Sverrir farinn - hvaða braut feta frjálslyndir í RVK?

Sverrir Hermannsson, fyrrum bankastjóri og ráðherra, sem stofnaði Frjálslynda flokkinn fyrir áratug, mun nú hafa sagt sig úr honum, ef marka má fréttir. Það eru mikil tíðindi vissulega, en æ minni í ljósi þess að Margrét, dóttir hans, og stuðningsmenn hennar hafa sagt skilið við hann ennfremur. Klofningur frjálslyndra hefur verið mikið í fréttum undanfarnar vikur, en nú stefnir í hægri grænt framboð m.a. þeirra sem hafa farið frá frjálslyndum.

Jæja, nú hafa frjálslyndir svo kynnt lista sína í höfuðborginni. Þar eru þeir félagar Magnús Þór og Jón Magnússon í fararbroddi. Það hefur blasað við síðan í haust að Jóni væri ætlaður þar leiðtogasess og undarlegar hafa þær verið tilraunir forystumanna flokksins við að neita því að þar ætti að byggja undir Jón og vonir hans um að komast á þing. Það er greinilegt að þar átti alla tíð að láta hann leiða lista. Flestir vita væntanlega hvaða braut á að feta í þeirri pólitík, eða er það ekki annars? Tel svo vera, það hefur blasað við lengi hvert eigi þar að stefna.

Magnús Þór er kominn í framboð í Reykjavík. Það verður fróðlegt hvernig baráttan verði með hann þar. Þessir tveir menn hafa verið þekktir fyrir það undanfarnar vikur að tala óvenju hvasst í innflytjendamálum. Það verður fróðlegt að sjá hvaða dóm kjósendur í Reykjavík fella yfir þeim og þeirra stefnu. Skv. síðustu könnun Gallups eru þessir menn báðir inni, en sem jöfnunarmenn báðir. Þeir eru því ekki eins öruggir nú og var t.d. fyrir nokkrum vikum. Það er vonandi að hvorugur þeirra komist inn á þing, segi ég bara.

Magnús Þór og Jón Magnússon í fyrstu sætunum í Reykjavík

Athugasemdir

[Stefán Friðrik Stefánsson, 14.3.2007 kl. 12:52]

Takk fyrir kommentin.

Jón Kristófer: Gott að við séum sammála um þetta. Ég er bara þannig gerður að ég vil taka vel á móti þeim sem vilja hingað koma. Ég er ekki haldinn neinum fordómum í þeirra garð fyrirfram. Auðvitað er alltaf misjafn sauður einhversstaðar í stórum hóp, en við eigum að gefa fólki tækifæri. Líst ekki vel á það sem frá þeim fóstbræðrum Magnúsi og Jóni kemur. Segi það bara alveg hreint út.

Hanna Birna: Ekkert að því að vera ósammála. Það er bara þannig að ég ber mjög litla virðingu fyrir þessum mönnum. Með því dæmi ég ekki alla flokksmenn, en hinsvegar finnst mér það frekar leitt ef þessir tilteknu menn ætla að keyra kosningarnar hjá sér með því að ala á fordómum gegn innflytjendum bara því að það getur tryggt keyrt upp fylgið. Enda sé ég ekki fyrir mér að neinn geti skrifað upp á þetta með þeim.

mbk.

[Steini Briem (IP-tala skráð) 14.3.2007 kl. 15:36]

"Ertu þá farinn, ertu þá farinn frá mér, hvar ertu núna, hvert liggur þín leið?" Daginn fyrir kosningar bannar Sverrir Frjálsblindum að nota þetta nafn, þar sem það er í hans eigu, og Frjálsblindir fá þar af leiðandi engin atkvæði. Köttur úti í mýri.