Fjöldamorð í Jerúsalem - Hamas fagnar drápum

Það er dapurlegt að heyra fréttir af fjöldamorðunum í skólanum í Jerúsalem, þar sem fjöldi nemenda voru myrtir í kvöld á fyrirlestri. Hamas hefur nú fagnað drápunum á nemendunum sem sýnir hversu kaldrifjuð og ógeðfelld þau samtök eru, en það vissu svosem flestir vel fyrir.

Þessi árás er greinilega pólitísk skilaboð frá Hamas. Mér finnst vissulega staðan í Mið-Austurlöndum fjarri því góð en mér finnst þau samtök sem drepa ungt fólk með svo kaldrifjuðum hætti og fagna þeim vígum opinberlega ekki vinna málstað sínum mikils fylgis eða samúðar.

Það er dapurlegt þegar að pólitískar væringar eru orðnar svo kuldalegar og tilfinningalausar að drepa þurfi ungt fólk svo ógeðslega til að koma skilaboðum á framfæri.

Átta létust á árás á skóla í Jerúsalem

Glæsilegt hjá MA!

Vil óska Örnu, Konna og Svölu innilega til hamingju með sigurinn í Gettu betur áðan og koma með því MA í úrslit í Gettu betur. Keppnin var æsispennandi og réðst ekki fyrr en í lokahlutanum. Leist þó ekkert á þegar að MH tók forystuna framan af en þeim tókst að vinna það upp með glans.

Þetta er í þriðja skiptið á síðustu fjórum árum sem Menntaskólinn á Akureyri er í úrslitakeppninni í Gettu betur. Skólinn vann keppnina árið 2006 og sigraði þá Verzló en tapaði fyrir Borgarholtsskóla árið 2005. Það ræðst svo á morgun hvort skólinn mætir MR, meisturum síðasta árs, eða Borgarholtsskóla.

Keppnin átti sínar hápunkta. Verð að viðurkenna að mér leist ekkert á blikuna þegar að MA flaskaði á spurningunni um Ronald Reagan og skaut á Bill Clinton, vitandi að viðkomandi fæddist í febrúar árið 1911. En þetta hafðist þrátt fyrir þá vandræðalegu villu.

En já; flott hjá MA! Þetta verður fjör í næstu viku.

Menntaskólinn á Akureyri kominn í úrslit

Mikil mildi að vel fór - myndir af bílflökum

Það er gott að heyra að vel fór, miðað við aðstæður, þegar að bíll fór út í tjörnina. Það er skelfileg lífsreynsla að lenda í slíku og mikið sjokk en alltaf gott þegar að vel fer.

En mér finnst spes þessar myndbirtingar NetMoggans af bílflökum, eftir hin ýmsu slys. Finnst þessar myndir af bílflökum ekki hafa neitt fréttagildi í sjálfu sér.

Finnst þetta einna mest áberandi hjá Mogganum og eðlilegt að velta því enn einu sinni fyrir sér. Eru hálf undarlegar myndbirtingar af þessu tagi.

Bíll í Reykjavíkurtjörn

Vísindalegar kynlífsmælingar á bandarískum staðal?

Vísindin eru oft mögnuð. Bandarískir vísindamenn hafa verið snillingar í að gera vísindalegar rannsóknir á öllum merkilegum hlutum og gera úr því fjölmiðlamál. Eðlilega er þessi kynlífsrannsókn ein þeirra og vekja mikla athygli víða um heim. Það er merkilegt að gerð sé bandarísk könnun sem verður að einhverju heimsmeðaltali, enda er ég viss um að við norðurlandabúar höfum mun betri kraft og úthald en þeir sem eru vestanhafs.

Það sem mér fannst reyndar fyndnast hvað varðar þessa "hávísindalegu" könnun er að hún er byggð á upplýsingum kynlífsfræðinga og sérfræðinga en ekki fjölda fólks, þetta er semsagt ekki könnun byggð á fjölda fólks, eða það er freistandi að telja það. Ekki er gott svosem að giska á hversu margir stúdera þessi fræði einvörðungu. Það er reyndar ekki svo gott að fullyrða að þetta sé fámennur hópur, en hvað með það.

