Líflaust yfir Ríkissjónvarpinu fyrir norðan

Var að koma heim og ætlaði aldrei þessu vant að stilla á Ríkissjónvarpið og horfa aðeins á það á laugardagskvöldi. Þá blasti við mér ekkert nema korn á sjónvarpsskjánum, alveg steindautt yfir öllu. Hélt fyrst að ríkið hefði gefist upp á að bjóða mér andstæðingi ríkisvæddrar fjölmiðlunar afnot af sér en heyrði svo áðan í vini mínum og hann hafði svipaða sögu að segja. Steindautt yfir ríkissjónvarpinu hérna fyrir norðan semsagt. Sá svo áðan á vef RÚV að sendirinn á Vaðlaheiði hefði lent í einhverri bilun.

Þannig að það fer lítið fyrir ríkisvæddu sjónvarpi hér á þessu laugardagskvöldi.

Simpson-kvikmyndin frumsýnd í kvöld í Vermont

Í kvöld verður kvikmyndin um Simpson-fjölskylduna frumsýnd í Springfield í Vermont. Lengi hefur verið beðið eftir kvikmynd um fjölskylduna og eftirvænting aðdáendanna eftir henni orðinn nokkur. Fjöldi bæja með nafnið Springfield börðust um að fá frumsýningarréttinn á myndinni, en staðsetning fjölskyldunnar var valin á sínum tíma í Springfield vegna þess að það var það staðarnafn sem var í flestum ríkjum landsins. Vermont varð fyrir valinu, þó ég hafi reyndar alltaf tengt Springfield við Illinois.

Það eru að verða tveir áratugir liðnir frá því að fyrsti þátturinn um hina óborganlegu og stórskemmtilegu fjölskyldu var sýndur í bandarísku sjónvarpi. Það var í desember 1989. Er þátturinn orðinn lífseigasti gamanþáttur í sögu bandarísks sjónvarps og nýtur enn gríðarlegra vinsælda. Er hann enn sýndur á besta sýningartíma og hefur haldið stöðu sinni og áhorfendatölum í gegnum þykkt og þunnt í öll þessi ár. Engin merki eru um það að sýningar á þáttunum hætti á komandi árum, vinsældirnar eru enn miklar og eftirspurn eftir ævintýrum fjölskyldunnar haldast óbreyttar.

Er óhætt að fullyrða að fáir ef nokkrir af forystumönnum Fox-sjónvarpsstöðvarinnar hafi átt von á þessum miklu vinsældum er þátturinn hóf göngu sína og hafi spáð fyrir um þau áhrif sem hann hefur haft í gegnum tíðina. Fyrstu þættirnir sem sýndir voru í desember 1989 og janúar 1990 áttu einungis að verða prufuþættir, til að kanna hvort þeir myndu ná einhverjum vinsældum. Þeir slógu í gegn og eftir það var ákveðið að klára 24 þátta seríu fram á árið 1990 til að kanna hvort eftirspurn yrði eftir frekari þáttum um fjölskylduna. Söguna þekkja allir, þættirnir ganga enn og vinsældirnar hafa eins og fyrr segir ekkert dalað.

Þátturinn hefur náð athygli almennings og verið miðpunktur í lífi fólks allan tímann og hafa á þessum tveim áratugum eignast breiðan áhorfenda- og aðdáendahóp. 400. þátturinn var sýndur núna í maí 2007. Homer, Marge, Bart, Lisa og Maggie eru svo sannarlega fjölskylduvinir heimsbúa allra, enda er þátturinn sýndur um allan heim. Samningur um gerð þáttanna stendur til ársloka 2009 á tuttugasta afmælisárinu. Verður þá tekin ákvörðun um frekari þáttagerð.

Simpson-fjölskyldan varð til í kolli Matt Groening árið 1987 og vann hann hugmyndina ítarlega áður en framleiðsla hófst formlega. Groening hefur eins og vænta má auðgast mjög á gerð þáttanna og er enn í dag einn af aðalhandritshöfundum þeirra og yfirstjórnendum. Hef ég fylgst með þáttunum vel allt frá byrjun, óneitanlega er Simpson-fjölskyldan eitt af því sem mín kynslóð og þær sem á eftir hafa komið hafa alist upp við.

Simpson-fjölskyldan er án vafa eitt af táknum tíunda áratugar 20. aldarinnar. Það verður gaman að sjá myndina og fróðlegt eiginleg að sjá hvort að framtíð Simpson-fjölskyldunnar verði í kvikmyndaformi eða hvort þetta er aðeins tilraun. Það ræðst væntanlega mikið af viðtökum myndarinnar, sem ég tel öruggt að verði smellur, enda hefur fjölskyldan haldið velli árum saman og er enn mjög vinsæl.

