Þórunn náði í öðrum tölum kvöldsins í prófkjörinu að skjótast upp í fyrsta sætið, en henni tókst ekki að halda forskotinu til enda. Auk þeirra tveggja sóttist Árni Páll Árnason, lögfræðingur, eftir fyrsta sætinu. Í öðru sæti í prófkjörinu varð Katrín Júlíusdóttir, alþingismaður, en hún varð í fjórða sæti í prófkjörinu fyrir alþingiskosningarnar 2003. Þórunn, sem setið hefur á þingi frá 1999, lenti í þriðja sætinu þrátt fyrir hetjulega baráttu um leiðtogastólinn. Það hljóta að vera vonbrigði fyrir hana að ná ekki leiðtogastólnum, enda lítill munur, og að komast ekki ofar á listann en síðast. Þetta er nokkuð áfall fyrir konurnar í flokknum væntanlega.

Árni Páll varð í fjórða sætinu og kemur því nýr inn í forystusveit flokksins í kjördæminu. Þetta er fyrsta prófkjör Árna Páls, en hann var aðstoðarmaður Jóns Baldvins Hannibalssonar í utanríkisráðherratíð hans og naut stuðnings hans í prófkjörinu til forystu. Í fimmta sætinu varð Guðmundur Steingrímsson, fjölmiðlamaður, en hann er virkur Moggabloggari hérna hjá okkur í þessu flotta samfélagi og er auk þess af merkum pólitískum ættum en faðir hans og afi, Steingrímur Hermannsson og Hermann Jónasson, voru báðir forsætisráðherrar og formenn Framsóknarflokksins. Það væri fróðlegt að vita hvort Steingrímur, sem nú er orðinn (h)eldri borgari í Garðabæ, hefði farið á kjörstað til að kjósa Guðmund.

Í sjötta sætinu varð Tryggvi Harðarson, fyrrum bæjarfulltrúi í Hafnarfirði og bæjarstjóri á Seyðisfirði, en hann gaf eins og kunnugt er kost á sér til formennsku í Samfylkingunni gegn Össuri Skarphéðinssyni á stofnfundi flokksins í maí 2000. Það vekur athygli að hann verði ekki ofar, eftir langan pólitískan feril í kjördæminu. Á eftir honum koma varaþingmenn flokksins, þau Sonja B. Jónsdóttir og Jakob Frímann Magnússon. Sonja var varaþingmaður flokksins í Kraganum eftir alþingiskosningarnar 2003 en Jakob Frímann var á framboðslistanum í Reykjavík suður í kosningunum 2003 og tekið sæti á þingi einu sinni á tímabilinu. Hann færði sig um set í aðdraganda þessa prófkjörs.

Það vekur mikla athygli að Valdimar Leó Friðriksson, alþingismaður, er víðsfjarri því að ná góðu sæti og er um eða rétt við miðju frambjóðendahópsins og því heldur betur á útleið af Alþingi að vori. Valdimar Leó skipaði sjötta sæti framboðslistans í Kraganum í kosningunum 2003 og varð óvænt þingmaður í september 2005 þegar að Guðmundur Árni Stefánsson hætti þátttöku í stjórnmálum og varð sendiherra í Stokkhólmi. Valdimar Leó var reyndar annar varaþingmaður flokksins í kjördæminu en tók þingsætið eftir að Ásgeir Friðgeirsson, almannatengslafulltrúi Björgólfsfeðga og fyrrum fjölmiðlamaður, gaf þingsæti sitt eftir sem hann hefði ella fengið. Úrslitin nú hljóta að vera mikil vonbrigði fyrir Valdimar Leó.

Sögur ganga á spjallvefum um að plott hafi verið í gangi milli stuðningsmanna Gunnars og Katrínar um að kjósa hvort annað í efstu sætin. Það sé plott Guðmundar Árna Stefánssonar og Lúðvíks Geirssonar. Það skal ósagt látið, en úrslitin vekja upp vissar spurningar auðvitað. Það er allavega svo að Gunnar hefur tekið við sess Guðmundar Árna (sem vann prófkjörið 2002 og var kjördæmaleiðtogi fyrri hluta kjörtímabilsins) sem fulltrúi Hafnfirðinga og Katrín svo við sess Rannveigar sem fulltrúi Kópavogs. Eftir situr óneitanlega Þórunn í sama sæti og síðast, með Katrínu nú fyrir ofan sig. Merkilegt mjög. Það er áhugavert að sjá hvað sumir sendiherrar á Norðurlöndum eru oft örlagaríkir í innri plottum flokkanna sinna hér heima.