Þessir sérfræðingar virðast vera nokkuð sérstakir í sínu mati og áhugavert að vita ef gerð yrði könnun meðal evrópskra eða norrænna sérfræðinga í sömu fræðum hver niðurstaðan væri. Ætli að það myndi ekki bætast eitthvað í mínútufjöldann?

Kynmök taki sjö til þrettán mínútur

Patrick Swayze með briskrabbamein

Það eru dapurleg tíðindi að leikarinn Patrick Swayze hafi fengið krabbamein í bris og berjist fyrir lífi sínu. Það er reyndar mjög deilt um það nú í fjölmiðlum hversu erfið barátta hans muni verða og sumir fjölmiðlar hafa gengið mjög langt í að nefna tímamörk þess sem hann eigi eftir ólifað en talsmenn leikarans dregið það til baka. Engu að síður blasir við öllum að briskrabbamein eru lífshættuleg veikindi og batavonir því miður mjög litlar.

Patrick Swayze er vissulega einn þessara leikara sem átti sitt gullaldarskeið og hefur lifað í skugga þess um nokkuð skeið. Hann var gríðarlega vinsæll á níunda áratugnum og í byrjun þess tíunda og lék í stórum og flottum kvikmyndum með rómantísku ívafi. Það verður varla um það deilt að Dirty Dancing er stærsta myndin hans; hún kom af stað miklu æði og sennilega var hún stærsta kvikmynd ársins 1987. Swayze og Jennifer Grey voru flott í myndinni, sem varð ein eftirminnilegasta dans- og söngvamyndin á níunda áratugnum.



Swayze átti glæsilegan hápunkt á ferlinum ennfremur með vasaklútamyndinni Ghost, þar sem hann lék látinn mann, Sam, sem vildi koma skilaboðum til kærustunnar sinnar, Molly Jensen, og vildi vara hana við hættunni frá þeim sem myrtu hann. Allir muna eftir ástarsenunni frægu (sjá efri klippuna) í keramikgerðinni þar sem Swayze og Demi Moore létu allt flakka með gamla slagarann Unchained Melody (sem varð vinsælt aftur svo um munaði) ómandi undir. Myndin sló í gegn og Whoopi Goldberg fékk óskarinn fyrir að túlka svikamiðilinn Odu Mae Brown með glæsibrag.



Þegar að farið er í nostalgíuna og rifjað upp gömul augnablik er sannarlega við hæfi að rifja upp dansatriðið margfræga úr Dirty Dancing. Undir hljómar hið sívinsæla lag I´ve Had The Time Of My Life, sem hlaut óskarinn sem besta kvikmyndalagið árið 1988. Það er svo bara að vona að Patrick Swayze nái að sigrast á þessum veikindum.

Patrick Swayze með krabbamein

Gates fellur af stalli - ríkidæmi Björgólfsfeðga

Það eru mikil tíðindi að auðjöfurinn Bill Gates sé fallinn af stallinum sem ríkasti maður heims, en ég held að það sé rétt munað hjá mér að Gates hafi drottnað efstur á honum síðan 1993 allavega, eða eitthvað þar um bil hið minnsta, 13-14 ár. Warren Buffet er nú orðinn voldugri en tölvurisinn mikli sem hefur verið umtalaður sem sá ríkasti.

Ríkidæmi Björgólfs Thors Björgólfssonar er það mikið að hann kemst ofarlega á listann. Eru þeir feðgarnir báðir á listanum en þó neðar en í fyrra; Björgólfur Thor er í 307. sæti en var í því 249. síðast og faðirinn í því 1014. en var í 799. sæti síðast. Eignir Björgólfs Thors eru metnar á 3,5 milljarða dollara, rétt eins og í fyrra, en Björgólfs eldri á 1,1 milljarða dollara, en það var 1,2 milljarðar fyrir ári.

Þó þeir hafi lækkað á listanum er það mikið ríkidæmi og Thorsættin er enn mjög áberandi heldur betur. Björgólfur Thor varð fyrsti Íslendingurinn sem komst á lista Forbes yfir ríkustu einstaklinga heimsins. Veldi Björgólfsfeðga er eins og flestir vita upprunnið úr gosdrykkja- og bjórverksmiðjum í Rússlandi. Það var mjög merkilegur þáttur af Sjálfstæðu fólki þegar að Jón Ársæll fylgdi Ólafi Ragnari í heimsókn til Rússlands þar sem hann var að mæra bransa Björgólfsfeðga.

