Mun Íslandshreyfingin taka fylgi úr öllum áttum?

Landsframboðunum við þingkosningarnar eftir 50 daga fjölgaði um eitt í dag. Stóra spurningin er; mun Íslandshreyfingin taka fylgi úr öllum áttum? Framboðið er markaðssett sem hægri grænt og leiðtogi flokksins er ein helsta goðsögn íslenskrar sjónvarpssögu. Hvernig mælingu fær framboð af þessu tagi og nýtur málflutningur Ómars Ragnarssonar stuðnings fólks úr öllum flokkum?

Þetta eru í raun stóru spurningarnar - þeim verður svarað eftir 50 daga. Ef þessi flokkur tekur fylgi úr öllum áttum verður hann eflaust örlagavaldur í þessum kosningum. Borgaraflokknum tókst það fyrir tveim áratugum að koma fram innan við 50 dögum fyrir kosningar, sópa upp fylgi víða að og hljóta sjö þingsæti. Það var þá, en hvað gerist nú? Þetta framboð er eitt stærsta spurningamerki baráttunnar sem framundan er. Flestir vilja enda ólmir fara að greina stöðu þess.

Nýleg skoðanakönnun sýndi að framboðið myndi helst taka fylgi frá vinstri, fólki sem er umhverfissinnað fyrst og fremst. Samfylkingin fór verst út úr tilkomu nýja framboðsins í þeirri könnun. Munu hægrikratar, sem eru andvígir stóriðju, og mildasti armur VG telja framboðið hið eina rétta? Eða munu hægri grænir sjálfstæðismenn horfa á þennan flokk sem valkost fyrir sig, nú eða einhverjir framsóknarmenn? En hvað með frjálslynda, þeir hafa tapað miklu fylgi í síðustu skoðanakönnunum og eru komnir undir 5% mörkin í nýjustu könnun Gallups - missa þeir enn meira en orðið er með brotthvarfi Sverrisarmsins fræga úr flokknum?

Allt eru þetta stórar spurningar. Allir alvöru stjórnmálaáhugamenn bíða nú ólmir eftir að greina stöðuna. Sögusagnir hafa verið miklar um hvort af framboðinu yrði og hvernig það yrði kynnt. Það höfum við nú séð. Þetta er hægri grænt framboð með afgerandi umhverfispólitík í forgrunni. Nú er það orðið alvöru afl og tryggt sér sess í alla lykilumfjöllun með landsframboði. Nú fara kannanir brátt að færa okkur stöðu mála eins og hún er. Væntanleg er könnun frá Gallup á morgun. Hún segir einhverja litla sögu af heildarmyndinni eflaust.

Þetta verða spennandi kosningar eftir 50 daga - ekkert er þar gefið fyrirfram. Þetta framboð er allavega komið til leiks og flækir myndina enn - gerir hana þó bara skemmtilegri fyrir okkur sem skrifum um stjórnmál úr fjarlægð mesta þunga baráttunnar.

Ómar vill opna eldfjallagarða líkt og á Hawaii

Athugasemdir

[Pétur Björgvin, 22.3.2007 kl. 20:35]

Kannski úr öllum áttum já, en ekki frá yngri aldurshópunum.

[Lára Stefánsdóttir, 22.3.2007 kl. 20:43]

Ég varð fyrir nokkrum vonbrigðum með kynninguna í dag ég bjóst við að þau hefðu lokið meiri heimavinnu en fannst sannast sagna ekkert nýtt gerast í dag annað en það er búið að hanna mjög fínt lógó á flokkinn. Frambjóðendur eru ekki komnir, málefnin enn í vinnslu og stjórnin til bráðabirgða, nokkuð svipað því og var fyir nokkrum vikum þegar Ómar var að kynna málin. Mér fannst hann líka dálítið ör og stressaður í Kastljósinu. Ég held að það sé rétt að Íslandsflokkurinn mun dreifa atkvæðunum töluvert en líklega einna síst frá Sjálfstæðisflokknum þar sem menn virðast íhaldssamari á hvað þeir kjósa en víða annarsstaðar. En það verður gaman að sjá hverjir fara í framboð hér í Norðausturkjördæminu og hver verða stefnumál þeirra fyrir kjördæmið okkar Stefáns. Alltaf gaman að fá gott fólk sem hefur áhuga á lífinu í landinu.