Gunnar Svavarsson er sonur hins þekkta skemmtiþáttastjórnanda, tónlistarmanns og hljómplötuútgefanda, Svavars Gests, sem allt fram í andlátið árið 1996 var með vinsæla útvarpsþætti á Rás 2 á sunnudagsmorgnum og víðfróður um íslenska tónlist. Hann var til fjölda ára giftur söngkonunni Elly Vilhjálms. Það verður seint sagt að Gunnar sé mjög þekktur í stjórnmálum, nema af verkum sínum í pólitíkinni í Hafnarfirði, en hann er einn af arkitektum veldis Samfylkingarinnar þar í bæ og er formaður framkvæmdastjórnar Samfylkingarinnar. Það verður áhugavert að fylgjast með pólitískum verkum hans á nýjum vettvangi.

Gunnar efstur í prófkjöri Samfylkingar í SV-kjördæmi

Leiðtogaeinvígi Gunnars og Þórunnar í kraganum

Talning stendur nú yfir í prófkjöri Samfylkingarinnar í Suðvesturkjördæmi. Spennandi einvígi virðist vera á milli Gunnars Svavarssonar og Þórunnar Sveinbjarnardóttur um leiðtogastól flokksins í kjördæminu. Lengi framan af kvöldi var Gunnar, sem er forseti bæjarstjórnar í Hafnarfirði, efstur í prófkjörstalningunni en nú á ellefta tímanum náði Þórunn, sem verið hefur þingmaður Samfylkingarinnar á svæðinu frá árinu 1999, forystunni en naumlega þó. Munu nú um 40 atkvæði skilja þau að í baráttunni um forystuhlutverkið.

Í fyrstu tölum var Gunnar í fyrsta sæti, Katrín Júlíusdóttir, alþingismaður úr Kópavogi, var í öðru sætinu, Þórunn í því þriðja, Árni Páll Árnason í því fjórða, Guðmundur Steingrímsson, Moggabloggari og sonur Steingríms Hermannssonar fyrrum forsætisráðherra, var í fimmta sætinu og Tryggvi Harðarson, fyrrum bæjarfulltrúi í Hafnarfirði í því sjötta. Á eftir komu þau Sonja B. Jónsdóttir og Jakob Frímann Magnússon. Valdimar Leó Friðriksson sem varð alþingismaður á miðju kjörtímabili er mjög neðarlega og orðið ljóst að hann hefur misst þingsæti sitt. Nú fyrir skömmu skaust Þórunn upp í fyrsta sætið en Gunnar niður í hið þriðja.

Það stefnir því í spennandi einvígi milli Gunnars og Þórunnar um forystuna. Fram að því sýndist stefna í það að breytingarnar á forystunni yrðu þær að nýjir fulltrúar Hafnarfjarðar og Kópavogs færu í forystuna. Efst í prófkjöri síðast voru Hafnfirðingurinn Guðmundur Árni og Kópavogsbúinn Rannveig Guðmunds, og í staðinn kæmu Gunnar, sem fulltrúi Hafnfirðinga til forystu, og Katrín, sem arftaki Rannveigar úr Kópavogi, og um leið myndi Þórunn sitja eftir fyrir neðan Katrínu, en Þórunn varð þriðja í síðasta prófkjöri en Katrín fjórða. En þetta verður greinilega jöfn og hressileg talning.

Það verður fróðlegt að sjá hvernig henni lýkur að lokum um eða eftir miðnættið.

Þórunn komin í 1. sæti Samfylkingarinnar í SV-kjördæmi

Kristján sigrar - Akureyringar ná ekki settu marki

Úrslit liggja nú fyrir í prófkjöri Samfylkingarinnar í Norðausturkjördæmi. Kristján L. Möller, leiðtogi flokksins í kjördæminu, sigraði í prófkjörinu með glæsibrag og hlaut um 70% greiddra atkvæða. Kristján hefur setið á þingi allt frá árinu 1999, fyrst leiddi hann lista flokksins í gamla Norðurlandskjördæmi vestra en hefur leitt listann í Norðausturkjördæmi frá árinu 2003. Sigur Kristjáns kemur fáum að óvörum sem fylgjast með pólitíkinni hér á svæðinu.

Einar Már Sigurðarson, alþingismaður frá Neskaupstað, vinnur mikinn varnarsigur með því að halda sínu öðru sæti. Lára Stefánsdóttir, framkvæmdastjóri hér á Akureyri, náði ekki að sigra Einar Má í slagnum um annað sætið og vekur það nokkra athygli, enda lögðu Akureyringar mikið kapp á það að eiga fulltrúa sinn í öruggu sæti. Einar Már þótti vera undir í slagnum lengi vel og var talað um að hann myndi jafnvel ekki komast í efstu þrjú sætin. Niðurstaðan er því gleðiefni fyrir hann og væntanlega má hann vel við una.