Hefði fáum órað fyrir slíkum hóli við upphaf Hafskipsmálsins að Ólafur Ragnar myndi mæra þá feðga. En svona er nú heimurinn oft kaldhæðinn. En já, það er semsagt lexían að ríkidæmi Björgólfsfeðga og Gates minnkar frá síðasta ári samkvæmt Forbes-listanum - þó heldur mikill munur sé á þeim breytingum.

Warren Buffet ríkastur

Ánægjuleg tíðindi

Það er ánægjulegt að leitin að manninum sem týndur hafði verið vikum saman bar árangur strax á fyrsta sólarhringi sem lýst var eftir honum. Það er ekki nema von að sú spurning vakni hversvegna það hafði ekki verið gert áður. Það hefur sýnt sig vel þegar að ungmenni hafa horfið á síðustu vikum að það skilar árangri að lýsa fljótlega eftir þeim, jafnvel á fyrsta sólarhringi eftir að þau skila sér ekki heim eða láta sig hverfa af einhverjum ástæðum. Þessi mál eru öll misjöfn en það er eðlilegt að þegar að tíminn er mældur í vikum er eðlilegt að hafa miklar áhyggjur.

Skrifaði aðeins um þetta í dag. Fékk tölvupóst frá manni sem var tengdur einstaklingi sem hvarf sporlaust fyrir rúmum áratug en aldrei hefur verið upplýst hvað varð um. Heyrði smá af þeirri sögu. Það var áhugavert og ég vil þakka þennan póst. Það er aldrei hægt að setja sig í spor þeirra sem upplifa slíkan missi og þurfa að lifa með mörgum erfiðum spurningum alla tíð, sem aldrei fást sennilega traust svör við. Það eru erfið örlög að lifa með þegar að um er að ræða ættingja eða ástvin.

Lexían af þessu er að mikilvægt er að leitin hefjist fljótlega og tekið sem fyrst á málum þeirra sem skila sér ekki heim. Sem betur var mál þessa manns ekki eitt af þeim og ánægjulegt að hann hafi fundist svo fljótt sem raun ber vitni.

Sigurbjörn kominn fram

Sáttatónn í fornum keppinautum í Hvíta húsinu

Átta mánuðum fyrir forsetakosningarnar í Bandaríkjunum hefur John McCain nú endanlega náð útnefningu repúblikana þó það hafi verið ljóst hið minnsta í mánuð að svo myndi fara. Á þeim tímamótum hefur George W. Bush, forseti Bandaríkjanna, nú lýst opinberlega yfir stuðningi við McCain. Það var merkileg stemmning á blaðamannafundi þeirra í Rósagarði Hvíta hússins síðdegis en þar voru andar pólitískra sátta alls ráðandi.

Fyrir átta árum börðust McCain og Bush forseti hatrammlega um útnefningu repúblikana. Bush var lengst af fyrir forkosningaslaginn með pálmann í höndunum en hann varð fyrir miklu pólitísku áfalli er hann tapaði fyrir McCain í New Hampshire, stokkaði þá upp kosningabaráttu sína og réðist harkalega að McCain og einkum herferli hans í Víetnam. Var um að ræða eina harkalegustu persónulegu árás í bandarískum forkosningaslag. Með þeim tónum náði Bush að snúa stöðunni við með sigri í Suður-Karólínu og náði hnossinu mikla eftir blóðugan slag um smátíma sem náði hámarki með skítkastinu í suðurríkjunum.

Átta árum síðar er Bush að hætta í stjórnmálum, getur ekki gefið kost á sér til endurkjörs og er á heimleið til Texas eftir tíu mánuði. Nú er hinn forni keppinautur um Hvíta húsið orðinn forsetaframbjóðandi Repúblikanaflokksins og berst fyrir því að flokkurinn haldi valdamesta embætti heims, verði áfram miðpunktur valdatafls heimsins. McCain og Bush eru mjög ólíkir stjórnmálamenn og hafa ólíkan bakgrunn og reynslu fram að færa. Það er svolítið merkilegt að sjá nú Bush verja hinn forna keppinaut, heita honum stuðningi og tryggð og virka nokkurn veginn sannfærandi í því.

