Sr. Pétur Þórarinsson látinn

Sr. Pétur Þórarinsson, sóknarprestur og prófastur í Laufási, lést í nótt, 55 ára að aldri. Pétur hafði barist hetjulega við erfið veikindi svo árum skipti, veikindi sem sýndu karakterstyrk hans betur en flest annað. Sr. Pétur hefur verið sóknarprestur hér á svæðinu í tæpa þrjá áratugi. Hann var prestur á Hálsi í Fnjóskadal 1976-1982, tók við sem sóknarprestur á Möðruvöllum árið 1982 er sr. Þórhallur Höskuldsson varð prestur í Akureyrarkirkju og varð sóknarprestur í Glerárkirkju hér á Akureyri er frændi minn, sr. Pálmi Matthíasson, varð sóknarprestur í Bústaðakirkju við biskupskjör Hr. Ólafs Skúlasonar.

Sr. Pétur hefur verið sóknarprestur á Laufási frá árinu 1991, frá biskupskjöri sr. Bolla Gústafssonar á Hólum. Hann hefur síðasta áratuginn verið prófastur á sínu svæði, en varð að hætta sem prófastur fyrir nokkrum mánuðum vegna veikinda. Nær allan prestsferil sinn að Laufási hefur Pétur barist við erfið veikindi. Hann missti báða fætur sína vegna sykursýki um miðjan síðasta áratug og barðist við að halda störfum sínum áfram með aðdáunarverðum hætti við mjög erfiðar aðstæður.

Án aðstoðar Ingu, eiginkonu Péturs, hefði honum verið erfitt að halda áfram, en hún var allt til hinstu stundar honum mikil stoð í verkum sínum. Samhugur íbúa hér með Pétri og fjölskyldu hans í veikindastríðinu hefur alla tíð verið mikill. Eftir þann þunga dóm að missa báða fæturna voru haldnir styrktartónleikar fyrir fjölskylduna, fleiri en einir tónleikar, í Glerárkirkju. Voru það ógleymanlegir tónleikar okkur sem þangað fóru.

Ég vil votta Ingu og fjölskyldunni mínar innilegustu samúðarkveðjur við fráfall Péturs.

Fallegasta ljóð Péturs og það sem mun halda nafni hans hæst á lofti er Í bljúgri bæn;

Í bljúgri bæn og þökk til þín,
sem þekkir mig og verkin mín.
Ég leita þín, Guð leiddu mig
og lýstu mér um ævistig.

Ég reika oft á rangri leið,
sú rétta virðist aldrei greið.
Ég geri margt, sem miður fer,
og man svo sjaldan eftir þér.

Sú ein er bæn í brjósti mér,
ég betur kunni þjóna þér,
því veit mér feta veginn þinn,
að verðir þú æ Drottinn minn.

Pétur Þórarinsson
1951-2007


Fjallað er nánar um æviferil Péturs í ítarlegum skrifum á vef Þjóðkirkjunnar í dag.

Pétur veitti síðasta fjölmiðlaviðtal sitt í haust er hann ræddi við Björn Þorláksson - þar sagði hann veikindasöguna í Kompásþætti. Bendi fólki á að horfa á viðtalið við Pétur. Það lætur engan ósnortinn.

Blessuð sé minning höfðingjans Péturs í Laufási.

Athugasemdir

[Sveinn Hjörtur , 1.3.2007 kl. 13:59]

Magnaður karl. Blessuð sé minning hans!

[Jón Valur Jensson, 1.3.2007 kl. 14:02]

Þakka þér fyrir þetta, Stefán. Séra Pétur var einstaklega ljúfur maður, hress í vina hópi og samstúdenta (en við vorum samstiga í guðfræðinámi). Ég minnist hans sem afar einlægs í trú sinni og skilningsleit í náminu og með staðfastan vilja að endurnýja trúarkraft safnaðanna og taka köllunina til helgunar alvarlega. Hann var kappsamur í íþróttaiðkunum á þeim árum og hrókur alls fagnaðar á ferðum okkar nemenda, nýtti þá m.a. hagmælsku sína til að kasta fram stökum ásamt Hjálmari Jónssyni, Sighvati Birgi Emilssyni (sem var um tíma Hólaprestur, en er nýlega látinn), Jóni Ragnarssyni, undirrituðum o.fl., en sú iðja Péturs bar síðar einna fegurstan ávöxt í bænaversunum sem þú færðir þarna inn, Stefán. Þau eru verðugt minnismerki um sannan kristinn bróður og andlegan leiðtoga.

[Stefán (IP-tala skráð) 1.3.2007 kl. 14:03]

Blessuð sé minning hans og þetta gullfallega ljóð við fallegt lag mun lengi lifa.

Stefán

[Heimir Lárusson Fjeldsted, 1.3.2007 kl. 14:06]

Blessuð sé minningin um góðan dreng og Guðsmann.

[Steini Briem (IP-tala skráð) 1.3.2007 kl. 14:43]

Deyr fé, deyja frændur,
deyr sjálfur ið sama.
En orðstír deyr aldregi
hveim er sér góðan getur.

Séra Pétur var frábær náungi og blessuð sé hans minning.

[Haukur Nikulásson, 1.3.2007 kl. 14:48]

Pétur ávann sér mikla hylli eldri knattspyrnumanna af öllu landinu þegar hann var ræðumaður kvöldsins í lokahófi pollamóts Þórs seint á síðustu öld.

Þar flutti Pétur eftirminnilegustu tækifærisræðu sem undirritaður man eftir og skildi Sjallann eftir í algjöru krampakasti. Margar setningar úr þeirri ræðu eru enn fleygar:

"Ég er líklega eini maðurinn hér sem hef leyfi til að jarða Framliðið!"

"Ég spila aldrei í vörninni, ég er nefnilega sóknarprestur!"

Blessuð sé minning hans.

[Baldvin Jónsson, 1.3.2007 kl. 15:22]

Já, Stefán takk fyrir að koma þessu hér að.

Eftir harða hildi og lífsbaráttu í átökum við erfið veikindi er hann nú allur.  Það er engin spurning að hans verður minnst fyrir sálminn Í bljúgri bæn.

Það verður mér ein lína sérstaklega minnisstæð: "sú ein er bæn í brjósti mér, ég betur kunni þjóna þér".

Gaman að ímynda sér að þessu hafi Pétur svarað í einhverju samtali sínu við æðri máttarvöld.

Guð blessi þig Pétur og fjölskyldu þína.

[Stefán Friðrik Stefánsson, 1.3.2007 kl. 15:35]

Þakka ykkur fyrir þessi góðu komment.

mbk.

[Kristín M. Jóhannsdóttir, 1.3.2007 kl. 21:05]

Æi nei, ég var ekki búin að heyra þetta. Hans verður sárt saknað. 

[Ragnar Bjarnason, 2.3.2007 kl. 00:00]

Ég og við hjón, minnumst Péturs sem mikils manns og góðs. Hann skýrði báðar dætur okkar og gifti okkur síðastliðið sumar. Sú kynni voru einstaklega ánægjuleg og gefandi þar sem farið var yfir leiksvið lífsins, hann með sitt og ég með mitt sem hjóm eitt þar miðað við.

Hér er gegnið mikilmenni, blessuð sé minning hans.

Við Anita vottum Ingu og fjölskyldunni okkar innilegustu samúðarkveðjur.