Lára heldur sínu þriðja sæti en nær ekki settu marki. Það hljóta að vera vonbrigði fyrir hana í þeirri stöðu sem uppi er. Það er merkilegt að kona verður ekki í öruggu sæti á lista flokksins og enginn Akureyringur um leið. Þingmennirnir halda velli og verða prófkjörsúrslitin að teljast mikill sigur þeirra, enda að þeim sótt úr mörgum áttum. Benedikt Sigurðarson fær nokkurn skell og er langt frá því að ná settu marki. Hann stefndi á fyrsta sætið af krafti gegn Kristjáni og var langt frá því að ná því og fór frekar illa út úr þessu. Úrslitin verða því ekki túlkuð öðruvísi en mikil vonbrigði fyrir hann að öllu leyti. Það verður fróðlegt að heyra skoðanir Bensa á úrslitunum í kosningunni, en hann hefur ekki enn birst í viðtali.

Næst á eftir þeim þrem efstu koma Ragnheiður Jónsdóttir og Örlygur Hnefill Jónsson á Húsavík. Ragnheiður virðist fá mjög góða kosningu, en hún kom í slaginn nokkuð óþekkt í heildina séð. Örlygur Hnefill sem varð þriðji í prófkjörinu 2002 en færður niður fyrir Láru til að efla hlut kvenna á listanum fékk nokkurn skell og varð fimmti, því mun neðar en í síðasta prófkjöri. Jónína Rós frá Egilsstöðum fær hina fínustu kosningu. Neðstir eru svo ungliðarnir; Svenni bloggvinur og Kristján Ægir. Það veikti stöðu ungliðanna að þeir væru tveir báðir að stefna á sama sæti, en svo fór sem fór. Enginn ungliði var reyndar á lista flokksins í kjördæminu í síðustu kosningum.

Heilt yfir séð verður ekki annað sagt en að þessi prófkjörsúrslit séu allnokkuð áfall fyrir Akureyringana í framboði. Þau Lára og Bensi sóttu að þingmönnunum af krafti en urðu undir í þeim slag. Það er niðurstaða mála. Þetta hlýtur að vera mikið áfall fyrir Samfylkingarmenn á Akureyri, sem hafa langsterkasta stöðu á sveitarstjórnarstiginu innan flokksins á svæðinu einmitt hér á Akureyri, verandi með þrjá bæjarfulltrúa og tilvonandi bæjarstjóra eftir tæp þrjú ár, Hermann Jón Tómasson. En svona fór þetta fyrir þeim. Þessi tíðindi eru ansi stór og verða víða rædd hér í bænum væntanlega á næstu dögum.

Þetta færir okkur sjálfstæðismönnum mikil tækifæri í prófkjörinu eftir þrjár vikur og við berjumst nú fyrir því að Akureyringar komist í örugg sæti á okkar lista. Að öllu óbreyttu getum við tryggt að Akureyringur leiði lista og við vinnum að því af krafti. Það virðist vera að hjá okkur sjálfstæðismönnum séu nú einu líkurnar til staðar á því að Akureyringur leiði framboðslista í komandi kosningum í kjördæminu. Við munum væntanlega nota það tækifæri vel hér og vinna fyrir okkar fólk af krafti.

Kristján Möller sigraði í prófkjöri Samfylkingarinnar í NA-kjördæmi

Kristján, Einar Már og Lára efst hjá Samfó í NA

Talning stendur nú yfir í prófkjöri Samfylkingarinnar í Norðausturkjördæmi. Nú hafa verið talin 500 atkvæði af þeim 1878 (66,3% kjörsókn) sem bárust í póstkosningunni. Skv. fyrstu tölum eru Kristján L. Möller, alþingismaður, Einar Már Sigurðarson, alþingismaður, og Lára Stefánsdóttir, framkvæmdastjóri, í efstu sætum og virðast hafa hlotið öflugt umboð til forystuverka og virðist Kristján hafa um 70% atkvæða í fyrsta sætið í þessum fyrstu tölum.

Það verður fróðlegt að sjá hver sigrar prófkjörið, en fjögur sóttust eftir því að leiða listann; þau Kristján, Benedikt, Ragnheiður Jónsdóttir og Örlygur Hnefill Jónsson, þau tvö síðarnefndu sóttust eftir 1. - 3. sæti en Kristján og Benedikt aðeins eftir leiðtogastólnum. Kristján leiddi Samfylkinguna í Norðausturkjördæmi í síðustu þingkosningum og í Norðurlandskjördæmi vestra í kosningunum 1999 og hefur setið á þingi alla tíð síðan.

Það verður væntanlega fylgst með því hvernig fer í Norðausturkjördæmi. Flokkurinn hlaut þar tvo þingmenn kjörna í þingkosningunum 2003, en munaði litlu að Lára Stefánsdóttir kæmist inn á þing úr þriðja sætinu. Ef marka má fyrstu tölur stefnir í að óbreytt röð verði í þrem efstu sætum framboðslistans frá síðustu þingkosningum.