Andar liðinna tíma hljóma í bakgrunninum engu að síður. Forkosningaslagur þeirra fyrir átta árum var harður og spennandi um smátíma og er eftirminnilegur í sögulegu ljósi. Nú þegar að völdin í flokknum eru smátt og smátt að færast yfir til McCain er stuðningur forsetans honum mikilvægur, einkum í suðurríkjunum. Þrátt fyrir að McCain verði elsti forseti Bandaríkjanna nái hann kjöri markar valið á honum sem forsetaefni viss þáttaskil í Repúblikanaflokknum.

John McCain var reyndar hinn stóri sigurvegari forkosninga míní-útgáfu ofur-þriðjudags. Ekki aðeins hefur hann hlotið útnefninguna og getur farið að skipuleggja framboð sitt og velja varaforsetaefni heldur getur hann slappað af og horft úr fjarlægð á harðvítuga baráttu Obama og Hillary um útnefningu demókrata næstu sjö vikurnar hið minnsta. Það er sannarlega mikill munaður.

... að vera týndur vikum saman

Það er fátt dapurlegra en þegar að fólk hverfur sporlaust og enginn veit eitt né neitt um afdrif þess. Finnst það skuggalegasta í þessu máli vera að maðurinn sem lýst er eftir hefur verið týndur vikum saman og málið er eitt stórt spurningamerki. Það er eitt þegar að fólk hverfur í nokkra daga en þegar að ekkert er vitað um fólk í svona langan tíma vakna eðlilega margar spurningar sem erfitt er að fá svar við.

Það er ekkert hægt í þeirri stöðu annað en að lýsa eftir fólki og er merkilegt að ekki hafi fyrr verið gert í þessu tilfelli. Það er varla hægt að setja sig í spor aðstandanda í svona tilfellum þegar að fólk hefur verið týnt um skeið og hlýtur að vera mjög erfitt að vinna úr. Annars eru svona mál alltaf sorgleg og það sem mestu skiptir er að vita hvað varð um þá sem hverfa vikum saman og reyna að leysa málið.

Vonandi tekst það í þessu tilfelli með því að maðurinn finnst heill á húfi.

Lýst eftir Sigurbirni Marinóssyni

Töffarinn Björk

Finnst það flott hjá Björk að tileinka Tíbetum lagið Declare Independence og tala þar með máli þeirra og gefa Kínverjum langt nef. Björk má eiga það að hún hefur aldrei verið lydda eða skaplaus kona. Hefur þvert á móti alltaf farið eigin leiðir í listsköpun og karakter - ekki verið feimin að sýna skapið. Þessi ákvörðun Bjarkar sýnir hversu sterkur karakter hún er og er alveg óhrædd við að segja sínar skoðanir með þeim hætti sem hún telur best.

Björk hefur verið þekkt fyrir að sýna hliðar sem enginn annar hefði þorað, nægir þar að nefna svanskjólinn margfræga á Óskarsverðlaunahátíðinni fyrir sjö árum, er hún var tilnefnd á hátíðinni fyrir lag sitt úr Myrkradansaranum. Svei mér þá ef það er ekki enn verið að stæla hann öðru hverju.

Það er merkilegt að Björk, sem hefur ekki lifað í hátísku erlendu sérfræðinganna, eigi einn umdeildasta kjólinn á verðlaunahátíð í Hollywood á þessum áratug. En kannski hefur þessi sérstaða hennar aukið umfjöllunina enn frekar og ágengni ljósmyndaranna. Má vera.

Mér finnst það gott hjá Björk að sýna sjálfstæði og eigin huga, en ekki falla í hið augljósa form þess sem þorir engar áhættur að taka. Hún er töffari.