Simpson-stefið margfræga eftir Danny Elfman er í spilaranum hér á vefnum.

Simpsons kvikmyndin heimsfrumsýnd í Springfield

Pratibha Patil kjörin forseti Indlands

Pratibha Patil hefur verið kjörin forseti Indlands, fyrst kvenna. Það kemur ekki að óvörum að hún nái kjöri, enda hefur hún í áratugi verið pólitískur fulltrúi Kongress-flokksins og verið trú Gandhi-fjölskyldunni alla tíð. Hún hefur verið héraðsstjóri Rajasthan frá árinu 2004 og sat þar áður árum saman á indverska þinginu og héraðsþingi fyrir Kongress-flokkinn. Patil tekur við forsetaembættinu af Abdul Kalam, sem kom m.a. í opinbera heimsókn til Íslands á forsetaferli sínum.

Patil komst til áhrifa innan Kongress-flokksins á leiðtogaferli Indiru Gandhi, sem er enn eina konan sem hefur orðið forsætisráðherra Indlands. Segja má því að hún hafi verið pólitísk lærimóðir hennar og í senn trúnaðarkona, en tryggð Patil við Gandhi-fjölskylduna hefur ávallt verið sterk. Indira Gandhi var lykilstjórnmálamaður í indverskri sögu, varð ekki aðeins fyrst kvenna forsætisráðherra heldur líka komin af valdaættum. Hún var dóttir Jawaharlal Nehru, fyrsta forsætisráðherra Indlands, og varð forsætisráðherra sjálf tveim árum eftir dauða föður síns og sat á valdastóli nær óslitið allt þar til að hún var myrt í október 1984.

Nehru/Gandhi-ættin hefur verið valdamikil ætt í indverskum stjórnmálum og voru þrír ættliðir hennar við völd áratugum saman. Þegar að Indira var myrt tók enda sonur hennar Rajiv við embættinu, strax innan sólarhrings. Hann missti völdin árið 1989 og var myrtur í sprengjuárás í kosningabaráttunni 1991. Þrátt fyrir dauða þeirra mæðgina héldust völdin áfram á hendi ættarinnar með forystu hinnar ítölsku Soniu Gandhi, ekkju Rajivs. Það leikur enginn vafi á því að Sonia er valdamesti stjórnmálamaður Indlands, sú sem heldur um pólitísku þræðina í landinu. Það sést vel af valinu á Patil sem forsetaefni vinstriblokkarinnar og ennfremur af sterkri stöðu hennar í kjörinu. 

Kongress-flokkurinn vann mikinn og mjög óvæntan kosningasigur á Indlandi sumarið 2004 undir forystu Soniu Gandhi. Vajpayee tapaði kosningunum mjög óvænt og varð frá að hverfa. Sonia varð ráðandi forystukona innan Kongress-flokksins þegar að Rajiv var myrtur en sótti sér þó ekki leiðtogavald innan flokksins fyrr en árið 1998, þó mjög hafi verið lagt að henni að taka við flokknum árið 1991 eftir morðið á Rajiv. Sigurinn í kosningunum 2004 tryggði Soniu stöðu til að verða forsætisráðherra Indlands, rétt eins og tengdamóðir hennar og eiginmaður áður. Mjög óvænt ákvað hún að afþakka embættið. Þess í stað varð Manmohan Singh, tryggur stuðningsmaður Soniu, forsætisráðherra.

Ein stærsta ástæða þess að Sonia hafnaði forsætisráðherraembættinu var að hún óttaðist mjög um örlög sín yrði hún forsætisráðherra, hafandi séð eiginmann sinn og tengdamóður bæði myrt í hringiðu forystuhlutverks í stjórnmálum. Þess í stað hefur Sonia Gandhi drottnað yfir indverskum stjórnmálum í gegnum aðra lykilmenn sem hafa í einu og öllu farið eftir hennar vilja. Staða Soniu er mjög sterk og kjör Patil, sem einnar nánustu pólitísku samstarfskonu hennar og afgerandi stuðningsmann Gandhi-fjölskyldunnar áratugum saman, á forsetastól staðfestir það.

Sigur Pratibhu er þó auðvitað mikill sigur fyrst og fremst fyrir indverskar konur, enda er hún aðeins annar þjóðkjörni forystumaður Indlands frá sjálfstæðinu 1948, og vonandi mun kjör hennar marka tímamót í lykilmálefnum kvenna á Indlandi.