Viðbót - kl. 18:40

Þegar 1200 atkvæði hafa verið talin í prófkjörinu er staðan óbreytt á röð þriggja efstu og stefnir í að úrslitin verði með þessum hætti.

Kostuleg skrif á "Orðinu á götunni"

Það er oft athyglisvert að lesa sum skrifin sem birtast á "Orðinu á götunni" hér á Moggablogginu. Fannst þó merkilegt að sjá þar í gær skrif um framboðsmál Sjálfstæðisflokksins í Suðvesturkjördæmi. Þar er vikið að þeirri ákvörðun kjörnefndar að bæta einum frambjóðanda við hóp þeirra tíu sem gáfu formlega kost á sér fyrir lok framboðsfrests. Þar kemur fram að fimmta sætið á lista Sjálfstæðisflokksins í kraganum sé líklega varamannssæti á næsta kjörtímabili. Þetta eru nokkuð hlægileg skrif miðað við nýjustu skoðanakannanir.

Það hlýtur að vera skrifað um þetta á forsendum Samfylkingarmanna, en margar sögusagnir ganga um það hverjir skrifi á Orðinu, og ekki eru þær kjaftasögur um að sjálfstæðismenn eigi þar hlut að máli allavega. Það má svo sannarlega telja fimmta sætið á lista sjálfstæðismanna í kraganum, sem verður væntanlega leiddur af Þorgerði Katrínu Gunnarsdóttur, menntamálaráðherra og varaformanni flokksins, sem þingsæti og væntanlega hið sjötta líka. Í nýjustu mánaðarkönnun Gallups mælist nefnilega Sjálfstæðisflokkinn með heil sjö þingsæti í kjördæmi og meira en helmingsfylgi, hvorki meira né minna. Sterk staða það heldur betur.

Væntanlega er spáin um sjö þingsæti nokkur bjartsýni en það er hlægilegt að sjá vangaveltur um það að sjálfstæðismenn fái innan við fimm þingsæti í kraganum miðað við allar aðstæður. Það eru enda allar forsendur á því að listi sjálfstæðismanna í kraganum verði sigurstranglegur og öflugur. Það er öflugur hópur frambjóðenda þar og alveg ljóst að flokkurinn stendur gríðarlega vel á svæðinu, með hreina meirihluta í nokkrum sveitarfélögum og sterka stöðu í flestum öðrum. Allar forsendur eru fyrir góðu gengi að vori. Það er því undarlegt að sjá þessa spá, sem ekki á sér hljómgrunn í mánaðarkönnun Gallups allavega.

Konungsbók Arnaldar komin út

Í gær keypti ég nýjustu bók Arnaldar Indriðasonar, Konungsbók, og ætla mér að lesa hana nú næstu daga. Það verður svo sannarlega notalegt að byrja lesturinn eftir helgina og er væntanlega von á góðri lesningu. Það er vænst góðrar sölu á bókinni, enda er hún prentuð í 15.000 eintökum, en það er mesta upplag einnar íslenskrar skáldsögu til þessa í fyrsta holli prentunar. Þarna eru Erlendur, Elínborg og Sigurður Óli víðsfjarri, heldur er farið á önnur mið í spennunni.

Þetta er tíunda skáldsaga Arnaldar. Sagan gerist að mestu í Kaupmannahöfn árið 1955 og tengist leyndarmáli sem snertir helsta dýrgrip Íslands, Konungsbók Eddukvæða. Aðalsöguhetjan er ungur íslenskufræðingur, Valdemar að nafni. Valdemar heldur til náms í Danmörku, kynnist þar gömlum prófessor og um leið skelfilegu leyndarmáli sem leiðir þá félaga í mikla háskaför um Evrópu, inn í skjalasöfn, grafhýsi, fornbókasölur og á fleiri hættustaði. Þetta er mögnuð og spennandi saga, ef marka má fréttatilkynninguna og umsögn um bókina á kápu.

Það er ekki hægt að segja annað en að Arnaldur sé orðinn einn virtasti spennusagnahöfundur Norðurlanda og fer frægðarsól hans sífellt hækkandi. Nýlega var ein besta skáldsaga hans, Mýrin, kvikmynduð og er hún á góðri leið með að slá öll áhorfsmet. Er það eitthvað sem allir aðdáendur bóka hans áttu vel von á. Bækur hans hafa selt í um þremur milljónum eintaka í á þriðja tug landa og hefur enginn íslenskur rithöfundur náð slíkri útbreiðslu. Í dag er ítarlegt viðtal við Arnald í Fréttablaðinu, sem áhugavert er að lesa.

Það er því heldur betur tilhlökkunarefni að hefja lesturinn á Konungsbók nú á næstu dögum. Hlakka heldur betur til, get ekki annað sagt.