Yfirlýsing frá Björk

Óreglan í stjörnulitrófinu

Það er varla orðin tíðindi að heyra af því að einhver stjarnan eigi við einhver óregluvandamál að stríða og berjist við að líta upp úr vandanum, þrátt fyrir alla sína frægð og frama, sem jafnan verður eins og myllusteinn um hálsinn. Það er vonandi að hin breska Lily Allen muni sjá ljósið og geta snúið út úr sínum ógöngum.

Það er engu að síður oft erfitt að hugsa sér heiminn séð með augum þessara stjarna vestanhafs sem lifa sínu lífi í myndavélablossum og mismikilli óreglu í og með. Það er vissulega svo að flestar þessar stjörnur þurfa að eyða vænni fúlgu í að hugsa um útlitið, fötin og allt annað sem máli skiptir.

Samt eru þetta upphæðir og lífstíll sem meðaljóninn í mannlífshafinu botnar ekkert í. Ekki færa þessir peningar fólkinu hamingju en það þarf vænan skilding til að halda þeim lífsstandard sem mestu skiptir.

Hætt að djamma

Óþægileg tilfinning - allur er varinn góður

Það er gott að það var engin alvarleg bilun í Lundúnavél Iceland Express, en í þessum efnum sannast að allur er varinn góður og eðlilegt í stöðunni að snúa við. Það hlýtur að vera mjög óþægileg tilfinning að vera staddur í flugvél eftir stutta flugferð og þurfa svo að snúa við vegna bilunar, vita ekki hvað er að og hvernig aðstæður eru.

Það er þó fyrir mestu að brugðist var rétt við þessum aðstæðum og engin alvöru hætta var um ræða í þessu tilfelli. Flugið er virkilega notalegur samgöngumáti og reyndar sá besti að mörgu leyti, en það eru hættur í fluginu og það er eitt hið versta sem til er að vera staddur í um eða miðri flugferð og vita að eitthvað er að.

Vél Iceland Express snúið við

Sterkir sigrar hjá Hillary Clinton í Ohio og Texas

Það er óhætt að segja að Hillary Rodham Clinton hafi blásið lífi að nýju í forsetaframboð sitt með sterkum sigrum í Ohio og Texas. Hillary varð að sigra í báðum fylkjum til að framboð hennar yrði trúverðugt að nýju og henni tókst það á lokasprettinum með aðdáunarverðum hætti. Hún vann dag og nótt síðustu vikuna til að landa sigri og eiga endurkomu í slaginn, sem flestir töldu lokið og tókst það sem hún ætlaði sér.

Það er löngu vitað að Hillary Rodham Clinton er ótrúleg kjarnakona sem kann strategíuna og er orðin þaulæfð í baráttuandanum í kosningabaráttu. Sú reynsla lék lykilhlutverk síðustu þrjá sólarhringana þar sem henni tókst að snúa við töpuðu spili í Texas og tókst að landa traustum sigri í Ohio, sem reyndar var hvergi nærri gefið fyrir um viku, en það varð ljóst eftir því sem leið að síðustu helgi að hún myndi hið minnsta vinna Ohio, flestir töldu að það yrði tæpt en hún vann mjög afgerandi miðað við spár.

Það er ekkert öruggt lengur í forkosningaslag demókrata. Barack Obama var með pálmann í höndunum þar til í gærkvöldi en þetta eru lykilsigrar fyrir forsetaefni demókrata í baráttunni. Líkurnar á því að Hillary Rodham Clinton verði forsetaefni demókrata hafa altént aukist talsvert og ljóst að slagurinn milli fyrstu konunnar og fyrsta þeldökka mannsins sem eiga von á forsetaembættinu og farmiða í slaginn um Hvíta húsið mun standa í margar vikur í viðbót, hið minnsta þangað til í maíbyrjun á meðan að John McCain hefur tryggt sér útnefningu repúblikana.

Í skrifum mínum fyrir nokkrum dögum varaði ég við því að Hillary Rodham Clinton yrði talin pólitískt af þó að á móti blæsi hjá henni. Það er einfaldlega þannig að Clinton-hjónin fúnkera best undir álagi, þar sem sækja verður mikilvægan sigur í þröngri stöðu. Það er allavega stórmerkilegt að sjá hvernig að Hillary fór á móti straumnum, vann eins mikið og hún gat, lagði nótt við dag og tók bæði lykilfylkin í gærkvöldi.

