Er flugið öruggasti ferðamátinn?

Brá talsvert þegar að ég sá fréttina um að elding hefði lent í væng flugvélar frá Iceland Express og taldi kannski að um eitthvað slys hefði orðið að ræða. Svo var sem betur fer ekki. Allt fór eins vel og á var kosið við þessar aðstæður. En þetta opnar auðvitað hugleiðingar um það hvort að flugið sé öruggasti ferðamátinn.

Sjálfur hef ég mikið notað innanlandsflugið og flogið talsvert. Aldrei hefur mér liðið eitthvað illa í flugi eða fundist það óöruggur ferðamáti, þvert á móti hefur mér liðið frekar vel með að ferðast þannig. Hinsvegar er það auðvitað ljóst að allt getur gerst og aldrei hægt að koma í veg fyrir að slys verði. Það er eins og í umferðinni að slysin gerast og þau gera heldur aldrei boð á undan sér með neinu móti.

Hef sem betur fer aldrei lent í neinu óhappi á öllum þessum árum, í mesta falli orðið fyrir ónotum af því að flugvél lendir í vindi og rásar til sem leiðir til smáfiðrings. Sjálfum finnst mér miklu skemmtilegra til dæmis að fara fljúgandi milli Akureyrar og Reykjavíkur. Þau eru teljandi á fingrum annarrar handar skiptin sem ég hef farið á bíl á milli síðustu fimm árin til dæmis. Finnst flugið einfaldlega miklu betra. Það er bæði hraðvirkur og einfaldur ferðamáti að mörgu leyti. Gott að losna við langar bílferðir innanlands.

En flugið verður aldrei hættulaust. Um leið og við pöntum okkur flugmiða innanlands eða út í heim vitum við að allt getur gerst. Það er alveg eins þegar að við förum keyrandi á milli staða. Við vitum aldrei hvort við komumst heil heim, en við auðvitað vonum alltaf hið besta.

Eldingu laust í þotu Iceland Express

Jennifer Aniston slítur vinaböndin

Það er mikið sjokk fyrir hörðustu aðdáendur sjónvarpsþáttanna Friends að Jennifer Aniston hafi ákveðið að slíta vinaböndin með því að útiloka að leika Rachel Green aftur og koma í veg fyrir endurkomu Vina á hvíta tjaldinu eða í sjónvarpsmynd. Aniston hefur alla tíð verið mest þekkt fyrir þetta hlutverk en ætlar að reyna að leita frægðarinnar á nýjum vettvangi og leika alvarlegri hlutverk. Þetta er svipuð ákvörðun og Kim Cattrall tók er hún neitaði að leika í kvikmyndaútfærslu af Sex and the City, en hún skipti síðar um skoðun.

Friends varð gríðarlega vinsæll sjónvarpsþáttaröð, með þeim vinsælli í sjónvarpssögunni. Rúmlega 50 milljón manns horfðu t.d. á lokaþáttinn þegar að hann var sýndur í Bandaríkjunum 6. maí 2004. Þættirnir um Vini voru alla tíð vinsælir reyndar og það varð aldrei lát á þeim vinsældum allt frá því að fyrsti þátturinn var sýndur þann 22. september 1994. Þættirnir voru á þessum áratug sýndir í um 100 löndum.

Aðalleikararnir: Jennifer Aniston, Courtney Cox Arquette, Lisa Kudrow, Matt Le Blanc, Matthew Perry og David Schwimmer (alltaf kynnt í byrjun hvers þáttar í þessari röð) voru öll nær óþekkt við upphaf sýninga þáttanna. Við leiðarlok minnir mig að þau hafi fengið um eina milljón dollara, um 70-75 milljónir íslenskra króna fyrir hvern þátt. Fylgdist ég með þáttunum um Vini alla tíð og á þættina á DVD. Þetta er einfaldlega sá þáttur sem helst stendur upp úr frá tíunda áratugnum, náði gríðarlegum vinsældum og hafði sterka stöðu.

Það eru því viss vonbrigði að ekki verði framhald á af einhverju tagi, það er ekki hægt að segja annað. En það er svo sannarlega gott að við eigum þó allavega þættina á DVD og getum notið þeirra alla tíð. Nú verður fróðlegt að sjá hvort að Jennifer beygir sig undir það síðar meir að gera framhald á vinasögunni í New York.

Ekki meiri Vinir

Skelfilegt slys

Það er skelfilegt að heyra fréttir af enn einu slysinu, nú þar sem að hjólreiðamaður verður fyrir bíl. Það er úrslitaatriði við þær aðstæður jafnan hvort hjólreiðamaðurinn hefur hjálm. Það virðist vera sem að hjálmurinn hafi sprungið í slysinu og því hafi höfuðhöggið orðið mjög mikið. Jafnan hefur hjálmurinn mikið að segja um að ekki fari enn verr og veit ég af slysum þar sem það hefur haft allt að segja að hjálmur hafi verið til staðar.

Sjálfur nota ég alltaf hjálm þegar að ég fæ mér hjóltúr og vonandi er það orðið svo að flestir noti hjálm. Lengi vel fannst mörgum það ekki flott að vera með hjálm en ég held að flestir hafi yfirstígið þær hugsanir. Vona það allavega. En þó að hann sé auðvitað notaður til að auka öryggi getur svo farið að hann komi ekki í veg fyrir vonda áverka og virðist þetta vera eitt þeirra tilfella.