Frjálslyndir mælast með engan þingmann nú

Var að fara yfir prósentutölur í kjördæmum í nýjustu skoðanakönnun Gallups. Þar kemur hið merkilega fram að Frjálslyndi flokkurinn fær hvergi kjördæmakjörinn mann og því væri Guðjón Arnar Kristjánsson, formaður Frjálslynda flokksins, ekki á þingi væru þetta úrslit alþingiskosninga. Frjálslyndir mælast hæstir nú með 6% í Norðvesturkjördæmi en lægstir hér í Norðausturkjördæmi með 2%. Þetta er nokkuð högg fyrir Frjálslynda flokkinn, sem nú á þrjá alþingismenn.

Kosningalögin eru einföld hvað það snertir að fái flokkur ekki kjördæmakjör og fótfestu víða um land fær hann auðvitað ekki jöfnunarsæti. 5% fylgi á landsvísu þarf til að geta fengið jöfnunarsæti. Í síðustu kosningum hlutu Frjálslyndir tvo kjördæmakjörna menn og tvo jöfnunarmenn. Reyndar gekk Gunnar Örn Örlygsson, alþingismaður, úr flokknum vorið 2005 og gekk til liðs við Sjálfstæðisflokkinn og efldi því ríkisstjórnina með því.

Það eru mikil tíðindi þegar að formaður stjórnmálaflokks mælist ekki inni á þingi. Það virðist gilda nú bæði um Guðjón Arnar og Jón Sigurðsson, formann Framsóknarflokksins, sem mælist ekki heldur inni í Reykjavík norður eins og ég hef áður vikið að. Þetta verða erfiðar kosningar fyrir báða flokka að óbreyttu. Reyndar er mjög fróðleg greining á stöðu mála nú í greinargóðri spá Ólafs Þ. Harðarsonar á vef RÚV.

Samúel Örn í 2. sæti Framsóknar í Kraganum

Samúel Örn Erlingsson, varabæjarfulltrúi í Kópavogi og íþróttastjóri Ríkisútvarpsins, vann kosningu um annað sæti á lista Framsóknarflokksins í Suðvesturkjördæmi, á kjördæmisþingi á Seltjarnarnesi nú laust fyrir hádegið. Samúel Örn vann nokkuð góðan sigur í kosningunni, en tvær umferðir þurfti til að velja á milli hans, Unu Maríu Óskarsdóttur, Gísla Tryggvasonar og Þórarins E. Sveinssonar, semsagt fjögurra Kópavogsbúa. Samúel Örn hlaut þegar 91 atkvæði í fyrstu umferð og því mjög afgerandi forskot á aðra keppinauta um sætið.

Yfirburðir Samúels Arnar koma nokkuð á óvart, enda er hann tiltölulega nýr í stjórnmálum. Hann var nærri því að sigra prófkjör Framsóknarflokksins í Kópavogi snemma á árinu og varð annar. Hann komst þó ekki inn í bæjarstjórn Kópavogs, enda galt flokkurinn afhroð í kosningunum og hlaut aðeins einn mann kjörinn, leiðtogann Ómar Stefánsson, í stað þriggja áður í síðustu kosningunum sem Sigurður Geirdal leiddi flokkinn þar. Það verður nú hlutskipti Samúels Arnar að taka annað sætið, sem Páll Magnússon, bæjarritari í Kópavogi, sat í áður.

Í fyrstu umferð kjörs í annað sæti á lista flokksins hlaut Samúel Örn eins og fyrr segir 91 atkvæði, Una María 75 atkvæði, Gísli 60 og Þórarinn E. hlaut 11 atkvæði. Í seinni umferð hlaut Samúel Örn 148 en Una María 90 atkvæði. Eftir þessa kosningu tók við kjör í næstu sæti fyrir neðan. Una María Óskarsdóttir varð í þriðja sætinu og Gísli Tryggvason lenti í fjórða sætinu. Það verða því þrír Kópavogsbúar í fjórum efstu sætum flokksins í kjördæminu.

Það er merkilegt að sjá þessi úrslit og greinilegt að þarna eru nokkur tíðindi. Sigur Samúels Arnar eru nokkuð athyglisverð tíðindi allavega. Jöfn kynjaskipting er svo hjá flokksmönnum í þessi fjögur efstu sæti.

Samúel Örn í 2. sæti í SV-kjördæmi

Göngutúr í rökkrinu - prófkjörshugleiðingar

Eftir opnun kosningaskrifstofu Kristjáns Þórs og Þorvaldar í dag og notalegt spjall um stjórnmál við góða félaga fór ég í þriggja kílómetra göngu í Kjarnaskógi með Hönnu systur eftir að hafa ritað bloggfærslu um prófkjörsmálin okkar. Það var notaleg og góð stund í kvöldrökkrinu. Það var um margt að tala og þetta var lífleg stund. Það jafnast ekkert á við góða kvöldgöngu.