Bill Clinton sagði fyrir nokkrum vikum að Hillary yrði að sigra bæði Ohio og Texas til að eiga möguleika. Það voru orð að sönnu. Án þessara sigra væri Hillary búin að vera en hún er komin aftur - komin af krafti. Og þessi forkosningaslagur er fjarri því búinn.

Clinton hvergi af baki dottin

Rothögg fyrir AC Milan - óvæntur sigur í Mílanó

Það var aldeilis merkilegt að sjá Arsenal slá út Evrópumeistara AC Milan á heimavelli þeirra á San Siro í Mílanó í kvöld. Rothögg var það og er áfall þeirra mikið. Fyrirfram átti ég ekki von á að Arsenal myndi takast að slá AC Milan út en þeir áttu það skilið eins og þeir léku í kvöld, tóku þetta vel og af skynsemi.

Arsenal leiftraði í kvöld af þeirri snerpu og krafti sem einkennt hefur AC Milan en þeir voru sannarlega heillum horfnir í kvöld og lágu greinilega vel við höggi og fengu vondan skell á heimavelli sínum. Þar á bæ þurfa menn að taka sig saman í andlitinu.

Það verður fróðlegt að sjá hvernig Evrópumeistarakeppnin fer, án Evrópumeistaranna. Eins og Arsenal spilaði í kvöld munu þeir fara langt spái ég. Flott kvöld fyrir þá svo sannarlega.

Arsenal vann frækinn 2:0 sigur í Mílanó

Sverfir að hjá starfsfólki fjármálafyrirtækjanna

Það er greinilegt að það er ekki traustast í dag að starfa í fjármálafyrirtækjunum. Sú svarta tíð sem ríkir á fjármálamarkaði í dag leiðir af sér að það er ótryggt um stöðu mála og það hefur blasað við vikum saman að það komi til uppsagna og uppstokkunar í þeim geira. Það er alltaf kuldalegt að vera í þeim bransa sem er á niðurleið og vita að það á að stokka upp - það vill enginn verða fyrir þeim niðurskurði.

Var fyrir nokkrum dögum á fundi með forstjóra í fjármálafyrirtæki sem skipti starfsmönnum í þrjá hópa; þann fyrsta sem væri eðalstarfsfólkið á vinnustaðnum, öðrum í miðlungshóp sem stæði sig ágætlega en væri að fljóta í og með á afrekum fyrsta hópsins og svo þeim þriðja sem væri sísta starfsfólkið sem væri að fljóta á því góða frá báðum efri hópunum. Það er eflaust svo að það kemur fyrst niður á lægri hópum þeirrar greiningar þegar að sverfir að. Haldið er í toppfólkið en hinir mæta afgangi og eru fyrst skornir niður. Þá reynir virkilega á góðu verkin í fyrirtækinu og hverjir standa sig.

Það var farið með uppsagnirnar í bönkunum, sem voru hafnar fyrir misseri síðan hálfpartinn sem mannsmorð. Mörgum uppsögnum var lokið með starfslokasamningum svo að lítið var rætt um uppstokkanir. Öðrum er boðið að taka á sig lægri laun og þeir ganga svo út. Fyrir suma verður uppsögnin og uppstokkun á vinnustaðnum skiljanlega mjög erfið, enda er kuldalegt fyrir alla að vera sagt upp í svona tíðarfari.

En í öllum breytingum felast viss tækifæri. Vonandi er hið fornkveðna rétt að góðu fólki séu allir vegir færir, meira að segja í kuldatíð.

Leita að nýrri vinnu

Kuldatíðin - mildi að vel fór í Öxnadal

Það hefur verið kuldatíð hér fyrir norðan síðustu daga og skipst á skin og skúrir reyndar nú um nokkuð skeið, umhleypingar með vænum dassa af snjó og kulda, enda flestir farnir að hugsa vel til vorsins og sólardaganna. Það getur verið napurt og leiðinlegt veðrið í Öxnadal á meðan að hér er þolanlegt veður og þetta var einn dagurinn af þeirri sort.