[Ásdís Sigurðardóttir, 22.3.2007 kl. 20:57]

Skrítin athugasemd að segja að Íslandsflokkurinn muni taka minnst frá Sjálfstæðismönnum því þeir séu svo íhaldssamir á hvað þeir kjósa, málið er að við kjósum skv. málefnum en hlaupum ekki út og suður um allar koppagrundir í vali okkar. Mér finnst skrítið að Ómar vilji opna eldfjallagarða, ég hélt að hann vildi halda landinu í gamla farinu, það verður ekki lengi ósnert ef hér mokast inn túristar til að skoða eldfjöll og hveri í enn meiri mæli en nú er.

[Sigfús Þ. Sigmundsson, 22.3.2007 kl. 21:06]

Það verður mjög spennandi að sjá fyrstu Capacent/Gallup könnunina eftir daginn í dag, sjá á hvaða bili þessi nýja hreyfing liggur í fylgi....

[Jón Sigurgeirsson , 22.3.2007 kl. 21:23]

Það er svo sá möguleiki Stefán að það taki hvergi fylgi af því að það fái ekkert fylgi.

[Guðmundur Ragnar Björnsson, 22.3.2007 kl. 21:42]

Held að fylgið ef eitthvað verður muni koma frá D og VG. Annars sýndist mér á bloggi nafna míns Steimgrímssonar að hann væri hræddur við að tapa fylgi yfir til Ómars. Hver veit?

[Kristján Pétursson, 22.3.2007 kl. 21:54]

Ómar og  Margrét verða að ná fylgi af íhaldinu og Frjálslindum,ef þau ætla sér að halda núverandi stjónarfl.utan næstu ríkisstjórnar.Það er eina leiðin ef á að tryggja stöðvun nýrra álbræðsufyrirtakja a.m.k.næstu 4 árin,eins og Ómar nefndi í Kastljósinu.Af hverju tiltók Ómar aðeins 4 ára stopp?

[Fishandchips, 22.3.2007 kl. 21:57]

Þetta framboð fær ekkert fylgi... Skil ekki hvernig Ómari var att út í þetta. Hann er jú reyndar gamall fréttahundur. Hann á að skilja hvernig pólitíkin virkar. En hann er svo ofvirkur, grey kallinn. Þó svo við öll séum á móti þessari virkjunarstefnu, þá virkar þessi stefna ekki, sorry...

[Ágúst Dalkvist, 22.3.2007 kl. 22:30]

Greinilegt að þeir sem hafa skrifað athugasemd hér hafa ekki horft á fréttir sjónvarpsins í kvöld eða Kastljósið.

Fyrir þá sem heyrðu í þeim Ómari og Margréti þar þurfa ekki að efast um að þetta framboð er dauðadæmt. Er sammála Fishandchips hérna á undan, þetta framboð fær ekkert fylgi.

Stefnumálin öll vanhugsuð og greinilegt að hugmyndasmiðir Íslandshreyfingarinnar eru ekki í nokkrum tengslum við þjóðina eða það sem er að gerast í landinu.

Þau munu fá eitthvað fylgi núna í fyrstu skoðanakönnunum sem koma nú eftir stofnun flokksins en síðan mun það bara minnka eftir því sem nær dregur kosningum.

Sorglegt eins og þarna er gott fólk innan borðs sem ég taldi fyrir fram að gæti gert kosningabaráttuna enn meira spennandi.

[Stefán Friðrik Stefánsson, 22.3.2007 kl. 22:41]

Takk fyrir kommentin.

Pétur Björgvin: Já, gæti verið. Er reyndar sammála þér með það að þetta framboð muni mest heilla 30 plús.

Lára: Þakka þér þessar pælingar. Sérstaklega hlakkar okkur auðvitað til að sjá hverjir fari fyrir þessu framboði hér. Sé þá einstaklinga ekki alveg í sjónmáli.

Ásdís: Þakka þér fyrir góðar pælingar.

Sigfús: Já, það verður það vissulega. Skilst líka að Gallup hafi verið með hliðarspurningu um framboðið sem slíkt.