Ég er bjartsýnn á næstu vikur fyrir okkur sjálfstæðismenn í kjördæminu vegna prófkjörsins eftir þrjár vikur. Það er gott fólk í kjöri, vissulega vonbrigði að það væru ekki fleiri, en það stefnir í lífleg en vonandi málefnaleg átök um leiðtogastólinn í kjördæminu. Persónulega gleðst ég yfir því að við öll fáum nú tækifæri til að velja okkur nýjan kjördæmaleiðtoga með þessum hætti, nú þegar að Halldór hættir forystustörfum í stjórnmálum eftir langt og farsælt verk fyrir okkur hér. Það er tækifæri sem á að efla okkur sem liðsheild, ekkert nema gott um það að segja.

Ég fann kraft í okkur flokksmönnum við opnun beggja prófkjörsskrifstofanna í dag og tel öflugan tíma framundan. Hver svo sem úrslit verða tel ég okkur há þennan prófkjörsslag með þeim hætti að þar myndist sigursveit til verka. Það er notalegt að geta skrifað og fjallað um mál næstu vikna með líflegum hætti og það hyggst ég vissulega gera. Það sem skiptir mestu máli er að háð verði barátta sem öllum sé til sóma og ég tel mig þekkja leiðtogaefnin öll það vel að ég tel að þannig verði baráttan unnin. Öll eru þau sómafólk sem geta höndlað forystuna með sóma.

Hver svo sem næstu skref verða tel ég okkur geta haldið öflug í komandi kosningabaráttu eftir prófkjörið. Það tækifæri sem okkur gefst nú hér í Norðausturkjördæmi er að móta öfluga liðsheild til verka í langri kosningabaráttu. Ég tel það verða áhugavert að sjá hvernig hún raðast upp og hver verði hinn nýi leiðtogi sem tekur við keflinu af Halldóri Blöndal.

Þegar að við kveðjum Halldór að lokum við lok þessa kjörtímabils er það hið allra besta sem við getum fært honum við leiðarlok þessa að sigra kosningarnar í vor með glans. Það er markmiðið - að því berjumst við öll sem eitt. Einfalt mál!

Brosað með Baggalút

Fastur liður í vefrúntinum á hverjum degi er hinn óborganlegi vefur félaganna á Baggalút. Stórskemmtilegur og flottur vefur með góðu gríni. Allavega hentar hann vel mínum húmor. Finnst þeir félagar þar algjörir snillingar. Lög þeirra hafa létt mörgum lundina. Á hverju ári bíðum við svo eftir sykursætu aðventulagi vefsins og vel rokkuðu jólalaginu.

Finnst plöturnar þeirra virkilega góðar. Sú fyrri: Pabbi þarf að vinna..., var með flottum lögum og góðum húmor, eins og þeirra er von og vísa. Sérlega eru flott þar titillagið og svo auðvitað Settu brennivín í mjólkurglasið vina.... Alveg eðall. Platan þeirra í sumar: Aparnir í Eden, er ekki síðri og t.d. er lagið Allt fyrir mig með Bo Hall rosalega gott og grípandi. Textinn stuðaði suma, en hann er nettur og hress að hætti Baggalútsmanna.

Á fimmtudagskvöldið horfði ég á fínan skemmtiþátt Hemma Gunn á Stöð 2. Þar var frumflutt enn eitt úrvalslagið með Baggalút. Það heitir einfaldlega: Brostu! Fannst þetta grípandi og gott lag, eins og mörg hin lögin. Það passar allavega vel við núna um háveturinn. Það jafnast enda einfaldlega ekkert á við að brosa. Eitt bros getur enda dimmu í dagsljós breytt, eins og skáldið sagði. :)

Kvöldgestir Jónasar í 25 ár

Í vikunni voru liðin 25 ár frá því að útvarpsmaðurinn Jónas Jónasson byrjaði með spjallþætti sína Kvöldgesti á Rás 1. Á þessum tíma hefur þátturinn öðlast sess sem einn vinsælasti útvarpsþáttur landsins og Jónas markað sér sess í sögu íslensks útvarps með stíl sínum og takti í þættinum. Ég viðurkenni fúslega að ég hlusta mjög oft á þættina og met þá mikils. Oft sest ég niður seint á föstudagskvöldi og hlusta á, ef ég missi af hlusta ég á þá á ruv.is.

Það eiga allir sína sögu að baki og koma úr ólíkum áttum. Jónas hefur byggt sér upp þann merka stíl að geta kafað ofan í sál viðmælandans og opna hana fyrir landsmönnum. Með sínum takti hefur Jónasi enda tekist að fá gestina sína til að tjá sig á einlægan og skemmtilegan hátt um lífið og tilveruna. Oft er skemmtilegast að hlusta á viðtöl við fólk sem er með öllu óþekkt en Jónas hefur fengið til sín þingmenn, verkamenn og allt þar á milli í rauninni. Þeir eru mjög ólíkir en segja sína sögu í rólegheitum með manni sem kann að finna taktinn í samskiptum við þá og jafnvel sýna okkur aðra hlið á þeim.

