Stjörnustælar hjá Sting

Mér fannst alveg kostulegt að lesa fréttina um Sting og framkomu hans á veitingastaðnum á Flórída, er hann mætti með eigin kokk til að elda ofan í sig og sína. Þetta eru auðvitað kostulegir stjörnustælar sem eru þekktum tónlistarmanni á borð við Sting ekki til sóma. Það hefur væntanlega orðið upplit á þeim á staðnum er kokkurinn á vegum Stings mætti til að taka til starfa.

Þetta er hlægilegt í besta falli, en stjörnustælarnir geta svosem orðið einum of stundum. Mér finnst þetta einum of mikið stærilæti allavega. Annars er það auðvitað alveg ljóst að Sting er einn af þekktustu tónlistarmönnum sinnar samtíðar. Hef alltaf virt hann mikils sem tónlistarmann, enda hefur hann gert góð lög og staðist tímans tönn í tónlistarbransanum.

Ætli að þekktasta lagið hans sé ekki Fields of Gold, sem er algjörlega frábært lag. Önnur góð eru Every Breath You Take, If You Love Somebody Set Them Free, Message in a Bottle, All This Time, Englishman in New York og If I Ever Lose My Faith in You, svo fáein séu nú nefnd. Allt sannkölluð topplög, þau tvö fyrstnefndu finnst mér standa uppúr. Finnst nú lögin hans á Police-tímanum alltaf best, en sólóferillinn hefur líka verið mjög fínn og hann hefur verið í essinu sínu mjög lengi.

Var annars að enda við að horfa á endurgerðina af The Thomas Crown Affair frá árinu 1999, enda ætla ég mér að horfa á eftir á fyrirmyndina frábæru og samnefndu með Steve McQueen og Faye Dunaway. Titillag beggja myndanna er Windmills of Your Mind, sem varð eitt vinsælasta lag síns tíma og hlaut óskarsverðlaunin sem besta kvikmyndalagið á sínum tíma í flutningi Noel Harrison, sonar leikarans Rex Harrison, sem flestir minnast sem Henry Higgins í My Fair Lady.

Fannst annars merkilegt að ramba á þessa frétt núna, enda söng Sting lagið í fyrrnefndri endurgerð með sannkölluðum bravúr í nýrri og frísklegri útgáfu. Bendi því á báðar útgáfurnar hér, svona til gamans. Við vonum svo að Sting fari framvegis kokkalaus á veitingastaðina og láti af sínum kostulegu stjörnustælum.

Windmills of Your Mind - Noel Harrison
Windmills of Your Mind - Sting

Sting mætti með eigin matreiðslumann á veitingastað

Athugasemdir

[Jens Guð, 20.7.2007 kl. 22:59]

  Eins og með fleiri hefur frægðin og rúm fjármál ruglað Sting,  blessaðan kallinn,  í ríminu.  Hann kemst upp með að ala á sérvisku sinni.  Þetta hljómar líka eins og PR trix.  Kemur kallinum í uppslátt hjá slúðurblöðum,  virðulegri blöðum og ratar inn á blogg.  Meira að segja á Íslandi. 

  Eftir því sem mér skilst af eldri fréttum þá er Sting sérvitur varðandi hvað hann setur ofan í sig.  Er það sem kallast á vondri íslensku heilsufrík.  Einkakokkur hans hefur það hlutverk að passa upp á hvaða krydd og fleira er notað við matargerð handa poppstjörnunni.  Einnig hefur kokkurinn það hlutverk að passa upp á hreinlæti við matseld fyrir Sting. 

  Ég er ekki viss um að í umræddu tilfelli hafi kokkurinn verið í því hlutverki að elda matinn frá A-Ö heldur verið í því hlutverki að halda utan um ofangreinda þætti.

  Til gamans má geta að hljómsveit Stings,  The Police,  var í upphafi pönkhljómsveit.  Ég á ansi hressandi pönkrokklög með The Police frá því tímabili.   

[Stefán Friðrik Stefánsson, 21.7.2007 kl. 12:59]

Takk fyrir gott komment.

Já, Sting hefur alltaf verið mjög sérvitur, bæði í framkomu og varðandi það hvað hann setur ofan í sig. Er ekki beint grænmetisæta en hann spáir vel í matinn sem hann borðar samt.

Sennilega hefur þetta verið eftirlitsaðili með matnum sem Sting fær. En vekur samt mikla athygli. Police var hressileg pönksveit. Sting hefur átt góðan feril. Mörg góð lög og hann hefur staðið vel vörð um sína stöðu.

mbk.