Einar og Ingibjörg Sólrún ósammála um hvalveiðar

Það er greinilegt að Ingibjörg Sólrún Gísladóttir, utanríkisráðherra, og Einar Kristinn Guðfinnsson, landbúnaðar- og sjávarútvegsráðherra, eru algjörlega ósammála um hvalveiðar Íslendinga eins og fram kom í kvöldfréttum Stöðvar 2. Þar töluðu þau hvort í sína áttina. Það blasir við að Samfylkingin heldur fast við andstöðu sína við hvalveiðarnar, en hún kom vel fram síðasta vetur er fráfarandi ríkisstjórn opnaði á þær.

Hvalveiðarnar voru svosem ekki stærsta málið í stjórnarmyndunarviðræðum Sjálfstæðisflokks og Samfylkingar en það blasti þó alltaf við að fylgst yrði með því hver yrði afstaða nýrrar ríkisstjórnar í þeim efnum. Það er nú að koma vel fram að afstaða flokkanna er óbreytt og því auðvitað spurt hvort verði ofan á, að halda fast við hvalveiðar áfram eða salta þær. Það er auðvitað alveg ljóst að hvalveiðarnar sem fór fram í fyrra skiluðu engan veginn þeim árangri sem að var stefnt. Þær ollu miklum vonbrigðum og skoðanir voru mjög skiptar um þær.

Í dag sendu nítján evrópskar ferðaskrifstofur Geir H. Haarde, forsætisráðherra, bréf þar sem þær lýstu yfir formlegum áhyggjum sínum af áhrifum hvalveiða á ferðamannastraum til landsins. Bréfið er sent í tengslum við fund Alþjóðahvalveiðiráðsins sem nú stendur yfir í Alaska. Þar munu væntanlega ráðast næstu skref málsins. Ef marka má afgerandi ummæli Ingibjargar Sólrúnar í kvöld má telja nokkuð öruggt að hvalveiðar við Ísland séu úr sögunni. Þessi ummæli verða enn meira áberandi eftir viðtal við Einar Kristinn á Sky í dag þar sem hann talar enn fyrir sömu skoðunum.

Það verður fróðlegt að sjá hvort þeirra verði ofan á í málinu. Ekki er hægt að tala báðum röddum af hálfu þessarar ríkisstjórnar öllu lengur að mínu mati. Það blasir við að taka verði afgerandi ákvörðun. Persónulega var ég fylgjandi hvalveiðum en ég verð að viðurkenna að efasemdir mínar í garð þeirra hafa aukist til muna eftir veiðarnar í vetur sem skiluðu fjarri því þeim árangri sem að var stefnt. Það verður að hugleiða vel hvort við séum ekki að fórna meiri hagsmunum fyrir minni í þeim efnum.

Japanar segjast ekki hætta við áform um hnúfubakaveiðar

Athugasemdir

[Guðmundur Steinbach (IP-tala skráð) 29.5.2007 kl. 22:04]

Voru hvalveiðarnar ekki frekar vel heppnaðar s.l. haust?
Þar veiddust 7 hvalir en menn voru að gæla við að ná 1-2 hvölum.

Það að efnagreiningin hafi tekið lengri tíma en búist var við gerir árangurinn varla minni fyrir vikið. Svo rauk ferðamannastraumurinn upp þrátt fyrir veiðarnar.

Mitt mat á þessu er að neikvæð áhrif hvalveiða eru stórlega ofmetin.

[Ágúst Dalkvist, 29.5.2007 kl. 22:38]

Þú metur þetta kolrangt Stefán hvað varðar hvalveiðarnar.

Íslendingar hafa veitt hval nú um nokkurra ára skeið og hafa þær veiðar verið kostaðar af ríkinu. Þar áður höfðu íslendingar verið kúgaðir til að hætta hvalveiðum.

Með því að leifa hvalveiðar á síðasta ári gerðist tvennt. Ríkið hætti að kosta veiðarnar og íslendingar hættu að láta kúga sig.

Næsta víst mátti telja fyrir fram að hagnaður af veiðunum yrði hverfandi. Nú er þetta atvinnugrein sem þarf að standa á eigin fótum og ef ekki selst kjötið er enginn hagnaður af því að veiða hval. Ekkert fyrirtæki og enginn maður er tilbúinn til að tapa miklu fjármagni í langan tíma í vonlausan rekstur.

Hvalveiðum verður því sjálf hætt. Ríkið losnar við kostnaðinn af vísindaveiðunum og íslendingar stóðu fast á sínu og uppsker virðingu fyrir.