Í vikunni var Jónas gestur í morgunþætti Gests Einars og Hrafnhildar á Rás 2 og ræddu um þáttinn og vinnuna á bakvið hann í góðu viðtali. Fyrsti gestur Jónasar í fyrsta þættinum þann 30. október 1981 var sr. Auður Eir Vilhjálmsdóttir, fyrsta konan í prestsembætti hérlendis. Í kvöld ræddi hann aftur við Auði Eir 25 árum síðar. Hlustaði á viðtalið sem var innihaldsríkt og gott, eins og venjulega. Vil óska Jónasi til hamingju með afmæli þáttanna og vona að hann verði lengi að enn, þó aldurinn færist vissulega yfir hann, eins og alla aðra.

Þess má að lokum geta að Jónas samdi fallegasta lagið sem Hljómsveit Ingimars Eydals flutti á öllum sínum glæsilega ferli, Vor í Vaglaskógi. Algjör perla, allavega í huga okkar norðanmanna.

Spenna hjá Framsókn í kraganum

Á morgun verða efstu sæti Framsóknarflokksins í Suðvesturkjördæmi ákveðin á tvöföldu kjördæmisþingi. Verður þar kosið milli fjögurra einstaklinga um annað sætið og stefnir því í spennandi kosningu um sætið. Siv Friðleifsdóttir, heilbrigðisráðherra, gefur ein kost á sér í fyrsta sæti framboðslistans. Siv, sem setið hefur á Alþingi frá árinu 1995, hefur sterka stöðu að því er virðist í kjördæminu og nýtur mikils stuðnings flokksmanna greinilega.

Þrátt fyrir að Siv hefði orðið undir í formannsslag við Jón Sigurðsson og ákveðið í kjölfarið að sækjast ekki áfram eftir ritarastöðunni í flokknum, sem er æðsta embætti innra starfs flokkskjarnans, (hún var ritari 2001-2006) hefur hún sterka stöðu og flestir telja hana hafa styrkst frekar en hitt. Siv leiddi lista flokksins í Reykjaneskjördæmi þegar árið 1995 og unnust tvö þingsæti á listanum þar undir hennar forystu bæði þá og 1999. Í kosningunum 2003 var hún ein kjörin á þing af hálfu flokksins í hinu nýja kragakjördæmi. Hún var umhverfisráðherra 1999-2004 og hefur verið heilbrigðisráðherra síðan í marsmánuði á þessu ári.

Páll Magnússon, bæjarritari í Kópavogi og aðstoðarmaður Valgerðar Sverrisdóttur í viðskiptaráðherratíð hennar 1999-2006, var í öðru sætinu í kosningunum 2003 og munaði litlu að hann kæmist inn á þing. Hann gefur ekki kost á sér nú og helgar sig störfum fyrir Kópavogsbæ. Um annað sætið takast á þau Gísli Tryggvason, Samúel Örn Erlingsson, Una María Óskarsdóttir og Þórarinn E. Sveinsson. Verður fróðlegt að sjá hvert þeirra fái sætið. Samúel Örn og Una María tókust á í prófkjöri Framsóknarflokksins fyrir síðustu sveitarstjórnarkosningar um leiðtogasætið að Sigurði Geirdal gengnum en urðu undir í þeim slag fyrir Ómari Stefánssyni. Una María var í þriðja sæti flokksins í kjördæminu í þingkosningunum 2003.

Gísli Tryggvason varð talsmaður neytenda fyrir rúmu ári og þykir hafa staðið sig með ágætum í því starfi. Hann er sonur Tryggva Gíslasonar, sem var skólameistari Menntaskólans á Akureyri með miklum krafti um árabil, og því bróðursonur Ingvars Gíslasonar, sem var alþingismaður Framsóknarflokksins í Norðurlandskjördæmi eystra um árabil og um skeið leiðtogi flokksins í kjördæminu og var menntamálaráðherra í ríkisstjórn dr. Gunnars Thoroddsens. Þórarinn E. Sveinsson er fyrsti varaþingmaður Framsóknarflokksins nú hér í Norðausturkjördæmi. Hann hefur nú flutt sig um set og reynir við annað sætið í kraganum nú. Það er erfitt að spá hver muni ná öðru sætinu og munu allavega margir fylgjast með úrslitunum og hver nái settu marki.