Það er mildi að vel fór í þessu umferðaróhappi í Öxnadal í dag. Bakkaselsbrekkan getur verið mikill farartálmi í vondum veðrum og erfið við að eiga, þó að hún hafi skánað eftir að breytingar urðu á veginum fyrir nokkrum árum, en áður var hún viðsjárverð þegar að kólnaði og þar urðu mörg slys. Kipptist við að sjá fyrirsögnina og átti von á að það hefði orðið stórslys en mikill er léttirinn að sjá að það fór í sjálfu sér allt mjög vel, miðað við aðstæður.

Vonandi fer annars að koma vor og heitari tíð, það er ekki laust við að maður sé búinn að fá leið á kuldanum og umhleypingunum.

Umferðaróhapp í Öxnadal

Endatafl í fjölmiðlasögunni um Önnu Nicole

Ár eftir andlát Önnu Nicole Smith er það endanlega ljóst sem flestir vissu fyrir; dóttirin, einkaerfingi hennar, eignast það sem hún átti í lifanda lífi. Með þessu er í raun ljóst að dóttirin erfir ársgömul frægt erfðamál Önnu Nicole á hendur ættingjum J. Howard Marshall, sem hún var gift undir lok ævi hans og barðist alla tíð síðan til dauðadags um vænan bita af eignum hans. Ennfremur er ljóst að dóttirin erfir vænar fúlgur og eðlilega er stofnaður sjóður til að halda utan um peningana.

Fyrir ári var deilt um það hver var faðir litlu stelpunnar, einkaerfingja Önnu Nicole. Enda skiljanlegt, þar sem mun frekar var deilt um peninga og auðæfi en einungis barnið. Enda deildu hið minnsta þrír menn um hver ætti stelpuna og auk þess vildi mamma hennar, sem Anna Nicole hataði eins og pestina í lifanda lífi, fá auðæfin með því að fá dótturina. Seint og um síðir, eftir ótrúleg fjölmiðlaréttarhöld var spurningunni svarað, en annars hefði varla þurft faðernispróf þar sem stelpan verður sífellt meira lík föður sínum, ljósmyndaranum Larry Birkhead.

Þar sem stelpan er aðeins eins og hálfs árs gömul verður hún undir yfirráðum föðurins í yfir sextán ár. Um mikla peninga er að ræða og varla við öðru að búast en að faðerninu fylgi mikil völd í öllum málarekstrinum, sem hefur þegar tekið tæpan einn og hálfan áratug, en Anna Nicole náði eins og fyrr segir aldrei fullnaðarsigri í málinu, sem er þegar orðið eitt hið mest áberandi síðustu áratugina.

Þessi mikla dramatík verður svolítið sérstakt í augum þeirra sem fylgjast með og munu aldrei sjá aðra eins peninga. Ekki er hægt að segja annað en að allt þetta mál líkist nokkuð dauða Christinu Onassis, einkadóttur skipakóngsins Aristotle Onassis, sem lést langt fyrir aldur fram árið 1988, aðeins 38 ára gömul, og eftirmála þess. Christina lét aðeins eftir sig eina dóttur, Athinu. Hún erfði allt eftir móður sína og meginhluta þess sem eftir stóð af Onassis-ættarveldinu, sem afi hennar lét eftir sig er hann lést árið 1975.

Vandinn var hinsvegar sá að Athina var aðeins þriggja ára gömul. Faðir hennar, Thierry Roussel, sem hafði skilið við Christinu, hafði því full yfirráð yfir málefnum erfðaríkis Christinu og málefnum dóttur þeirra. Það stóð í rúm fjórtán ár. Enn í dag hefur Athina, sem vill lítið vita af föður sínum í dag, ekki fengið öll yfirráð yfir Onassis-arfleifðinni og standa meira að segja málaferli um að hún fái full yfirráð þó að hún hafi skv. erfðaskrá átt að erfa móður sína að öllu leyti og endanlega er hún varð 21 árs árið 2006.

Nei, það er ekki tekið út með sældinni að vera frægur...... er það ekki lokalexían af þessu öllu? Held það bara....

Dóttir Önnu Nicole Smith erfir móður sína

Hver trúir á svona peningasvindl?