Patil kjörin næsti forseti Indlands

Flokkast það undir mótmæli að hella málningu?

Mótmæli Saving Iceland hafa vakið athygli en varla orðið til að styrkja baráttu íslenskra umhverfisverndarsinna. Að minnsta kosti ekki ef það er rétt að Saving Iceland-liðar hafi slett málningu á skrifstofur PR-fyrirtækisins Athygli. Þegar að starfsmenn mættu þar í morgun mætti þeim orðin Iceland is bleeding á hlið hússins og var málning dreifð um allt í kring.

Hafi þeir staðið að verki er ekki nema von að spurt sé: flokkast það undir mótmæli að hella málningu á hús? Er það ekki bara skemmdarverk á eigum fólks? Ég lít svo á og eflaust lítur lagabókstafurinn sömu augum á það. Efast ekki um það. Þetta er svona álíka gáfulegt og þegar að grænlituðu skyri var hellt á ráðstefnugesti í fyrra. Það átti að vera eitthvað voðalegt statement fólgið í þeirri endemis vitleysu.

Annars skil ég ekki þessi "mótmæli". Þau virka mjög heimskuleg. Gott dæmi er það þegar að Snorrabrautin var blokkeruð og svo auðvitað þegar að fólkið mætti í Kringluna. Sá kostulega klippu frá því sem gerðist í Kringlunni og hvet lesendur til að líta á hana.

Málningu hellt á skrifstofur Athygli

Löng andvökunótt hjá aðdáendum Harry Potter

Aðdáendur ævintýrasagnanna um Harry Potter áttu andvökunótt við að lesa sjöunda og síðasta bindið um galdrastrákinn um allan heim. Margar sögusagnir hafa gengið um endalokin og er það nú í höndum lesenda að komast að því hvernig fer að lokum. Um allan heim, allt frá Íslandi til Nýja-Sjálands, biðu aðdáendur bókarinnar í röðum eftir að komast yfir eintak af bókinni, margir biðu í vel yfir 30 klukkustundir. Aðrir pöntuðu bókina fyrirfram og fá hana senda heim í pósti og slepptu langri bið.

Bækurnar um Harry Potter hafa komið út í tíu ár og hafa allar notið mikilla vinsælda. Langar biðraðir hafa myndast í hvert skipti eftir þeim. Fyrsta bókin, Harry Potter og viskusteinnin, er ein mest selda bók heims, sú níunda eða tíunda mest selda að mig minnir, naut allavega gríðarlegra vinsælda. Áhuginn fyrir bókunum hefur alltaf verið mikill og hefur æðið sem myndaðist utan um ævintýrabálkinn verið áberandi. Fá ævintýri hafa náð betur til fólks á öllum aldri og eitt er víst að lesendahópurinn er ekki bara börn eða unglingar. Bækurnar hafa enda verið fjölskyldulesning og áhuginn eftir því.

Bækurnar um Harry Potter hafa opnað magnaðan ævintýraheim. Sennilega er J.K. Rowling ekki besti rithöfundur sögunnar en henni tókst með ævintýralegum hætti að búa til heim sem lesendur gátu gleymt sér í og fangaði ævintýraþörf fólks. Þetta er ekki ósvipað og Hringadróttinssaga eftir J.R.R. Tolkien. Flestir muna eftir tilhlökkuninni eftir myndunum þrem á hinum gömlu og góðu bókum, sem fæstir höfðu lesið áður en þeir sáu fyrstu myndina. Það varð visst spennufall hjá aðdáendum sagnanna þegar að þriðja og síðasta myndin varð opinber og sama mun eflaust gerast meðal aðdáenda Harry Potter nú, sem geta þó beðið eftir næstu tveim kvikmyndum.

Mér finnst merkilega lítið hafa heyrst um sögulokin. Eflaust vill hver og einn lesa bókina á sínum hraða. Sumir þjófstarta með því að líta fyrst á síðasta kaflann til að eyða óvissunni. Það er þó aldrei gaman að lesa bók sem vitað er hvernig endað, svo að sennilegast lesa flestir bókina á eðlilegum hraða. Það er þó svo með Harry Potter-bækur að það hleypur enginn á hundavaði í gegnum þær. Enda eru þær mjög þykkar og yfirgripsmiklar.

Harry Potter and the Deathly Hallows er 608 blaðsíður, svo að löng helgarlesning er framundan hjá þeim sem biðu sem lengst.

Harry Potter allur