Jón: Ég tel að það fái eitthvað fylgi, þetta er rými sem virkar opið og aðeins hversu mikið það tekur þar. Áhrif framboðsins skýrast eflaust bráðlega.

Guðmundur: Það sést vel á bloggsíðum Samfylkingarmanna í dag að þeir eru mjög hræddir við þetta framboð. Skil það vel, enda getur tilkoma þess tryggt aðra blóðtöku fyrir það, nú frá hægrihluta Samfylkingarinnar, sem yrði varla bætandi á allt annað. Könnun Fréttablaðsins sýndi reyndar um daginn að Samfylkingin myndi verða fyrir mestum skakkaföllum af einmitt svona týpu af framboði. Ég tel að þetta framboð taki allavega kúfinn ofan af VG. Það mun hafa pottþétt einhver áhrif, hversu mikil er óvíst nú um.

Kristján: Ég sé að margir virtir samfylkingarmenn eru hræddir við þetta framboð. Hræðslan sést víða í bloggheimum SF-liða í dag. Skil það vel. En þetta ræðst vel. Tel að þetta framboð styrki allavega ekki vinstrið.

F&C: Já, þetta ræðst eflaust. Ómar hefur sitt fylgi og sína stöðu. Ég myndi ekki ráðleggja flokkunum að vanmeta hann.

Ágúst: Já, þetta verður spennandi. Það er óvarlegt að dæma núna myndi ég segja, en þetta er og verður athyglisvert. Verður fróðlegt að sjá listana. En þetta verður stórt spurningamerki, kannanir sýna fyrst einhverja stöðu að ráði.

mbk.

[Steini Briem (IP-tala skráð) 22.3.2007 kl. 23:00]

Þeir gusa mest sem grynnst vaða. Það er hrein óskhyggja Sjalla að þessi græni íspinni taki eitthvað frá vinstri flokkunum. In your wildest dreams, baby! Möggu fylgja fimm Frjálsblindir og Ómar krækir á Grundinni í tvo gamla Sjalla, sem muna ekki lengur hvað þeir heita, gefur þeim nammi og keyrir þá á kjörstað.

[Árni Gunnarsson (IP-tala skráð) 22.3.2007 kl. 23:36]

Hverskonar endemis bull og óskhyggja er þessi umræða um græna stefnu til hægri? Af hverju stofnum við ekki kristilegan múslimaflokk? Auðvitað er himinn og haf á milli umhverfisverndar og markaðshyggju. Þetta á að vera hverjum manni augljóst. En líklega eru engin mörk í rökrænum þversögnum þegar fólk er að reyna að friða sálartetrið. ´

Ég hef heyrt hástemmdar lýsingar á þeirri fegurð sem blasa muni við þegar Hálslón fyllist; þegar Hálslón fyllist af fiski handa náttúruverndarfólki að veiða við svanasöng og kampavínsilm. Eða þegar mildur rakinn frá þessari votu náttúruperlu læðist yfir sanda og eyðimerkur og breyti örfoka hryllingi dauðans í græna ódáinsakra sem bjóði hlývindum þroskuð fræ sín að bera  góðbændum frjálshyggjunnar á Héraði. Álbræðsla er besta náttúruvernd sem þessi volaða þjóð getur boðið samfélagi þjóða. ÉG ER HÆGRI GRÆNN.

[Óðinn Þórisson (IP-tala skráð) 23.3.2007 kl. 09:28]

Það er ómöglet að meta þetta framboð, vantar t.d alla framboðslista.
Þeir ættu að taka einna mest frá sf og ff hugsanlega eitthvað frá vg.
Ég hlustaði á þau í gær og miðað við það þá er þessi flokkur ekki á leiðinni í neina sigurför en maður veit þó aldrei, hlakka til að sjá fyrstu könnunina sem þeir eru með í.

[Örn Johnson ´67 (IP-tala skráð) 23.3.2007 kl. 12:27]

Bara eitt til fishandchips.

Þú segir: "Þó svo við öll séum á móti þessari virkjunarstefnu."

ÖLL?    Talar þú fyrir alla?  Eins og "listamennirnir" sem mæta niður á austurvöll og segja að "þjóðin segi stopp"?

Þú talar ekki í nafni þjóðarinnar og aðrir virkjanaandstæðingr ekki heldur.