Það er ótrúlegt að það þurfi að vara fullorðið fólk sérstaklega við vefsíðum sem eru ekkert nema svikamylla í gegn, þar sem reynt er að ná peningum af fólki. Það hefur svo mikið heyrst af svona nígeríusvindli í gegnum tíðina að það var varla við öðru að búast en að fólk hefði lært sína lexíu. Það virðist þó ekki vera.

Það líður varla sá mánuður, stundum enn skemmra jafnvel, að maður fái ekki einhvers konar svona skilaboð um peningasvindl í tölvupósti. Það hvarflar ekki að manni að taka mark á þessu rugli en vonandi eru aðrir orðnir meðvitaðir um að það er bara verið að hafa það að fífli.

Skilaboðin eru giska einföld; föllum ekki flöt fyrir peningasvindlinu.

Varað við vefsíðum

Sundlaugardóni í farbann - rafbönd tekin upp?

Það er gott að Hæstiréttur staðfesti farbannið yfir sundlaugardónanum í Reykjanesbæ, en hann reyndi að flýja land í síðustu viku. Margir spyrja sig að því hvort farbannið sé einhvers virði, hvort það sé ekki auðvelt engu að síður að komast úr landi. Það er ekki langt síðan að pólskur maður í farbanni, sakaður um nauðgun á Selfossi, komst úr landi og ljóst varð að hann yrði ekki framseldur þrátt fyrir farbann hér á Íslandi.

Þessi farbönn eru alls ekki öruggt úrræði til að halda mönnum hérlendis, sem bíða þess að mál þeirra fari áfram í kerfinu. Eðlilegast er að haft verði betra eftirlit með kynferðisafbrotamönnum á reynslulausn með rafrænum ökklaböndum. Það væri langeðlilegast í stöðunni og í raun hið eina sem getur tryggt vel að ekki sé reynt að flýja land.

Rafræn ökklabönd hafa verið í notkun erlendis með góðum árangri og engin ástæða til að bíða með að taka þau upp hér. Það eru fá úrræði betri allavega í stöðunni.

Hæstiréttur staðfestir farbannsúrskurð

Klaufaleg ummæli hjá Marion Cotillard

Það er ekki hægt að segja annað en að ummæli leikkonunnar Marion Cotillard um hryðjuverkin í Bandaríkjunum árið 2001 séu mjög klaufaleg. Enda á hún erfitt með að verja þau, svo skömmu eftir að hún glansaði á Óskarsverðlaunahátíðinni í Los Angeles og hlaut verðlaunin fyrir litríka túlkun sína á Edith Piaf. Það blasir við öllum að hefðu þessi ummæli verið orðin opinber fyrir um mánuði hefði það kostað hana óskarsverðlaunin.

Það verður þó seint sagt svosem að Marion Cotillard sé fyrsti leikarinn í sögu óskarsverðlaunanna sem stuðar og hefur sagt margt miður gáfulegt, enda mörg dæmi um leikara sem hafa stuðað akademíuna. Þeirra eftirminnilegast hlýtur að teljast þegar að Marlon Brando afþakkaði óskarinn fyrir túlkun sína á Don Vito Corleone í The Godfather á áttunda áratugnum og sendi þess í stað leikkonu í indíánabúningi til að taka við verðlaununum og senda út pólitísk skilaboð að hætti hans.

Það hefur löngum loðað við að Frakkar séu ófeimnir við að segja skoðanir sínar og stuða Bandaríkin á marga vegu. Það er reyndar mjög merkilegt að bandaríska kvikmyndaakademían hafi ákveðið að verðlauna franska leikkonu nú, svo skömmu eftir ólguna á milli Bandaríkjanna og Frakklands fyrr á þessum áratug, þar sem meira að segja frönskurnar voru nafngreindar upp á nýtt sem frelsiskartöflur, eða freedom fries í stað french fries. En Cotillard átti verðlaunin skilið, enda glansandi góð sem Piaf.

Það verður þó fróðlegt að sjá hvort að Bandaríkjamenn muni heillast meira af þessari frönsku heilladís eftir þessi pólitísku skilaboð.

Segir ummæli Cotillard slitin úr samhengi