Það er alltaf stingandi að heyra fréttir af svona slysförum, enda er leitt að hjálmarnir taki ekki algjörlega höggið sem verður í slysinu. Það er vonandi að sá sem lenti í þessu slysi nái sér að fullu.

Ekið á reiðhjólamann

Lífið í friðargæslunni

Það er aðdáunarvert að mínu mati þegar að fólk ákveður að slíta sig úr umhverfi sínu og prófa eitthvað nýtt, jafnvel að halda til verka á stríðshrjáðum svæðum og verða hluti af friðargæslu. Fannst því fróðlegt að heyra sögu Bjarneyjar Friðriksdóttur í Morgunblaðinu í dag. Hún hefur verið í tæp þrjú ár á vegum friðargæslunnar í Kósóvó-héraði. Eins og flestir muna komu fjöldi flóttamanna frá Kósóvó meðal annars hingað til Íslands fyrir átta árum og fjöldi þeirra býr enn á Dalvík og hefur aðlagast samfélaginu þar mjög vel.

Friðargæslan er mjög mikilvæg. Þar er unnið farsælt og gott starf að mínu mati. Hún hefur komið nálægt fjölda mála og verið mjög sýnileg víða um heim. Íslenska friðargæslan hefur t.d. komið að verkefnum sem tengjast mjög málefnum kvenna og öðru þróunarsamstarfi. Utanríkisráðherrar síðustu árin hafa verið mjög ötulir talsmenn þessa starfs og lagt grunninn af því, en sennilega var það helst gert í níu ára utanríkisráðherratíð Halldórs Ásgrímssonar, fyrrum forsætisráðherra, en hann var auðvitað utanríkisráðherra á umbrotatímum í utanríkismálum víða um heim.

Mér líst reyndar vel á það að utanríkisráðherrar undanfarinna ára hafi lagt áherslu á að verkefnaval og markmið friðargæslunnar taki mið af kynjasjónarmiðum, ekki síður en öðru. Helmingur friðargæsluliða t.d. á Sri Lanka eru konur. Það var allavega fróðlegt að heyra sögu Bjarneyjar Friðriksdóttur, en það hlýtur þrátt fyrir göfugt starf að vera lýjandi að búa í ferðatösku árum saman, en mikil reynsla kemur af þessu starfi eflaust. Ekki er bilbugur á henni, enda á leið til Sri Lanka.

Heimilið í ferðatösku

Rósrauð augnabliksfrægð Páls Óskars á netinu

Páll Óskar Hjálmtýsson hefur aldrei átt í erfiðleikum með að stuða og vekja athygli, enda mjög ófeiminn í allri framkomu. Þóttist vita um leið og ég sá myndbandið við nýjasta lagið hans, Allt fyrir ástina, að það ætti eftir að vekja mjög mikla athygli. Enda er myndbandið mjög rósrautt og litríkt, svo vægt sé til orða tekið. Þó hafa sennilega fæstir búist við að sú athygli myndi ná út fyrir landsteinana, rétt eins og honum tókst með söngatriði sínu í Eurovision fyrir áratug. Þá breytti hann keppninni með eftirminnilegum og áberandi hætti.

Páll Óskar komst nefnilega í umræðuna á vefsíðu Perez Hilton (sem er ekki skyldur glamúrgellunni París Hilton svo það sé tekið fram) sem er ein sú vinsælasta í heimi. YouTube er auðvitað orðinn mjög öflugur miðill, enda flest sem leita þarf að þar, og svo virðist vera sem að Hilton hafi þar séð myndbandið. Hann skilur auðvitað ekki orð í því sem söngvarinn lætur frá sér fara, en yfirbragð myndbandsins fær hann til að tala mjög opinskátt. Og ekki eru kommentin rólegri, en þar er engin tæpitunga sjáanleg.

Þetta myndband er auðvitað með öllum mögulegum klisjum í bókinni varðandi ást og fer enn lengra. Svona er bara stíll Páls Óskars. Við þekkjum þann stíl eiginlega orðið of vel til að kippa okkur upp við hann. Er reyndar mjög klisjukennt myndband, það er sennilega hægt að taka misafgerandi til orða um það. Þessi skrif virðast hafa kippt verulega upp heimsóknunum á myndbandið og Páll Óskar fær sínar 15 mínútur frægðarinnar. Hún verður eflaust gleymd eftir helgina og þegar að gúrkutíðinni lýkur hérna heima.

Annars er auðvitað ljóst að þetta er einn öflugasti sumarsmellurinn hérna heima. Er mikið spilaður í útvarpi og er á vinsældalistum. Hinsvegar toppar hann ekki á tónlist.is en strákarnir í Sprengjuhöllinni eru þar enn í efsta sæti með sumarsmellinn sinn og virðast ná að bægja rósrauðum smelli Páls Óskars frá því að verða vinsælasta lag sumarsins.

Reyndar minnti myndbandið hans Páls Óskars að hluta á draumasenuna rósóttu og mögnuðu úr kvikmyndinni American Beauty fyrir tæpum áratug er Lester Burnham (í frábærri túlkun Kevin Spacey) upplifir rósrauðar hugsanir. Klárlega litið aðeins þangað, en líka á fleira. Þetta er sambland af mjög mörgu í einu myndbandi.

Páll Óskar á frægustu slúðursíðu heims