Það verður fróðlegt að sjá hvernig fer í þessu kjöri og jafnframt hvernig raðast í sætin fyrir neðan. Auk fyrrnefndra sem berjast um annað sætið og Sivjar sækjast Gunnleifur Kjartansson og Hlini Melsteð Jóngeirsson, sem báðir eru úr Hafnarfirði um neðri sætin. Eins og staða mála er í nýjustu könnun Gallups er Framsókn ekki með þingsæti í kraganum. Það er því hörð barátta framundan fyrir Framsókn í þessu kjördæmi, sem og mörgum fleiri. Staða flokksins er ekki beysin á landsvísu og hörð barátta, mikill lífróður, framundan fyrir Framsókn.

Prófkjörsskrifstofur opna á Akureyri

Kristján Þór Júlíusson, bæjarstjóri, og Þorvaldur Ingvarsson, læknir, sem báðir sækjast eftir fyrsta sætinu á framboðslista Sjálfstæðisflokksins í Norðausturkjördæmi að vori opnuðu í dag prófkjörsskrifstofur sínar í miðbænum á sama tíma, kl. 17:00. Fór ég við opnun beggja kosningaskrifstofanna og hitti þar gott fólk og ræddi pólitík og stöðu mála við fólk og frambjóðendurna. Það var ánægjulegt og gott spjall

Ég fagna þeim mikla krafti sem Kristján Þór og Þorvaldur leggja í baráttu sína. Þetta eru öflugir menn sem hafa metnað til verkanna og sýna það og sanna með því að opna heimasíður og kosningaskrifstofu. Ég hef ekki farið leynt með það að ég vil að Akureyringar fái öfluga málsvara á þing í komandi kosningum og ég mun styðja Akureyringa til þingmennsku og forystu á framboðslistanum að vori. Við öll hér hljótum að vilja okkar fulltrúa til verka og við vinnum að því að krafti. Við þurfum að koma okkar málum vel á dagskrá. Það er lykilatriði, tel ég allavega.

Það stefnir í líflegar og spennandi kosningar. Skv. nýjustu könnunum er ljóst að við höfum stöðu til að geta fengið fjóra þingmenn og þar með leiðtogastól kjördæmisins. Það er ekki efi í huga mér að við munum berjast til sigurs í maí og til þess að nýr leiðtogi okkar sem kjörinn verður í prófkjörinu í lok mánaðarins verði fyrsti þingmaður kjördæmisins.

Kannanir sýna okkur að það er staða mála í dag - við berjumst að því öll sem eitt að það vinnist í maí af miklum krafti. Ég mun því í prófkjörinu eftir þrjár vikur horfa til allra svæða og finna frambjóðendum á þeim svæðum stað á mínum lista. En ég mun styðja Akureyring til forystu á framboðslistanum. Það er einfalt mál í mínum huga og afgerandi alveg.

Á morgun mun kosningaskrifstofa Ólafar Nordal svo opna hér á Akureyri. Hún hefur ráðið Ragnar Sigurðsson, eftirmann minn á formannsstóli Varðar, sem kosningastjóra sinn hér á Akureyri og ég mun líta til þeirra á morgun. Það verður fróðlegt að fylgjast með því hvernig henni gengur í sínum slag.

Ég fagna því allavega fyrst og fremst að frambjóðendur opna hér skrifstofu og kynni með því sjálft sig og stefnumál sín af krafti fyrir okkur. Það er vel.

Hasar á Lækjartorgi - bjórsala stöðvuð

Hasar var á Lækjartorgi í dag þegar að bjórsala Frjálshyggjufélagsins var stöðvuð þar. Voru liðsmenn félagsins handteknir þegar þeir reyndu að selja bjórinn á svæðinu. Vildu þeir með þessu mótmæla einkasölu ríkisins á áfengi. Þeir vilja að hver sem er geti flutt inn og selt áfengi og selt í almennar verslanir, ef svo ber undir fyrir einkaaðila. Mótmælin fengu því frekar drastískan endi.

Mun Sölvi Tryggvason, fréttamaður NFS, hafa keypt fyrsta bjórinn af frjálshyggjumönnum. Var sá bjór gerður upptækur og lögregla gerði Sölva grein fyrir því að hann yrði kallaður sem vitni í málinu. Þetta eru harkaleg viðbrögð. Svosem eitthvað sem búist var við, en samt ansi drastískt. Fyrir nokkrum árum reyndu Heimdellingar að selja bjór á Ingólfstorgi og fékk það svipaðan endi en þetta virðist mun harkalegra en það var.

Ég styð málstað frjálshyggjumanna og tel rétt að stokka hlutina upp. Hvort rétt hafi verið að reyna að selja bjór með þessum hætti má eflaust deila víða um. Ég vil allavega að sala ríkisins á áfengi verði afnumin og einkaaðilar fái rétt til að selja áfengi. Þetta er partur af liðnum tímum og með ólíkindum að því hafi ekki enn verið breytt.

Komið í veg fyrir sölu á áfengi á Lækjartorgi