Leikurinn hjá Einari að leifa hvalveiðar hlutu alltaf því að verða landi og þjóð til góðs hvort sem hagnaður yrði af hvalveiðum eða ekki. Stöndum því með honum og tökum ekki leifið til baka.

[Gústaf Níelsson, 29.5.2007 kl. 22:42]

Það er rétt hjá Guðmundi að neikvæð áhrif hvalveiða eru ofmetin. Þetta er fyrst og síðast áhugamál vinstrisinnaðra fjölmiðlamanna, vegna þess hve málið er auðvelt í allri meðferð og framsetningu. Engar raunhæfar vísbendingar hníga í þá átt að hvalveiðar skaði ímynd eða efnahag landsins, ferðamönnum fjölgar þvert á móti. Og síðast þegar ég vissi var Einar Guðfinnsson ennþá sjávarútvegsráðherra.

[Gestur Guðjónsson, 29.5.2007 kl. 23:24]

Það er spurning hvað líffræðingurinn og ferðamálaráðherrann Össur Skarphéðinsson telji rétt að gera?

[Fannar frá Rifi, 29.5.2007 kl. 23:52]

ISG og Samfylkinginn vill að líkindu banna hvalveiðar því það er ekki nóga fínnt ef þú ætlar að fara og hitta Stóru kallanna í Brussel. 

[Jóhann Páll Símonarson, 30.5.2007 kl. 00:00]

Heill og sæll Stefán.

Það er ennþá að koma upp vandræði hjá þessari ríkistjórn. Rétt eftir nokkra daga mér er hreinlega ekkert farið að lýtast á þetta samstarf lengur.

Þetta getur ekki gengið upp.Svona uppá komur koma fram að hálfu Ssamfylkingar í andstöðu við Sjálfstæðismenn. Nú spyr ég? hvað marga daga mun þetta endast lengur?.

Varandi hvalveiðar þá eigum við að veiða hval og halda því áfram Einar Guðfinnsson stendur sig vel í þessum málum. Lætur enga öfgasinna hafa áhrif á sig og sínar skoðanir.

Kristján Loftsson sá heiðursmaður hefur ætið ekki látið þessi öfgasamtök hafa áhrif á sig og sína. Enda stendur hann með pálmanna í höndunum. Þess vegna mun ég styðja hvalveiðar. Þær eiga rétt á sér að grisja lífríki hafsins.

Jóhann Páll Símonarson.

[Eggert Hjelm Herbertsson, 30.5.2007 kl. 11:09]

Ég hef alltaf verið hlynntur sjálfbærum veiðum og því hvalveiðum eins og öðrum. Ég er hins vegar farinn að efast um að ákvörðun okkar hafi verið rétt og farinn að halda að við séum að fórna meiri hagsmunum fyrir minni. Mér fannst líka ámælisvert hvernig Einar K tilkynnti þessa ákvörðun á sínum tíma og akkúrat þá var Kristján Loftsson klár með Hval 9 úr slipp og ready to go. Mjög illa af þessu staðið.

[Stefán Friðrik Stefánsson, 30.5.2007 kl. 14:07]

Takk fyrir kommentin.

Guðmundur: Það gekk ekki illa að skjóta hvali en mér finnst hafa gengið öllu verr að finna markaði fyrir kjötið sem stólandi er í raun og veru á. Þetta hefur verið mun brothættara en ég átti von á. Það verður að hugleiða vel alla þætti áður en haldið verður áfram.

Ágúst: Ég tel ekki að ég meti þetta vitlaust. Það er gagnslaust að veiða bara til að veiða. Það verður að vera markaður fyrir kjötið. Það vonandi kemur til. Ella er þessu sjálfhætt.

Gústaf: Já, það verður að kanna hversu sterkur grunnurinn er fyrir því að halda áfram. Það verður að hugleiða þetta mjög vel.

Gestur: Síðast þegar að ég vissi var Össur á móti hvalveiðum.

Jóhann Páll: Það má búast við að þetta geti orðið brokkgengt í byrjun. Þetta verður bara að ráðast. Efast ekki um að flokkarnir nái saman í þessum efnum.

Eggert: Tek undir þetta. Mér fannst veiðarnar í fyrra mjög vandræðalegar að mörgu leyti og tel margt vera í meiri óvissu en var áður. Þetta verður bara að ráðast, en við verðum að hugsa okkur betur um í þessum efnum.

mbk.